Sinulat ni Rey Anthony Chiu
Gihimoan karon ug paagi nga mas mailhan ang Bohol gawas sa iyang gibantug nga dive spots sa Panglao, Balicasag, Pamilacan, Cabilao, Anda, Guindulman ug Danahon, pinaagi sa ipahigayon nga Bohol Loop Dive Expo (BholDEX) sa sunod buwan.
Pinaagi sa Bholdex, naglaum ang mga tigpasiugda nga mapahibalik pagpakita ang mga buhilaman sa dagat nga maoy unang nakapaaghat sa mga European divers nga mosawom sa kadagatan dinhi.
Pinaagi usab sa Bholdex, kauban sa kagamhanang probinsyal sa Bohol ug sa Panglao Association of Dive Operators, mapakita nga dili lamang ang nahaunang mga inila ug bantugang dive sites nga mahimong nasawaom na sa mga divers, kong dili, lakip na usab sa bag-ong natumbok nga mga dive sites sa 12 ka mga kalungsuran nga nahilakip niining loop karon.
Niini, ikaduso na usab pagbalik ang Bohol nga nag-unang dive destination sa nasud, samtang ang expo magtanyag usab sa mga labing maayong tanyag sa mga kalungsuran diin himoon ang mga dives.
Gawas sa mga divers, gitumong usab sa Bholdex ang pag-aghat sa mga underwater photographers sa pagkaplag sa lambo nga buhilaman sa kadagatan isip maoy sunject sa kompetisyon atul sa dive expo nga mahitabo gikan sa Abril 13 ngadto na sa Abril 30.
Sa Loop Dive Expo, gawas sa sunod sunod nga mga dives, mga kalihukan nga magtanyag ug pagpasabut sa kinaiya sa kadagtan ug mga kalihukang ekonomikanhon nga mahitabo sa mga kalungsuran nga apil sa dive loop.
APil niini ang mga eco-tours, dive seminars, one stop shop alang sa pagparehistro sa mga tourism stakeholders nga may kalihukan sa dagat, coral restoration ug transpanting, business sessions, photo exhibits, dive fairs, fun dives, freediving ug SCUBA ug socials.
Us aka underwater photography ang unod sa labing kulbahinam nga kompetisyon nga gilantaw usab sa PADO nga makatabang sa pagpagawas sa Bohol sa international nga eksena dala sa mga hulagway unya nga makuha sa kompetisyon.
Ang unang BHOLDEX mahitabo sa Mabini, ANda, Guinduman, Duero, Jagna, Garcia Hernandez, Dimiao ug Lila samtang may mga kalihukan usab nga mahitabo sa Candijay, Dimiao, Tagbilaran City, Panglao ug Ubay.
Gipaabut usab sa mga tigpasiugda nga mahimo pa gihapon ang ikaduhang loop dive circuit sa lain nga usab nga mga kalungsuran sa sunod nga mga buwan.
