Sinulat ni Elvira Bongosia
Gipagawas na sa Department of Health (DOH) ang mga sumbanan alang sa nationwide rollout sa ikaduhang booster alang sa tanang indibidwal nga nag-edad 50 anyos pataas, ug 18 hangtod 49 anyos nga adunay comorbidities.
Matud pa sa gipagawas nga pahayag sa DOH, kini human ang pagpalapad sa Emergency Use Authorization (EUA) sa Food and Drug Administration (FDA) sa pipila ka Coronavirus disease (Covid) vaccine brands aron tugotan ang paggamit niini isip second boosters sa gipalapdan nga populasyon ug ang mga rekomendasyon. nga gihatag sa Health Technology Assessment Council (HTAC).
“Only the Tozinameran (Pfizer) and Spikevax (Moderna) mRNA vaccines will be used for this purpose, and there must be an interval of at least four months from the third dose or first booster,” matud pa sa pahayag sa DOH.
Matud pa usab sa departamento nga mahimong mokonsulta sa Local Government Unit ang mga indibdiwal nga nasulod sa nahisgotang gipalapdan nga coverage sa 2nd booster shot alang sa iskedyul. Kinahanglan usab nilang dalhon ug ipakita ang ilang vaccination card ug valid ID.
Alang sa mga may comorbidities, dili na nila kinahanglanon ang medical certificate. Usa ka medikal nga screener o doktor sa lugar diin magpabakuna ang awtorisado lamang nga mosusi ug mohimo sa pagdesisyon, matud pa sa DOH.
Sa gipalapdan nga kampanya, himuon nila ang pagbakuna sa mga lugar nga daghang tawo sama sa mga opisina, terminal, mall ug bisan sa mga eskwelahan isip vaccination sites tungod sa tumong niining hingosgan ang 50 porsyento nga target nga populasyon batok sa Covid sulod sa unang 100 ka adlaw sa administrasyong Marcos.
Sa paglusad sa kampanyang gitawag nga “PinasLakas” niadtong Martes, Hulyo 26, miingon si DOH Kalihim Maria Rosario Vergeire nga kini magpaduol sa mga bakuna sa mga tawo ug mapadali ang paghatag ug booster shots samtang nagsugod na usab og saka ug balik ang mga kaso sa Covid. Tinguha sa maong kampanya nga maghatag ug booster shot sa dili moubos sa 23,840,032 sulod sa tulo ka buwan.
