Sinulat ni Elvira Bongosia
Gitakda na sa Department of Education (DepEd) ang pagbukas sa klase sa Agosto 22, 2022.
Nakalatid sa DepEd Order Number 034, series of 2022 nga gilagdaan ni Vice President ug DepEd Kalihim Sara Duterte nga buksan ang klase sa umaabot Agosto 22, 2022 ug mahuman sa Hulyo 7, 2023.
Gitugotan sa DepEd ang blended learning schedule ug full distance learning hangtod sa Oktubre 31, 2022.
Samtang sugod sa Nobyembre 2, 2022, tanang pampubliko ug pribadong mga tunghaan angay nang mag-transition sa lima ka adlaw nga in-person classes.
Nakalatid usab sa DO nga paghuman sa Nobyembre 2, wala na’y tunghaan nga tugotang magpahigayon ug pure distance learning o blended learning gawas na lamang sa mga tunghaan nga nagpatuman ug Alternative Delivery Modes.
Mokabat sa 203 ka school days ang gitugotan sa departamento.
Limitahan lamang kini alang sa academics ug related co-curricular activities.
Samtang hingpit nga gidili ang pagpahigayon ug extra-curricular activities.
Ipahigayon ang enrollment sugod sa Hulyo 25 hangtod Agosto 22, 2022.
Ipatuman usab ang Christmas break sa Disyembre 19, 2022 ug ibalik ang klase sa Enero 4, 2023.
