BWUI mihingalan sa PAYMENT PARTNERS diin didto mahimong mubayad sa water bill
Makita sa itaas ang company logo sa matag payment partner sa Bohol Water Utilities Inc. (BWUI): FCB, Bank of Commerce, LandBank of the Phils, BLCI, Security Bank ug ang M. Lhuillier)
Sa tinguha nga mahatagan ug kasayon ang mga konsumidor sa Bohol Water, ilabi na sa pagbayad sa bill sa tubig, ang maong buhatan nakig-alayon sa mga establisemyento isip payment partners diin mahimong didto ibayad ang bill sa tubig.
Kining maong mga establisemyento mao kining mosunod: (1) First Consolidated Bank; (2) LandBank of the Philippines; (3) Bank of Commerce; (4) Security Bank, ug ang (5) M. Luillier.
Pagadawaton sa bisag asa nga sangang buhatan sa nahisgutang mga establisimyento ang bayad sa tubig apan kinahanglan nga e-presentar sa konsumidor ngadto sa mga tellers o cashiers ang current bill o balayronon nianang bulana lamang nga wala pa molapas sa “due date”.
Sa nahisgutang mga establisimyento, ang on-line payment o pagbayad pinaagi sa internet puede ibayad sa FCB, Land Bank ug sa Security Bank, apan kinahanglan nga adunay account ang konsumidor sa nahisgutang mga bangko aron adto kini mo deduct sa maong account. Samtang ang M. Lhuiller, gawas sa “over the counter” process, puede usab ibayad sa ilang fasilidad nga gitawag ug “ML Wallet” diin ang maong bayad adto modeduct sa “available load” sa maong wallet.
Apasumpay sa on-line payment, ang FCB aduna silay pasilidad nga mao ang “FCBpay” diin ang “app” o application niini kinahanglan ma install sa cellphone sa konsumidor aron adto na himoon ang pagbayad ug gikinahanglan usab nga adunay load ang cellphone number nga giregister aron maka access sa maong app. Ang FCB lamang ang mo install ngadto sa cellphone sa usa ka konsumidor mao nga giawhag kadtong gusto mo avail niini nga linawas mo bisita sa buhatan sa maong bangko aron usab sa dugang pagpakisayod mahitungod sa maong fasilidad. Agi ug dugang sa pagbayad pinaagi sa on-line, ang LandBank ug Security Bank himoon pinaagi sa ilang website nga ma search sa internet.
Ang current bill lamang nga wala pa molapas sa due date ang dawaton sa mga payment partners aron malikayan ang mga dugang balayronon nga dili makit-an sa maong bill sama sa 2% surcharge kon ang pagbayad molapas na sa due date.
Sigun sa billing program sa Bohol Water, isipon ang mahabilin nga kantidad nga wala ma fully paid sulod sa maong bulan, o sa usa ka bulan nga delinquent.
Kon ugaling molapas na sa due date ang maong bill, giawhag ang hingtungdan nga konsumidor nga adto na mobayad sa opisina sa Bohol Water aron malikayan ang mga kahasol sa pagbayad niini.
Gawas sa LandBank, ang pagbayad pinaagi sa “over the counter” pagadawaton sa nahisgutang mga payment partners lakip ang buhatan sa Bohol Light ug Bohol Water diin ang naulahi modawat usab sa electric bill sa BLCI.
Pagkakaron, naningkamot ang Bohol Water nga madugangan pa ug mga payment partners ilabi na ang mga on-line payment facilities aron mahatagan ang konsumidor ug kasayon ilabi na sa panahon sa pagbayad sa ilang bill sa tubig.
BLCI: Pahinumdum sa katawhan – KURYENTE walay gipili ug dili makit-an
Ang buhatan sa Bohol Light Company, Inc. (BLCI) buot magpahinumdum sa tanan nga magantay gyud kita sa paggamit sa kuryene tungod kay ang boltahe niini dili makita. Ang iyang kakusog dili usab mananghid kung kini makakuryente. Dili usab kini mupili ni bisan kinsa tungod kay sumala sa atong gika-ingon, dili kini makita.
Angayan gayod nga kita makahibalo sa mga basic SAFETY MEASURES sa paggamit niini aron malikayan ang bisan unsang kadaot.
Ang hulagway nagpakita sa pipila ka mga pahimangno gikan sa Bohol Light Company Inc.:
- Bantayan ang husto ang installation sa koneksyon sa kuryente.
- Ginadili ang paghayhay diha sa mga service drop wires nga linya sa kurente padulong sa atong mga panimalay.
