Sinulat ni Elvira Bongosia
Gibuksan na sa Department of Education (DepEd) niadtong Lunes ang bag-ong proseso sa enrollment alang sa mga tinun-an sa School Year 2022-2023.
Base sa gipagawas nga DepEd Order Number 35, ang enrollment alang sa umaabot nga academic year magsugod sa Hulyo 25, 2022 ug mahuman sa Agosto 22, 2022.
Mahimong magpatala ang mga estudyante sa kanhi o napiling eskwelahan pinaagi sa in-person, remote o pinaagi sa dropbox enrollment.
Samtang ang mga nagtuon sa Alternative Learning System (ALS) gitugotan usab mag-enrol ug pisikal o online.
Gipahinumdoman sa DepEd ang mga ginikanan ug mga tinun-an nga pisikal nga magproseso sa enrollment nga sundon ang minimum public health standards aron maprotektahan ang ilang kaugalingon batok sa Coronavirus disease (Covid).
“Upang masigurong protektado ang mga magpapatala nang in-person, huwag kalimutang sundin ang ating health and safety protocol gaya ng pagsusuot ng face mask at pagpapanatili ng physical distancing,” matud pa sa pahayag sa DepEd.
Ang School Year 2022-2023 magbukas sa Agosto 22, 2022 ug matapos sa Hulyo 7, 2023.
Una nang namahayag ang DepEd nga ang mga tunghaan tugotan lamang nga magpahigayon ug blended learning schedules ug full-distance learning hangtod Oktubre 31, 2022 samtang sugdan sugod Nobyembre 2, 2022 sa tanang pampubliko ug pribadong eskwelahan nga mobalhin sa 5 ka adlaw nga in-person classes.
Kahinumdoman nga una na usab namahayag si Bise Presidente ug Kalihim sa Edukasyon Sara Duterte nga luwas nang magbukas ang mga eskwelahan tungod kay may mga health protocol naman sa nakalabay nga duha ka tuig taliwala sa pandemya.
