Sinulat ni Elvira Bongosia
Dungan sa wala ug tuo nga mga pagsuspenso sa mga klase, gi-awhag sa Department of Education (DepEd) ang mga local government unit (LGUs) nga likayan ang wala kinahanglana nga pagsuspenso sa mga klase aron mapataas ang pagkaayo sa pagkat-on.
Sa usa ka pahayag nga gipagawas sa DepEd miingon ang ahensya nga masuspinde lamang ang klase sa mga tunghaan kun adunay public emergency, severe weather disturbances ug uban pang kalamidad.
“The DepEd aims to not only bring learners back to school, but also institute measures to maximize learning recovery,” matud pa sa pahayag sa DepEd.
Gipahayag sa ahensya ang ilang dakong pasalamat sa mga LGUs, partner agencies gikan sa National Government , Non-Government Organizations (NGO), ug sa ilang mga stakeholders, sa pagsuporta ug pagrespeto sa ilang baruganan batok sa wala gikinahanglan nga pagkansela sa mga klase. ug ang paggamit sa ilang mga eskwelahan isip billeting area alang sa mga panghitabo nga walay kalabotan sa curriculum.
Taliwala sa nagkalain-laing mga hagit, nipasalig ang DepEd nga nagpabiling lig-on ang ilang tinguha nga mahatagan ug accessible ug dekalidad nga basic education ang tanan.
Apan matud pa sa ahensya nga dili kini nila mahimo nga mag-inusara mao nga gi-awhag nila ang tanan nga tabangan ang ilang mga estudyante nga makabangon gikan sa learning losses ug pagsuspenso sa mga klase sa panahon lamang sa mga emerhensya sa publiko, grabe nga kasamok sa panahon ug mga kalamidad.