Sinulat ni Elvira Bongosia
Gipahibalo sa Land Transportation Franchising and Regulatory Board (LTFRB) niadtong Huwebes, Setyembre 22, 2022 nga mahimo nang mangayo ang mga public utility vehicle operators ug updated nga fare matrix isip pagpangandam sa nagsingabot nga pagsaka sa plitehan.
Sa usa ka Facebook post, gipahayag sa LTFRB nga kinahanglang ipaskil na ang fare matrix sulod sa sakyanan isip kabahin sa ilang fare increase order.
Alang sa mga operator nga mokuha ug fare matrix, kinahanglang magdala ug pinakabag-ong original receipt/certificate of registration sa sakyanan gikan sa Land Transportation Office, franchise verification, kopya sa provisional authority o certificate of public convenience ug office receipt of payment.
Gipahibalo usab sa LTFRB nga bukas ang ilang buhatan aron modawat ug mga request sa Fare Matrix/Guide gikan Lunes hangtod Sabado.
Matud pa nga mahimong modiretso ang PUV operators sa window 13 o 14 alang sa payment assessment, magbayad sa cashier ug modiretso sa window 12 aron magpasa og documentary requirements.
Gipahibalo usab sa buhatan nga may 2 ka adlaw nga paaboton sa dili pa madawat o makuha ang fare matrix.
Kahinumdoman nga sugod Oktubre 3, 2022 adunay pagsaka sa plitehan sa mga pampublikong sakyanan.
Nagpahinumdom ang LTFRB nga bawal pa nga mupasaka ug singil sa plitehan hangtod dili pa moabot ang takdang adlaw nga gigahin nila alang niini.