BLCI padayong nangampanya sa Lifeline Rate Discount
Sinulat ni Sheryl B. Paga
Padayon ang agresibong kampanya sa Bohol Light Company Inc. (BLCI) aron palapdan ang pagpahibalo sa daghanang kwalipikadong pamilya ug mga sakop sa Pantawid Pamilyang Pilipino Program (4Ps) aron kini sila marehistro sa lifeline rate program ug aron sila maka-pahimulos ug diskwento sa ilang bayronon sa kuryente.
Ang BLCI, inubanan sa mga tinugyanan gikan sa Energy Regulatory Commission (ERC), Department of Energy (DOE), Department of Social Welfare and Development (DSWD) ug ang atong Local Social Welfare Development (LSWD) deri sa syudad Tagbilaran, nagpahigayon ug caravan kaniadtong Enero 6, 2024 didto sa Tagbilaran City Atrium sugod sa may alas 8 sa buntag hangtud sa alas 12 sa kaudtuhon aron lang gyud mapadangat sa daghang mga customers ang mga kasayuran kabahin sa lifeline rate discount.
Gitinguha gyud sa BLCI nga mapalapdan ang atong registrations ngadto sa mga kwalipikadong makadawat sa benepisyo sa lifeline rate discount. Tungod kini kay strikto nang ipatuman ang maong diskwento sugod karong bulana Enero 2024 basi sa mando sa Repullic Act (R.A.) No. 11552.
Matud pa sa DOE, walay deadline sa registration sa mga kwalipikadong beneficiaries ngadto sa mga Distribution Utilities ug tungod niana ang opisina sa Bohol Light padayon gihapong mudawat sa mga aplikasyon gikan sa atong mga kwalipikado nga konsumidor nga gustong mo-apply sa maong programa.
Usa ka tripartite advisory ang gi-isyu sa (ERC), (DOE) ug (DSWD) niadtong December 29, 2023 ug kini mipadayag nga dunay dakong pagsaka sa gidaghanon sa mga household beneficiaries nga nalista ubos sa 4Ps ang naka-rehistro na sa lifeline rate program ug kini pagasugdan na gayud sa pagpatuman.
Atong ipahibalo sa atong mga konsumidor nga sugod karong January 2024 billing, kadto lamang mga naka rehistro sa lifeline rate program ang padayon nga mahatagan ug diskwento subay sa tripartite advisory sa ERC, DOE and DSWD.
Tungod niini, ang BLCI mag-awhag sa tanang 4Ps beneficiaries ug kadtong anaa sa poverty threshold nga mo-apply sa labing sayo nga panahon.
Alang sa dugang impormasyon ug klaripikasyon, ang mga konsumidor mahimong motawag sa Bohol Light hotline numbers: Landline Nos. (038) 412-3503/ 501-7762 local 101 – for application services; local 103 – for power interruptions; local 107 – for billing matters; and Local 200 – for general information. The mobile phone numbers are: 09318524311, 09223072161, 09318524312, and 09318524310.
Mahimo usab nga ang mga konsumidor magpadala sa ilang mensahe pinaagi sa official messenger account sa BLCI o sa email address at support@bohollight.com.
KALIDAD SA TUBIG GI AMPINGAN SA BOHOL WATER
Makita sa hulagway si Chemical Engr. Camilo Araṅo Jr., ang BWUI Water Quality Head, samtang naghimo siya sa water test sulod sa BWUI laboratory.
Sa pagsiguro nga luwas imnon ang tubig nga gisuply ngadto sa mga konsumidor, ang BWUI mihimo ug masobsob nga kalihokan sa water treatment lakip usab ang monitoring niini. Ang katuyuan niini mao ang pagsiguro sa kalidad sa tubig nga moabot sa tagsatagsa ka mga konsumidor.
Tungod kay ang tanang tinubdan sa Bohol Water gikan man sa ilawom sa yuta o “underground source”, ang treatment niini pinaagi lamang sa chlorine ug wala na kini mag kinahanglan ug makuti o daghan nga stages (proseso) sa water treatment. Dili kini pareha kon ang tinubdan gikan sa “surface water”.