- Ginadili ang paghikap sa plangka kung basa ang kamot.
- Dili biyaan ang bisan unsang electrical appliances samtang kini gigamit ilabi na kung ikaw nigawas sa imong panimalay.
- Ayaw pag-ilis sa napunder nga bombilya kung basa ang kamot.
- Ayaw palunga ang bombilya pinaagi sa pagpaluag lamang sa socket niini.
- Ginadili ang paglabay sa bisan unsang butang diha sa linya sa kurente.
- Ginadili ang pagtirador ug langgam o bisan unsang butang diha sa linya sa kuryente.
- Likaye nga ang service wires dili musangyad sa atop sa balay.
- Ipalayo ang TV Antenna sa linya sa kuryente.
- Ginadili ang series, oktupos ug flying connections
- Pagbantay sa panit nga wires ug ayaw gayud paghikap niini,
- Ayaw pagduol o pagtamak sa tubig kung aduna kay nakita nga wire o alambre sa kuryente nga nasagyad niini.
- Ayaw pag gamit ug kabilya nga hiumuon nga ground rod.
- Gindadili ang pag tabanog duol sa linya.
- Ginadili ang pagbutang ug jumper sa fuse.
Pipila lamang kini nga angayan pagabantayan tungod kay ang kinabuhi, dakong bahandi.
PCG may gipaabut nga
Fastboat para sa Bohol
Sinulat ni Rey Anthony Chiu
Naa pa gihapon panginahanglan sa floating assets, apan, matud pa sa Philippine Coast Guard (PCG) acting station commander sa Western Bohol, may gihimo usab ang nasudnong kagamhanan sa paghulip niining tanan.
Matud ni Lieutenant Junior Grade Romulo Balonga Jr., acting stations commander sa PCG Western Bohol, kulang pa man ang ilang sea assets, naay ginahimo karon ang PGC uban sa national government kay sa pagka karon, aduna nay 40 pa ka dugang mga fastboats nga gihimo didto sa Sugbo alang sa mga panginahanglan sa serbisyo.
Gawas pa, didto sa Kapihan sa PIA, giangkon ni Lt Balonga nga ang maayo nga relasyon sa PCG sa mga local government units, nagpabukas sa mga sakop sa PCG nga makagamit sa mga floating assets sama sa mga fish warden patrol boats, mga municipal environment and management offices sa ilang mga speedboats ug ang mga disaster and risk reduction assets sama sa mga rubber boats aron mapadayon sa ahensya ang ilang mga gimbuhaton.
Kahinumduman nga dihay mga panahon nga ang mga tinugyanan sa PCG sa Bohol, manghuwam lamang ug mga bangka sa mga mananagat aron sila makahimo sa pagpanakop ug pagpatrolya sa mga kadagatan.
Dugang ni Balonga, nga sa labing bag-o nila nga courtesy call sa Philippine Army’s Special Forces nga naa sa Bilar, nagkasabut na usab ang duha ka units nga makagamit sa mga assets sama sa fast patrol boats sa Special Forces.
Bisan pa man, sa mga lugar nga gikinahanglan gayud ang presensya sa PCG, ilang hangyo sa mga nahibilin nga mga LGUS nga wala pay mga substations nga basin makahatag ug dyutay nga luna, samtang ang PCG nakigsabot na usab sa Department of Public Works and Highways alang sa pagpatukod sa mga gambalay nga gamitan sap undo sa nasudnong kagamhanan nga gipaagi sa DPWH.
PADAYON’G MAAYO’NG RELASYON. Bisan pa man sa kakuwang sa floating assets sa PCG, matud ni Acting stations commander LtJg Romulo Balonga Jr., nga samtang naningkamot ang nasudnong kagamhanan nga hulipan ang kakuwang, mapasalamaton sila sa padayon nga maayong relasyon sa mga LGUS ug allied units nga mopagamit usab sa ilang mga assests kon gikinahanglan sa Coast Guard. (Hulagway gikan sa PIA-Bohol)
Daghang tawo sa LandBank,
paspas usab ilang serbisyo
Sinulat ni Rey Anthony Chiu
Daghan man ug tawo tan-awon ang LandBank of the Philippines, mipasalig ang usa ka opisyal ug branch manager sa bangko sa gobyerno nga gitahasan sap ag-abag sa nasudnong kalambuan, nga may espesyal usab kini nga mga counters nga maoy moatiman sa kadaghanan.
Kini maoy gipasabut ni LBP City Hall Branch Manager Liezel Manilhig, sa pagtubag sa kasagarang reklamo sa mga katawhan nga perming daghang tawo ang bangko, ug lisud alang sa mga nagdali.
