Sinulat ni Elvira Bongosia
Gipahibalo sa Philippine Health Insurance Corporation (PhilHealth) niadtong Biyernes, Setyembre 23, 2022 nga ipadayon niini ang coverage sa Coronavirus disease (Covid) test alang sa overseas Filipino workers (OFWs) nga mobalik sa nasud.
Gipahayag sa PhilHealth nga magpagawas sila ug specific guidelines pinaagi sa usa ka circular, nga may retroactive effect sa Agosto 31, 2022.
Una nang gipagawas sa PhilHealth ang Circular 2022-0018 aron iapil ang Covid testing coverage sa Department of Health Memorandum No. 2022-013 o ang “Updated Guidelines on Quarantine, Isolation and Testing for COVID-19 Response and Case Management for the Omicron Variant.”
Sa maong circular, tubagon sa Philhealth ang bayad sa reverse transcription – polymerase chain reaction (RT-PCR) test, plate-based o cartridge-based, sa mga mosunod nga priority groups: A1 (healthcare workers); A2 (seniors), A3 (people with comorbidities and high risk for severe disease), ug tanan gawas lang sa A1, A2 ug A3 – nga may sintomas sa Covid.
Tubagon sa Philhealth ang plate-based (RT-PCR) tests gikan P800 hangtod P2,800 ug cartridge-based PCR gikan P500 hangtod P2,450, depende sa available nga serbisyo.
Ang COVID-19 testing package available usab sa mga miyembro ug kwalipikadong dependents sa 230 accredited laboratories sa tibuok nasud.
Gitumbok sa circular nga wala girekomenda ang Covid testing alang sa screening sa asymptomatic nga mga indibidwal ug asymptomatic close contacts.
Gi-abisuhan ang asymptomatic individuals nga bantayan ang mga sintomas. Kun gikinahanglan ang testing, kinahanglang ipahigayon kini sa dili moubos sa lima ka adlaw human ang katapusang exposure.
Giklaro sa PhilHealth nga ang symptomatic patients nga sakop sa COVID-19 Home Isolation Benefit Package ug COVID-19 Community Isolation Benefit Package providers nahisulod sa facility-based rapid antigen test (RAT) package nga nagkantidad og P500.
Mahimo usab gamiton sa mga pasyente ang RAT package kun na-admit sa accredited hospitals, infirmaries, ug dispensaries.