Paniguro sa DOH: Generic nga mga tambal, epektibo sama sa mga branded 

Sinulat ni Elvira Bongosia

Giseguro sa Department of Health (DOH) sa publiko nga ang generic nga mga tambal sama ra nga luwas ug epektibo sa mga branded nga kaatbang niini.

Gipasabot ni Department of Health officer-in-charge Maria Rosario Vergeire sa publiko nga angay usab masabtan sa mga tawo nga branded man o unbranded generics, pareho lang ang safety ug efficacy niini basta adunay clearance o otorisasyon gikan sa Food and Drug Administration (FDA) alang sa partikular nga produkto.

“People have to understand also whether it be branded or unbranded generics, pareho lang ang safety, efficacy,” matud pa ni DOH Officer-in-Charge Maria Rosario Vergeire sa  usa  ka press briefing.

Giseguro usab sa DOH nga ang mga tambal nga generics sa merkado taas ang kalidad.

Samtang matud pa ni DOH Pharmaceutical Division Director Dr. Anna Melissa Guerrero, ang departamento naggamit usab ug generics nga mga tambal sa ilang mga programa.

Pahinumdom pa sa DOH, kinahanglan lamang nga sa mga lisensyado ug awtorisado sa FDA nga mga drugstore mopalit ug tambal tungod kay matud pa dili sila mahimong magbaligya ug nga counterfeit ug pekeng mga tambal.