Kini tungod kay ang tubig nga gikan sa ilawom sa yuta, diin ang gilawmon mga 90 meters ang pinakalawom, moagi na ug natural filtration. Dili kini susama sa tubig gikan sa surface water, sama sa sapa, suba, linaw, nga nagkinahanglan gayud ug makuti ang treatment aron pagkuha sa mga kagaw o bacteria.
Ang proseso sa water treatment sa BWUI, nga himoon maka-kaduha sa usa ka semana, nagalakip sa Pre chlorination – usa ka paagi diin sa diha pa lang sa tinubdan o pumping station, ang tubig nga mogawas gikan sa maong deep well moagi na kini ug pre-chlorination process. Samtang anaa pa sa linya, ang maong tubig moagi sa filtration equipment ug human niini himoon na usab ang post chlorination process sa dili pa mosulod sa pundohanan o reservoirs.
Aron sa pagtino ug pag monitor sa kahinloon sa tubig, himoon sa Bohol Water ang senimana nga laboratory test diha sa BWUI laboratory gamit ang mga paramaters sama sa Salinity, Turbidity, Total Disoved Solid (TDS) ug Residual chlorine.
Kini himoon sa mga water samples sa tanang pumping units ug reservoirs.
Pagakuhaan usab ug mga water samples ang maong mga tinubdan matag bulan ug ang paghimo niini, sinaksihan sa mga tinugyanan sa City Health Office (CHO) alang sa laboratory test nga pagahimoon sa Provincial Health Office (PHO) laboratory aron pagsuta sa Bacteriological status sa maong mga samples.
Pinaagi sa mga resulta gikan sa PHO, ang CHO ug ang Municipal Health Office (MHO) sa Corella (sa Pumping Unit [PU] nga anaa sa Corella), mo issue ug Certificate of Potability sa matag source sa water samples. Makaduha sa usa ka tuig nga ang BWUI magpadala usab ug mga water samples ngadto sa mga Departmen of Health (DOH) accredited laboratories sa Cebu ug Dumaguete alang sa Physical-chemical analysis diin ang resulta niini e-submit ngadto sa National Water Resources Board (NWRB) isip pagtuman (compliance) sa mga gikinahanglang buhaton.
Sa laing nga pagkasulti, ang monitoring sa kahinlo sa tubig gihimo gikan pa lamang sa tinubdan sa pumping stations ug gihimo usab kini sa mga pundohanan (reservoirs) sa tubig. Lakip usab nga gimonitor ang kalidad sa tubig nga moabot na sa mga gripo sa mga konsumidor.
Lakip usab nga gikuhaan ug water samples ang pipila ka residential areas nga gi-ila sa water quality section. Ang senimana nga laboratory test sa BWUI laboratory gitumong aron mahatagan ug dinalian nga pagtagad kon adunay problema nga mahinagbuan mahitungod sa kalidad sa tubig sa mga tinubdan.
Mahinungdanon kaayo ang monitoring ug laboratory testing gikan sa mga water samples kay mao kini ang magmatuod sa kalidad sa tubig nga gi supply sa usa ka water provider.
Dili barometro sa maayong kalidad ang pila ka stages (processes) sa water treatment. Paftan-awon gayud ang resulta sa laboratory test tungod kay mao kini ang “output” sa treatment process ug mao usab kini ang gi require sa regulatory agency “in compliance to the Philippine National Standards for Drinking Water (PNSDW)”.
Gipaniguro sa BWUI nga ang tubig nga gisupply ngadto sa mga konsumidor mipasar gayud kini sa mga laboratory testing. Kung mipasar kini, ang buot pasabot niini, luwas kini imnon sa katawhan.
PNP PD Batuan: Unta dunay CCTV mata’g establisemento
Sinulat ni Rey Anthony Chiu
Taliwala sa kakuwang sa kapulisan nga magbantay sa kaluwasan ug pagpanalipod sa katilingban batok sa krimen, may hangyo ang hepe sa tanang kapulisan sa Bohol ngadto sa mga negosyante.
