Sinulat ni Elvira Bongosia
Gikumpirmar sa Philippine Postal Office (PHLPost) nga usa ka scam ang usa ka quiz game, nga nikatap karon sa social media.
Sa post sa ahensya sa ilang official page, gipasidan-an niini ang publiko ug miingon nga wala sila manghatag ug pinansyal nga tabang o bisan unsang may kalabutan nga programa sa pagkakaron.
Dugang pa sa ahensya, mahimong magbaton ug akses ang mga scammer sa mga personal nga impormasyon nga pangayuon sa website sa higayon nga i-click ang link.
Pahinumdom pa sa PHLPost, dili gayud buhaton sa ilang ahensya ang motawag, mag-text o mag-email, ug mangayo ug personal nga impormasyon o mag-request ug bayad o magpa-click ug bisan unsang email link, aron maka-claim ug bisan unsang package.
Nipagawas ug public announcement ang PHLPost human sa nanggawas nga link nga gipang-share karon sa social media, diin kinahanglan lamang motubag ug upat ka pangutana, ug adunay kahigayonan nga makadaog ug P7,000 nga ayuda ug ma-claim lamang kini kun ma-share ang link sa ubang tawo.
