Sinulat ni Elvira Bongosia
Gidasig ni Presidente Ferdinand “Bongbong” Marcos Jr. ang mga local government units sa pagkonsiderar sa public-private partnership (PPP) isip paagi sa pagpondo sa mga proyekto.
“I think this is the way forward, and I encourage all our local government units (LGUs) to be open to the possibilities of PPPs and to have private-public partnerships, especially in your areas,” pahayag ni Marcos sa League of Cities of the Philippines atol sa tigom sa Malacañang niadtong Agosto 2, 2022.
Gipasiugda sa Presidente nga ang digitalization adunay dakong bahin sa PPP, ilabina sa pagduso sa economic recovery ug digital transformation sa Pilipinas.
Giawhag usab niya ang mga local chief executives nga mahimong “driving force” aron mapalambo ang pagbag-o sa ekonomiya sa nasud.
Atol sa maong tigum, gibutyag usab sa Pangulo nga nakadawat siya ug mga tanyag gikan sa ubang mga nasud aron pondohan ang mga dagkong proyekto, lakip ang official development assistance (ODA) ug mga joint venture.
Gawas sa pagduso sa digitalization, gipasiugda ni Marcos nga ang iyang administrasyon magbutang usab ug dugang nga pagtagad sa imprastraktura.