Sa pagsugod sa bag-ong tuig ug panahon nga ting renew sa mga business permits, unta himoon na nga palisiya sa tanan nga munisipyo nga magbaton na ug Closed Circuit Television (CCTV) Camera ang tanan nga may mga negosyo sa kalungsuran.
Didto sa labing bag-o nga tigum sa Provincial Peace and Order Council (PPOC), gibutyag ni Police Senior Superintendent Lorenzo A. Batuan nga ang police to population ratio anaa sa 1:1000 kapin ka Bol-anon.
Kini wala pay labut sa dul-an sa 800 mil ka mga turista ug mga transients nga molabay ug mopalabay sa adlaw dinhi sa Bohol.
Bisan kon ilang gipaningkamotan nga makit-an permi ang kapolisan sa kadalanan aron mapugngan ang paghimo ug sala sa balaud, dili lang usab ang pagpatrolya ang trabaho sa mga pulis, dayag sa hepe sa Kampo Dagohoy ang Bohol Provincial Police Office.
Kini usab nunot sa namatikdan, bisan dili pa ikahingawa, nga pagsaka sa mga kaso sa krimen dinhi sa Bohol sa 2023, kon itandi sa 2022.
Dili gyud maapas pa sa kapolisan ang pagbantay sa tanan, mao nga kondunay CCTV, daku na kini ug ikatabang sa imbestigasyon aron makuha ang dagway ug mga binuhatan sa mga criminal, butyag ni Col Batuan.
Daghan na nga mga kaso sa krimen ang nakit-an sa CCTV ug mas dali nga maresolbar ang kaso, dason pa sa hepe sa Bohol nga taga Danao, Bohol.
Karon nga tingrenew sa mga business permits, unta ipatuman sa mga business and licensing offices sa mga kalungsuran ang pagbaton ug CCTV isip dugang rekisitos ug panalipod sa mga negosyante batok sa mga balhiboon ug kamot.
Ang hangyo ni Col Batuan iyang gipadayag atubangan sa mga mayor nga mingtambong sa unang tigum sa Provincial Peace and Order Council ug Anti Drug Abuse Council alang sa 2024.
Hinuon, gipasalig sa kapolisan nga ang pagsaka sa mga kaso sa krimen, dala sa pas progresibo nga kampanya nga gihimo sa mga tinugyanan sa balaod aron mahipos ang mga criminal ug mahimong luwas ug maayo ang Bohol nga puy-an ug pamuhunanan.
DUGANG PANALIPOD. Mihangyo si BPPO Chief Colonel Lorenzo Batuan sa mga mayor nga ipatuman ang pagpahimutang ug CCTV sa mga business establishments sa kalungsuran agi ug dugang mga mata sa kapolisan nga karon, puno ang ilang mga kamot sa mga gimbuhaton sa pamulis, dala na usab sa kakuwang sa mga magbalantay sa balaod, kon iparang sa kadaghanon sa mga Bol-anon. (Hulagway gikan sa PIA-Bohol)
SP mituki sa isyu pagpagawas sa Intelligence fund sa kalungsoran
Sinulat ni Rey Anthony Chiu
Gituki na ug anaa na sa ikaduhang pagdungog ang suliran sa pagdumili sa mga kalungsuran nga magamit sa mga mayor ang intelligence funds, gawas pa sa pundo nga gitagana alang sa programa ug mga proyekto nga magpatunhay sa kahapsay ug kalinaw.
Kini maoy gipadangat ni Board Member Tomas Abapo, kinsa mao usab ang chairman sa Sangguniang Panlalawigan Committee on Peace and Order.
Didto sa labing bag-o nga joint meeting sa Provincial Peace and Order Council (PPOC) didto sa Ceremonial Hall sa Capitolyo Enero 10, gipresentar ni Gobernador Ercio Aristotle ug sa Provincial Budget Officer Ross Peter Retutal ang mga pahat alang sa mga programa ug proyekto nga nasulod sa Annual Budget sa Capitolyo nga motampo alang sa pagpatunhay sa kahapsay ug kalinaw sa Bohol.
