Sinulat ni Elvira Bongosia
Mohatag ang Department of Education (DepEd) ug cash allowance nga P5,000 sa tanang magtutudlo sa pampublikong tunghaan.
Kini ang gipahibalo sa tigpamaba sa DepEd nga si Michael Poa sa usa ka joint press conference kauban sa Office of the Vice President.
Matud pa ni Poa nga makatabang kini sa pagbalik sa mga magtutudlo sa mga eskwelahan.
“Lahat po ng teachers makakatanggap. Ibababa po ‘yan, I think doon sa school’s divisions — I’ll confirm — pero lahat po ay makakatanggap,” matud pa ni Poa.
Giklaro ni Poa nga kining dugang pinansyal nga ayuda lahi sa Maintenance and Other Operating Expenses (MOOE) sa mga tunghaan.
Matud pa usab niini nga ang chalk ug ubang mga kinahanglanon sa classroom kinahanglang kabahin sa MOOE.
Ang P5,000 nga allowance dugang nga hinabang lamang sa mga magtutudlo, ilabi na kong nagkinahanglan sila ug pundo alang sa internet connection ug uban pa.
Mokabat sa P3.7 bilyones nga kantidad sa supplemental MOOE ang na-download alang sa tanang tunghaan sa tibuok nasod aron masangkapan pag-ayo sa pagbalik sa mga estudyante sa in-person nga klase, matud pa ni Poa.