Sinulat ni Elvira Bongosia
Mitambong si Presidente Ferdinand Marcos Jr. sa pagsaulog sa Philippine Nursing Association 100th Foundation Anniversary ug 56th Nursing Week sa dakbayan sa Manila.
Sa iyang pakigpulong, ang Presidente mitawag sa mga nars isip mga bayani nga matud niya nagpanindot sa ngalan sa Pilipinas sa tibuok kalibutan tungod sa ilang serbisyo ilabina sa panahon sa Coronavirus disease (Covid)
pandemic.
Kinasingkasing usab nga gipasalamatan sa presidente ang mga nurse nga matud pa niya dako ug papel mao nga naka-recover siya dihang naigo siya sa grabeng Covid niadtong Marso 2020.
Gihatagan ug gibug-aton sa presidente nga tungod sa sakripisyo sa mga nars taliwala sa peligro, nakalahutay ang nasud sa hagit sa pandemya.
Gipasalig sa presidente nga magpadayon ang mga benepisyo nga angay alang sa mga health worker.
Gani, niingon siya nga kinatibuk-ang P25.82 bilyon ang gipagawas alang sa hazard duty pay, Covid death and sickness compensation, meals accommodation ug transportation allowances, life insurance, special risk allowance ug One COVID-19 allowance alang sa mga health workers.
Nagtuo ang presidente nga kuwang pa ang nasangpit nga mga benepisyo busa iyang gipasalig nga mangita siya ug daghang paagi aron mapakita ug mabati ang pasalamat sa katawhan sa atong mga health workers.
Gipasalig sa presidente nga bukas ang iyang buhatan sa dayalogo sa mga isyu nga giatubang sa mga nars ug mga kaalyado nga propesyon sa panglawas. Gusto usab sa presidente nga mahimong balaod ang Philippine Nursing Practices Act. Lakip sa tukion sa gobyerno mao ang disparity sa sweldo sa mga nurse sa pampubliko ug pribadong tambalanan ingon man ang dili patas nga pag-apod-apod sa mga nars sa lainlaing lugar sa nasud.