Unod sa SP Appropriations Ordinance No 2023-017 ang kinatibuk-an nga P400,548,378 ug wala pa maglakip sa Intelligence funds sa gobernador nga mokabat sa P20 milyones.
Niini, mibarug si Dausi mayor Roman Bullen aron isumbong sa PPOC nga ang iyang lungsod nagdumili sa pagpagamit sa intelligence fund nga P1 milyon.
Nunot niini, mitambag si Gob Aumentado sa mayor nga ipasaka kini ngadto sa kahugpungan sa mga mayor sa League of Municipalities of the Philippines aron kahimoan ug aksyon.
Sumpay usab ni BM Abapo nga gituki na sa SP ang nasampit nga suliran nga mahimong maka-angin sa mga angay nga buhaton unta sa Chief Executive Officer sa lungsod aron mapatunhay ang kahapsay ug kalinaw.
Hinuon, wala na ipatin-aw pa ni Abapo ang iyang gipaambit.
Gidugang niya sa pagpahibaw nga ang SP sa Bohol, anaa na sa ikaduha nga pagdungog sa suliran ug mamahimong may ipagawas nga ordinansa kabahin sa pagpugos sa mga magbabalaod sa mga konseho nga ikapagawas ang pahat alang sa intelligence operations sa mga kalungsuran, aron mapatunhay ang kalinaw ug kahapsay dinhi.
WALAY INTELLIGENCE FUNDS? Gisumbong ni Dauis Mayor Roman Bullen ngadto sa PPOC aron matambagan siya sa suliran nga wala ipagawas sa iyang lungsod ang pundo alang sa intelligence funds nga magamit unta sa pagpabarug sa intelligence network aron sayon nga sikopon ang mga criminal. Ang SP hinuon, una na nga mingtuki niining suliran, matud ni BM Tomas Abapo. (Hulagway gikan sa PIA-Bohol)
Voter’s registration, ibalik karong Pebrero 12
Sinulat ni Elvira Bongosia
Ang voter registration period alang sa 2025 national ug local elections (NLE) magsugod sa Pebrero 12 ug molungtad hangtod sa Setyembre 30, 2024, gipahibalo sa Commission on Elections (Comelec).
Ang mga kwalipikadong Filipino mahimong moadto sa opisina sa election officer (OEO) o satellite registration sites sa ilang mga lugar aron magparehistro aron makabotar gikan Lunes hangtod Sabado, apil ang holidays, gikan sa alas 8 sa buntag hangtod sa alas 5 sa hapon.
Suspendido ang rehistrasyon gikan sa Marso 28 hangtod Marso 30, 2024, alang sa pag-obserbar sa Semana Santa.
Aron makaparehistro, ang mga magparehistro kinahanglang mokumpleto sa kopya sa application form nga anaa sa EOE ug sa Comelec website.
Ang katapusang panahon sa pagparehistro sa mga botante gihimo niadtong Disyembre 12, 2022 hangtod Enero 31, 2023.
Nakatala kini ug kinatibuk-ang 1.6 milyones nga dugang rehistradong mga botante.
Mga kawani sa gobyerno nga nagserbisyo ug 10 ka tuig makakuha ug 10 dugang puntos sa CSC exam
Sinulat ni Elvira Bongosia
Ang Civil Service Commission (CSC) nipahibalo nga hatagan ug preferential rating nga 10 puntos ang mga kawani sa gobyerno nga nagserbisyo na ug 10 ka tuig o kapin pa sa umaabot nga Civil Service Examination (CSE).
Sa usa ka briefing sa Bagong Pilipinas Ngayon nga gisibya sa PTV-4 niadtong Huwebes, Enero 11, si CSC Commissioner Aileen Lizada mitaho nga giaprobahan sa Commission ang CSC Resolution Number 2301123 nga giulohan ug “Guidelines on the Grant of Career Service Eligibility Preference Rating.”
Matud pa ni Lizada nga masakop niini ang mga empleyado ubos sa job orders, contracts of service, ingon man contractual, casual, ug coterminous positions.
