Sinulat ni Elvira Bongosia
Hingpit nang balaod ang balaodnon nga maghatag ug P1,000 gikan sa P500 ang social pension sa mga indigent o kabos nga senior citizen matag buwan.
Sa gipahigayong sesyon niadtong Martes, Agosto 2, 2022, namahayag si Senador Grace Poe nga kapin sa usa ka dekada nang napalabang ang unang balaod nga Republic Act No. 9994 o ang Expanded Senior Citizens Act of 2010.
Matud pa sa Senadora nga hingpit nang nahimong balaod ang nagsunod niini nga mao ang Republic Act No. 11916 nga nagtinguhang isaka ang social pension sa mga indigent senior citizens nga dili moubos sa P1,000 matag buwan.
Gawas sa mas taas nga social pension, gibutyag ni Poe nga mahinungdanon sa aspeto sa balaod ang adaptive character niini nga gitugotan nga magbaton og adjustment ang social pension kun gikinahanglan matag duha ka tuig na apan angay adunay ipahigayong rebyu ug konsultasyon ug tan-awon ang gipatuman nga consumer price index.
Gipadala sa Palasyo sa Senado ang kopya sa Republic Act No. 11916 nga nahimong balaod human kini gibiyaan sumala sa Konstitusyon.
