Sinulat ni Rey Anthony Chiu
Mikabat pa sa 63,600 ka Bol-anon nga banay nga aktibong nakabenepisyon sa Pantawid Pamilyang Pilipino Program (4Ps) ang nag-unang programa sa kagamhanan nga nagtabang sa paggahum sa mga kabus nga banay.
Kini maoy gipaambit ni Charo Poligrates, opisyal sa Department of Social welfare and Development (DSWD) ug focal person sa 4Ps.
Dugang niya, may 267 na ka banay usab ang mitapos na sa pagdawat sa hinabang nga may pataban nga mga kondisyones, sa rason nga miumento na ang ilang kahimtang ug kaya na nila nga mangita ug kapaninguhaan sa pagkaon ug aron makalahutay.
Niining tuiga usab, padayag sa opisyal nga may 10 ka banay nga Bol-anon nga gitaktak sa 4Ps tungod sa pagsupak sa mga kondisyones nga pataban aron magpadayon ang pagdawat sa hinabang.
Ang kondisyones sa 4Ps naglakip sa pamilya nga kabus nga may 0 ngato sa 18 anyos, nga kinahangalng kining mga bataa paeskwelahon, may mabdos ug tiguwang nga walay pangita, pag-paeskwela ug kinahanglang moabut sa 85% sa tanang adlaw klasehan ang natambongan, regular nga pagbisita sa rural healt units sa mabdos ug mga bag-ong nanganak alang sa pre-natal ug post natal nga serbisyo ug pagpasubay sa mga bata sa ilang kasanihan, sama sa pagpurga, timbang ug paspasunod sa saktong nutrisyon.
Gikinahanglan usab sa banay nga regular nga motambong sa Family Development Sessions nga gilagda sa 4Ps.
Kong dili makatuman niini ug mapamatud-an sa DSWD nga wala magtuman sa mga kondisyones, rason na kini nga tangtangon sa listahan sa mga makabenepisyo.
Sa laing bahin, butyag ni Poligrates nga gikan sa 2009 ngadto na sa 2022, miabut na sa 14,198 ka banay ang wala na sa listahan sa tabanganan sa gobernao pinaagi sa serbisyo niini.
Daghan hinuon sa nahi-apil sa 14,198 ang natangtang kay wala na silay mga bata nga nag-edad ug 0 ngadto sa 18, walay buntis ug walay senior citizen sa balay.
May mga natangtang usab tungod kay nagpabuyag ug wala motuman sa mga kondisyones, dason ni Poligrates.
Hinuon, iyang gipasalig nga s amga nangatangtang, wala niiniy banay nga may nag-eskwela pa nga bata, nga tuyo gayud nga tabangan sa kagamhanan.