Ang resolusyon naglangkob usab sa mga empleyado sa mga posisyon ubos sa Categories 3 ug 4, ug kadtong adunay first-level civil service eligibility.
“Ano po ang mangyayari kung nasa gobyerno na po kayo for at least 10 years aggregate? The next exam which will be on March 3, gagamitin na po natin itong polisiya na ito,” ingon ni Lizada.
“Ano itong policy na ito? Ito po ay mayroon po kayong plus 10 points. So kung hindi ninyo naabot ‘yung 80 percent passing rate at kung kayo po ay 70 percent, plus 10 points para po pumasa kayo,” dugang pa niya.
Ang CSE-Pen and Paper Test gitakda sa Marso 3, 2024.
Matud pa sa CSC, ang mga interesado mahimong mo-file sa ilang aplikasyon sa mga natudlong CSC regional offices o field offices hangtod Enero 12.
Gitaho usab ni Lizada ang mga plano sa Komisyon karong tuiga nga naglakip sa pagpatuman sa Civil Service Digital Examination, pag-usab sa 2024 Omnibus Rules on Appointment and Other Human Resource Actions, ug pag-usab sa mga lagda sa mga organisasyon sa gobyerno, ug uban pa.
2 Cassava Techno Demo Field Days gipahigayon sa Bohol
Sinulat ni Elvira Bongosia
Duha ka cassava techno demonstration field days ang gipahigayon ning bag-o lang sa duha ka lungsod sa Bohol aron ipakita ang klase sa bag-o ug hinog na nga mga teknolohiya sa produksiyon sa balanghoy.
Ang techno demo nga gipahigayon sa Department of Agriculture-Central Visayas (DA7) ubos sa Corn and Cassava Program, sa pakigtambayayong sa Office of the Provincial Agriculturist ug sa Municipal Agriculture Office, gitukod sa lungsod sa Sierra Bullones ug Dagohoy nga adunay luna nga 2-ektarya matag usa.
Ang balanghoy usa sa mga importanteng pananom nga pang-agrikultura sa nasud tungod sa nagkataas nga panginahanglanon, dili lamang nga tinubdan sa alternatibong pagkaon apan lakip na sa mga gamit sa industriya.
Ang farmer-cooperator nga si Desederio Legazpi sa lungsod sa Dagohoy, kinsa mihatag ug pagtugot nga gamiton ang iyang lugar isip techno demo site, nipadayag sa iyang pasalamat sa DA.
“Dili natu sayangon ang ilang gihatag ug gi-tudlo kanato nga pamaagi sa panguma nga arun kita mag malambuon ug malungtad ang atong panginabuhian pinaagi sa pag uma,” matud pa ni Legazpi.
Si Roman Dabalos, ang Agricultural Program Coordinating Officer sa Bohol (APCO-Bohol) sa DA7 nagkanayon nga ang DA naghatag ug suporta sa mga mag-uuma, dili lang sa produksyon sa balanghoy kon dili lakip na sa ubang mga agri commodities pinaagi sa paghatag ug nagkalain-laing interbensyon.
Gidasig ni Dabalos ang mga mag-uuma sa pagpadayon sa pagtikad sa ilang yutang panguma.
Atol sa 10 ka buwan nga season field demo nga gisalmotan sa 17 ka mag-uuma gikan sa lungsod sa Sierra Bullones ug 35 ka mag-uuma sa Dagohoy, ang lakan ug golden yellow nga barayti gipaila tungod sa taas nga abot niini.
Ang mga teknolohiya nga gipaila naglakip sa mais ug balanghoy nga intercropping, husto nga gidaghanon ug ang panahon sa pag-abono ug ang gilay-on sa pagtanum, ug uban pa.
Ang tanom nga balanghoy makasugakod sa kainit sa huwaw nga mahimong i-proseso isip himsog nga snacks sama sa cassava cake, cassava chips ug fries. Kini usab nga tanum nag-unang sangkap sa mga feed sa kahayopan nga makahatag ug dugang nga kita sa mga mag-uuma. (Hulagway gikan sa DA7/PIA7-Bohol)