Sinulat ni Elvira Bongosia
Nihangyo si Presidente Ferdinand “Bongbong” Marcos, Jr. sa Kongreso ug pakighiusa aron makatukod ug kaugalingong Center for Disease Control and Prevention, ug vaccine institute sa nasud.
“Sa pakikipagtulungan ng Kongreso, itatatag natin ang sariling Center for Disease Control and Prevention at isang vaccine institute,” pahayag ni Marcos sa iyang unang State of the Nation Address (SONA) sa Batasang Pambansa, Hulyo 25, 2022.
Matud pa sa Pangulo nga magtukod usab ug mga dugang health center ug ospital sa nagkalain-laing dapit sa nasud.
Giingong napahimoslan ug maayo ang mga specialty hospitals sama sa Philippine Heart Center, Philippine Lung Center, National Children’s Hospital, ug National Kidney and Transplant Institute.
Tungod niini, giingong klaro nga dili lamang angay sa National Capital Region (NCR) nakatutok ug magtukod sa mga nahisgotang matang sa tambalanan apan bisan sa uban pang parte sa nasud.
Gawas niini, giingong magtukod usab ug mga clinic ug rural health unit nga adtuan sa mga doktor, nurse, midwife, ug medical technologist usa o duha ka higayon sa usa ka semana aron mapaduol ang healthcare system sa katawhan nga dili na kinahanglang moadto pa sa sentro sa ilang lalawigan o mobyahe pa ug layo.
Gipahayag usab sa Pangulo nga angay magbaton ug igo nga suplay sa mga tambal sa nasud.
“Sinimulan ko na ang pakikipag-usap sa mga kumpanya ng gamot dito sa Pilipinas at sa ibang bansa. Hinihikayat natin na buksan nila ang merkado upang bumaba ang presyo ng gamot,” matud pa sa Pangulo.
