Ni: Jes B. Tirol
Kiling 16, 2023
Ang Kataposang Gikaón ni Hesukristo Dinhi sa Yutà
Pasiuna
Kun mangutana ka sa usa ka Kristohanon kon unsa ang kataposang gikaon ni Ginoong Hesukristo samtang dinhi pa siya sa yútà, ang lagmit nga itubag mao ang Kataposang Panihapon
ni Ginoong Hesukristo kauban sa iyang mga tinun-an.
Kabahin sa Kataposang Panihapon, ang nahisulat sa Balaang kasulatan mao nga ang ilang
gikaon mao ang alak ug tinapay o pan.
Dili kadto mao ang kataposang gikaon ni Ginoong Hesukristo. Atong basahon ang Balaang Kasulatan aron natò masayran.
Ang Dagat sa Teberias
Human sa pagkabanhaw ni Ginoong Hesukristo nagpabilin pa siya dinhi sa kalibutan. Walâ siya mokayab dayon sa langit.
Ang tibuok anib 21 sa Ebanghelyo ni San Juan, nagahisgot sa hitabò didto sa dagat sa
Terberias diin nagpakítà si Hesukristo sa iyang mga tinun-an samtang nangisda sila.
Tudling 4, “Sa pagbanagbanag na, nagtindog si Jesus didto sa lapyahan, apan ang mga
tinun-an walâ makaila nga si Jesus diay kadto. Miingon si Jesus kanila, “Mga kabataan, nakakuha ba kamo? Mitubag sila kaniya, “Walâ gayód”. Miingon siya kanila, “Itaktak and inyong pukot sa tuo sa sakayan, ug makakuhâ kamo.”
Busâ ila tuod nga gitaktak, ug karon wala na sila makahimo pagbira niini tungod sa
kadaghan sa mga isda.
Ang ubang mga tinun-an miduol ginamita ang ilang gamay nga sakayan aron pagtabang
pagbira sa mga isdà. Matod pa sa Balaang Kasulatan, 153 ka buok ang mga isdà. Walâ na kita tug-ani nganong giihap ni San Juan ang mga isda.
Sa pagdangat sa mga tinun-an didto sa malá nga bahin sa baybayon, nakakita na sila og
kalayo ug baga nga aduna nay gisugba nga isdà ug mga pan or tinapay.
Ug si Jesus miingon kanila, dad-a ang mga isdà nga inyong nadakpan. Si Jesus miingon
kanila, ngari na kamo aron mangaon. Ug walay bisag usa sa mga tinun-an nga nakaáko sa
pagpangu-tana “Kinsa ka man?” tungod kay nasayod sila nga siya ang ilang magtutudlo.
Niining hitabóa, tataw kaayo nga si Ginoong Hesukristo ang naghatag sa pagkaon nga
sinugbang isda ug tinapay nga maoy gikaon sa mga tinun-an ug kang Hesukristo.
Ang Kataposang Pagkaon
Ang kataposang pagkaon ni Ginoong Hesukristo atong mabasa sa basahon ni San Lukas,
Anib 24, mga tudling nga 36 hangtod sa 53.
Tudling 36, “Ug samtang sila naghisgot, si Ginoong Hesukristo, sa iyang kaugalingon
nibarog sa ilang taliwâlà ug niingong “Ang kalinaw maanaa kaninyo.”
Nalisang ang mga tinun-an ug gipakità ni Jesus ang agi sa lansang sa iyang mga kamot ug
tiil. Hikapa ang akong mga samad tungod kay ang diwà (spirit) walay mga unod ug bukog, ug
inyong makità nga aduna ako.
Tudling 41, “Aduna ba kamoy pagkáon?” Ug gihatagan nila siya, si Hesukristo, ug tipik sa sinugbang isdà ug úmo (honeycomb). Gidawat ni Jesus ang sinugbang isda ug ang umo ug iyang gikaon dinhà sa ilang atubangan.
Human sa diyutay nga pagwali, gidala sila ni Ginoong Hesukristo didto ss Betaniya ug
nagpakita si Jesus sa iyang pagkayab didto sa langit.
Unsay Gikaon ni Jesus?
Ang mga Balaang Kasulatan (Holy Bible) sa mga Protestante mao ang hubad nga King
James ug sa Romano Katoliko mao ang hubad sa Douay. Kini silang duruha ka mga hubad lunlon nagsulti sa Basahon ni San Lukas nga ang kataposang gikaon ni Ginoong Hesukristo mao ang “signubang isda ug úmo o udlan o panal (honeycomb). (Dinhi sa Bohol, ang honeycomb gihubad nga “úmo”; didto sa Sugbo, ila kining gitawag ug “udlan”; sa Kinatsilà, gitawag kini ug “panal”).
Apan sa mga bag-ong hubad sa Balaang Kasulatan, nawagtang na ang “úmo (honeycomb)”. Tingali nagtuo ang mga Amerikano nga naghubad sa Binisayà nga mahimong wad-on ang úmo.
Sa ilang dapit man gud, mahimong mokaon nga lunlon sud-an ug walay kan-on o lútò nga ibugti. Lisod katuohan sa usa ka Bol-anon nga si Hesukristo nikaon lamang ug lunlon isda o
naglanlan lamang sa sinugbang isda.
Aduna gayod kitayg bugti nga pagkaon nga iubán sa sud-an.