Editor’s Note: This article is presented in Visayan, the original language used by an observer/writer named Ven Rebo Arigo. This article talks about Balilihan ‘s water dream soaring higher despite the challenges that are cropping up along the way.
We are publishing the article in its original language to let the readers feel at home with the situation of the observer/writer better.
“Sama sa kusog nga tinubdan, abunda sa maayong hinungdan ang pag-ugmad sa sistema sa panubig sa Balilihan LGU.
Kabahin sa pagsamok sa proyekto ang reklamo sa Ombudsman sa usa ka molupyo nga notadong tigsaway ug kontra sa pulitika sa pamunoan sa lungsod.
Natural ug normal nga proseso sa prosekusyon nga kuhaag tubag ug paminawon ang lungsod aron matimbang ang matuod.
Ang samang reklamante nisuwat sa National Water Resources Board (NWRB) aron ipakanselar ang water permit sa kaugalingon niyang lungsod!
Sa bisan asa nga komunidad, ang responsableng sakop mosuporta sa mapuslanong kalihukan sa local government unit (LGU), hiniklin ang pulitikanhong kalainan, way hinungdang kasina ug di makatarunganong kayugot.
Kini ilabina sa programa sa panubig sa lungsod nga esensiyal sa kahimtang ug kinabuhi sa tawo ug ekonomiya karon ug sa pagtunhay sa panahon.
MAO DIAY?
Gawas sa di ikatagong pulitika, ang nireklamo giingong usa sa gustong mosud sa Balilihan ang pribadong negosyanteg tubig nga Richli Corporation, nga buot usab mopakanselar sa permit sa LGU water project.
Kaniadto, usa sa mga tag-iya sa koporasyon ang gitaho nga maoy nigasto sa tapok sa media ug press conference sa pagdagan ni Toloy Evasco sa pagkagobernador sa 2019.
Kaalyado ug lumilihuk sa maong pundok ang nisang-at ug reklamo batok sa LGU, kang Mayor Pureza Veloso-Chatto ug uban pa kalabot sa proyekto sa panubig sa lungsod.
Gidahum nga mas hingusgan ang pagguba sa mga Chatto kay gikataho nga ang samang pundok moatbang sa reeleksyon sa bana sa mayor nga si Kong. Edgar Chatto sa sunod nga piniliay.
WAY SALA
Ang kagamhanan ug liderato sa Balilihan way sala ug kasaypanan ngadto sa mga lungsoranon sa ilang paningkamot sa pag-ugmad sa panubig sa mga Balilinhon.
Gikinahanglan, mapuslanon ug gipangayo sa katawhan ang proyekto nga gibuhat, giampo ug gilauman nga molampos ug molungtad sa pagserbisyo hangtud sa paglapas sa umaabot nga kaliwatan.”