Sinulat ni Dave Albarado
Ang Department of Education (DepEd)-Bohol division adunay 117 ka mga bag-ong ge-hire nga magtutudlo.
Apil kini sila sa 10,000 ka mga bag-ong magtutudlo nga gelaraw nga e-hire aron idugang sa hugpong sa mga magtutudlo sa maong ahensya. Ang pagpang hire hangtud pa sa tuig 2023, sumala pa aa mga taho.
Sumala ni Dr. Danilo Gudelosao, ang hepe sa Schools Governance Operation sa DepEd-Bohol division, ang priority sa mga e-hire nga bag-ong magtutudlo mao ang mga kanhi overseas Filipino workers (OFW), mga scholar sa Department of Science and Technology (DOST) ug mga benepisyaryo sa Pantawid Pamilyang Pilipino Program kun 4Ps.
Ang mga OFW apil sa re-integration program nga gitawag nga “Sa ‘Pinas, Ikaw ang Ma’am/Sir” kun SPIMS.
Sa maong programa, ang mga OFW nga nakapasar sa Licensure Examinations for Techers (LET), mahimong mga magtutudlo sa mga publikong tunghaan nga gidumala sa DepEd.
Ang DepEd sa Manila ang nagbuot sa mga OFW nga e-hire ubos sa maong programa, matud sa mga taho.
Sa 117 ka mga bag-ong mga magtutudlo, 40 ang mga OFW, 75 ang DOST scholars ug 2 ang 4Ps scholars.