MAKAADLAWNAN, Nagpabiling nagduty ang Quarantine Inspectors sa Bohol kinsa personal nga ming hiling sa mga bagahe sa mga pasahero aron maseguro nga walay gitago didto nga chicharron, chorizo ug longganiza nga gikan sa Sugbo kay basig mag dala nga kagaw nga makapanakod. (Hulagway gikan sa PIABohol)
Sinulat ni Rey Anthony Chiu
Gimanduan ni Gobernador Erico Aristotle Aumentado ang mga natungdang ahensya ilabi na sa mga nagpatuman sa balaod ug mga empleyado niini, apil ang local nga mga kagamhanan sa pagpatuman sa Provincial Ordinance No. 2022-11 partikular sa mga gidili sa ordinansa.
Pinaagi sa Executive Order No 14 nga gipirmahan sa gobernador Marso 26, 2023, gimandu sa gobernadora ang pagpaseguro nga napatuman ang pagdili sa pagsulod sa buhi nga baboy, karne, o girposeso nan ga karne sa baboy sama sa chorizo, longaniza, chicharron ug ang pagkolekta sa multa sa mga makalapas sa ordinansa o ang pagpasaka sa sumbong sa korte ngadto kang si bisan kinsa nga dili mobayad sa multa.
Gimandu usab sa gobernador ang pag-dakop ug paggaid sa mga sakyanan sama sa mga sakyanan nga gikargahan ug gigamit sa palusot sa gidili nga karne.
Kining tanan aron madepensahan sa mga tinugyanan ang mga pantalan aron did-an gayud ang pagsulod sa gikahadlokan nga African Swine Fever (ASF) nga nikanit na sa silingan nga lakawigan sa Sugbo.
Subay usab sa ordinansa, dakpon ang mga sakyanan nga de-motor, bangka, motorized pump boats, speed boats ug susamang sakyanan sa dagat nga gigamit sa pagpalusot sa gidili nga mga karne.
Ang bag-ong ordinansa napagawas human sa namatikdan nga mga kaso sa pagkasakop sa mga gipalusot nga karne ug niluto nga karne diha sa mga pantalan ilabi na kon gikan sa Sugbo ug mga apektadong lugar, human gipagawas ang Provincial Ordinance No 11, series of 2023, apan wala tig-isyu ug resibo sa LGU, ilabi na kon ang madakpan mosakay sa barko nga kaadlawon modunggo.
Nagpahimutang usab ang Bohol sa mga quarantine inspectors nga nagduty adlaw ug gabii sa matag pantalan, mga tighugas sa mga sakyanan nga mosulod sa Bohol, ug mga iro nga maoy magsimhot sa mga bags aron ilhon kon may karne ban ga dala.
Segun sa Ordinansa, ang masakpan nga magdala sa karne nga baboy, o niluto na o giproseso, gawas nga embargohon ang karne, multahan usab ang nagdala sa P1,000 sa unang higayon, P2,500 sa ika duha ug P5,000 sa ikatulong higayon apil na ang posibilidad sa pagkabilanggo segun sa hukom sa korte.