Sinulat ni Elvira Bongosia
Sa usa ka mahinungdanong lakang sa pagpakusog sa mga inisyatiba sa gobyerno batok sa mga scam ug krimen nga nahimo pinaagi sa text ug online nga mga mensahe, gilagdaan ni Presidente Ferdinand “Bongbong” R. Marcos Jr. ang Subscriber Identity Module (SIM) Card Registration Act adlaw’ng Lunes, Oktubre 10, 2022.
Tumong sa bag-ong balaod nga magbaton ug pagkamay tulubagon o accountability sa paggamit sa SIM cards ug aron malikayan usab ang mga pagpangilad sa SMS.
Ubos sa SIM Card Registration Act, tanang public telecommunications entities (PTE) o direct sellers gimanduan nga pangayuan ang SIM card user ug valid identification document nga adunay litrato.
Tanang impormasyon nga ihatag sa user sa pagparehistro sa SIM card himuong confidential.
Ang mga PTEs, agents o employees nga molapas niini pahamtangan ug multa nga gikan P500,000 hangtod P4 milyon kun magbaton ug breach of confidentiality.
Samtang ang mga mobalibad nga iparehistro ang ilang SIM nga walay balidong rason mahimong mapahamtangan ug multa nga P100,000 hangtod P1 milyon.
Gimanduan lamang ang mga telco nga i-disclose ang full name ug address nga gipangayo sa SIM card registration kun adunay ipagawas nga subpoena o court order.
Mahimo usab nga mangayo ug impormasyon ang mga law enforcement agencies kun magpahigayon sila ug imbestigasyon sa gihimong krimen gamit ang cellphone ug SIM cards.
Gihimo ang ceremonial signing sa Ceremonial Hall sa Malacañang nga gitambungan nila Bise Presidente Sara Duterte, Senate President Juan Miguel Zubiri, House Speaker Martin Romualdez, uban pang mga magbabalaod ug mga opisyal gikan sa Presidential Legislative Liaison Office.