Sinulat ni Elvira Bongosia
Awtomatikong suspendido na dayon ang klase sa tanang lebel sa basic education, online ug in-person sa tanang mga lugar nga adunay deklarasyon nga “typhoon, flood o rainfall warning” nga ipagawas sa Philippine Atmospheric, Geophysical, and Astronomical Services Administration (PAGASA).
Kini ang nakalatid sa bag-ong guidelines nga gipagawas sa DepEd kalabot sa kanselasyon o suspensyon sa klase ug trabaho sa eskwelahan pag-abot sa bagyo,
kusog nga ulan ug pagbaha.
Sa panahong adunay bagyo, ang in-person ug online classes sa tanang lebel, awtomatikong kanselado sa mga eskwelahan sa mga local government units (LGUs) nga adunay Tropical Cyclone Wind Signals (TCWS) 1, 2, 3, 4 o 5 nga ipagawas sa PAGASA.
Kun ang TCWS gipagawas sa panahon nga ang klase nagsugod na, angay nga undangon dayon sa eskwelahan ang klase ug trabaho ug paulion dayon ang tanan sa ilang panimalay, kun luwas ra kining himuon.
Obligado usab ang eskwelahan nga ipabiling luwas ang mga estudyante ug mga kawani niini sulod sa lawak tulunghaan kun ang pagbyahe dili na luwas.
Ang Local Chief Executive (LCE) ang mohukom sa kanselasyon o suspensyon sa klase sa mga higayong kusog ang hangin partikular o tanang lugar sa LGU apan dili tungod kay adunay bagyo.
Alang usab sa heavy rainfall o grabeng pagbunok sa ulan, ang in-person o online classes sa tanang lebel awtomatikong kanselado sa mga eskwelahan nga naa sa mga LGUs nga may gipagawas nga Yellow, Orange ug Red Rainfall Warning sa PAGASA.
Kung ang Warning gipagawas sa panahon nga ang klase nagsugod na, awtomatikong undangon sa eskwelahan ang klase ug trabaho ug paulion dayon ang mga estudyante ug kawani niini sa ilang panimalay, kun kini luwas pa gihapon nga himuon.
Samtang ang mga eskwelahan obligado nga ipabiling luwas ang mga estudyante ug mga kawani niini sulod sa eskwelahan kun ang pagbyahe dili na luwas.
Ang LCEs pa gihapn ang magdesisyon sa kanselasyon o suspensyon sa klase sa higayong adunay “torrential rains” sa partikular o tanang lugar sa LGUs apan walay gipagawas nga Heavy Rainfall Alert gikan sa PAGASA.
Sa panahon usab sa pagbaha, ang in-person ug online classes sa tanang lebel awtomatikong kanselado sa mga eskwelahan sa LGUs nga adunay gipagawas nga Flood Warning ang PAGASA.
Kun ang Flood Warning gipagawas sa panahon nga ang klase nagsugod na, suspensohon dayon sa eskwelahan ang klase ug trabaho ug paulion dayon ang tanan sa ilang panimalay, kun luwas na kining himuon.
Obligado usab gihapon ang mga eskwelahan nga ipabiling luwas ang mga estudyante ug kawani sulod sa eskwelahan kun ang pagbyahe dili na luwas.