Sinulat ni Elvira Bongosia
Permanente na ang validity sa birth, death, ug marriage certificates nga ginaisyu sa Philippine Statistics Authority (PSA) ug sa gisundan niini nga National Statistics Office (NSO) bisan unsa paman ang date of issuance niini.
Sa transmittal letter kang Senate President Juan Miguel Zubiri niadtong Lunes, Agosto 1, 2022 gipahibalo ni Executive Secretary Vic Rodriguez nga “nag-lapse into law” niadtong Hulyo 28, 2022 ang balaod nga nagtinguha og permanent validity sa mga dokumento.
Nakatakda kining mahimong Republic Act No. 11909, nga opisyal nga naghatag ug permanent validity sa birth, death, ug marriage certificates.
Gitakda sa balaod nga ang birth, death, ug marriage certificates mahimong permanently valid hangtod ang maong mga dokumento “intact, readable and still visibly contains the authenticity and security features.”
Nakalatid usab sa bag-ong balaod nga kinahanglang ilhon ug dawaton ang tulo ka sertipiko sa tanang buhatan sa gobyerno ug pribadong, nga nag-require ug pagsumite sa mga dokumento isip pamatuod sa pagkatawo ug legal status.
Sa wala pa kini mahimong balaod, gi-require sa mga buhatan sa gobyerno ug pribado ang indibidwal nga magpakita og bisan unsa sa tulo ka dokumento nga gikuha unom ka buwan sa dili pa isumite.
Kadaghanan sa mga opisina nagpatuman ug six-month validity requirement alang sa pagduso sa tulo ka sertipiko tungod sa pagbag-o bag-ong kolor sa security paper.
Ang kinsa mang molapas niining balaod posibleng mabilanggo gikan usa ka buwan ug usa ka adlaw hangtod unom ka buwan, ug pamultahon ug dili moubos sa P5,000 ug dili mulapas sa P10,000, o pareho nga pagkapriso ug multa.
Samtang ang mga empleyado usab sa gobyerno nga dili mosunod sa balaod kasamtangang madiskwalipika sa posisyon.
