Sinulat ni Elvira Bongosia
Nipasidaan ang Securities and Exchange Commission (SEC) sa publiko batok sa pagbutang ug salapi o pag-invest sa bag-ong pamaagi nga giingong dali nga makadato nga gitanyag sa usa ka kumpanya nga ang pangalan mao ang BitdefiHub Advertising.
Matud pa sa gipagawas nga advisory sa SEC, ang maong kumpanya nag-solicit sa mga mamuhunan sa saad nga paspas nga pagdato, bisan kini nga kumpanya walay lisensya ug permit.
Giingong mosaad ang maong kumpanya sa ilang investors ug daku nga pagbalik sa ilang ibutang nga salapi o halos 20% matag adlaw nga tubo, nga makonsiderar nga ‘red flag’ alang sa ahensya.
“In view thereof, the public is advised not to invest or stop investing in any investment scheme being offered by BITDEFI and exercise caution in dealing with any individuals or group of persons soliciting investments or recruiting investors for and on behalf of BITDEFI,” matud pa sa Enforcement and Investor Protection Department sa SEC sa maong advisory.
Apil sa pangdani sa BitdefiHub matud pa sa SEC mao ang pag-invest sa publiko sa kumpanya sa kantidad nga P300 lamang o labaw pa, hulip sa 20% nga kita matag-adlaw.
Ang mga mamuhunan nga nag-parking sa ilang kwarta sulod sa 10 ka adlaw mobarug nga doblehon ang ilang kita pinaagi sa Bitdefi platform, sigun pa sa SEC.
May tanyag usab kining referral bonus nga 25% ug registration bonus nga P50.
Matud pa sa SEC nga paglapas ang maong scheme sa Section 8 sa Republic Act No. 8799, o ang Securities Regulation Code.
Dugang pa sa ahensya nga base sa mga rekord nga ang tag-iya sa BitdefiHub nga si Mark Guevarra Mercado, gihatagan ug sertipiko sa pagparehistro sa ngalan sa negosyo sa Department of Trade and Industry (DTI). Apan bisan pa niini, wala kini narehistro isip usa ka korporasyon o pakigtambayayong sa Komisyon. Tungod niini, dili kini maka-apply alang sa gikinahanglan nga lisensya nga magtugot niini sa pagpangayo ug mga pamuhunan gikan sa publiko, pasidaan pa sa SEC.