Didto sa Kapihan sa PIA nga nagtutok sa paglusad sa Landbankasama Program, nahisgutan nga usa sa mga nakadaghan nga tan-awon sa mga kliyente sa Land Bank mao ang mga benepisaryo sa Pantawid Pamilyang Pilipino Program (4Ps).
”Dili pod nato kalikayan, for example karon, daghan mang gud nga mga 4Ps nga bag-ong beneficiaries nga wala pay card apan nasudlan na ang ilang mga accounts sa ilang benefits, luoy pod kaayo nga ato silang pahuwaton nga matagaan ug card, gitagaan gani aron sila matabnagan? Mao na nga ato pod silang gi accommodate, over the counter, mao nang kasagaran sa mga LBP karong panahona, puno-puno gyud,” saysay ni Manilhig.
Pasalig sa Landbank, sa tan-aw lang ang daghan nga tawo, apan digang nila, nasayud na ang mga 4ps beneficiaries nga maghuwat gyud sila.
Lahi ang ilang linya, ug lahi sab ang dedicated nga mga tawo alang sa regular nga mga customers, gipatin-aw ni Manilhig, didto sa Kapihan.
Ang serbisyo, matud pa ni Manilhig, lakip na ang local na nga pagenrol sa ATM ug Savings accounts ngadto sa online banking.
Gani, gipasabut niya nga sahi kay sa kaniadto, nga kon ang account didto ablihi sa lain nga lugar, gikinahanglan usab nga didto himoon ang enrolment sa online banking access.
Ang enrollment sa online banking I-access, gikinahanglan usab nga tago-an ug maayo ug dili ipakita ug ipakambit sa uban, ang authentication Code, One Time Password (OTP) ug mga personal nga kasayuran, pahinumdom sa lang bank. aron dili mailad.
Hinuon, pahinumdom sa opisyal, kadtong mo enroll alang sa online banking access, kinahanglan gyud
nga dili kalimtan ug mawala ang kasagarang nga mga Personal Identification Number, One Time Password ug nga uban pang kikinahanglan sa pagpa enroll sa account.
DILI PAREHAS NGA COUNTER. Bisag daghang tawo ang mopila sa Landbank, kadtong mga 4Ps nasayud na nga malangan gyud sila, ug nga aduna silay allocated nga counters alang niining matang sa mga transaksyon, matud pa ni Liezel Manilhig. (Hulagway gikan sa PIA-Bohol)
Dugang mga tambal gi-exempt sa VAT sa BIR
Sinulat ni Elvira Bongosia
Gipahibalo sa Bureau of Internal Revenue (BIR) nga mas daghang tambal nga gigamit sa pagtambal sa cancer ug sakit sa pangisip ingon man pagmintinar sa hypertension ang nalakip sa listahan sa value-added tax (VAT)-exempt drugs.
Subay sa Revenue Memorandum Circular 23-2024 nga gipagawas sa BIR niadtong Marso 5, napulo ka mga tambal sa nagkalain-laing sakit ang na-exempt sa 12 porsiyento nga VAT.
Ang mga tambal alang sa kanser sama sa Sonidegib (phosphate), Pemetrexed (disodium heptahydrate), Asciminib (hydrochloride) ug Palbociclib gidugang sa VAT-exempt list, base sa circular. Ang ubang mga tambal nga anticancer sama sa Pemetrexed (disodium hemipentahydrate), Cabazitaxel ug Entrectinib gi-exempt usab.
Samtang ang mga tambal alang sa pagmintinar sa taas nga presyon sa dugo nga VAT-exempt usab mao ang Losartan Potassium + Amlodipine (besilate) ug Irbesartan + Amlodipine (besilate).
Ang Cariprazine nga adunay lainlaing dosis nga kusog, gigamit sa pagtambal sa schizophrenia ug bipolar mania, gidugang usab sa lista sa mga tambal nga wala’y bayad sa VAT alang sa mga sakit sa pangisip, sumala sa circular.
Ang circular magamit sa pagbaligya o pag-import sa mga tambal nga gireseta alang sa kanser, sakit sa pangisip, tuberculosis ug sakit sa kidney sa mga tiggama, distributor, wholesaler ug retailer.
Matud pa sa pahayag sa BIR, ang circular gihimo kalabot sa sulat gikan sa Food and Drug Administration (FDA) sa Department of Health sa updated nga listahan sa VAT-exempt products ubos sa Republic Act (RA) 10963 (Tax Reform for Acceleration and Inclusion, o Train, law) ug RA 11534 (Corporate Recovery and Tax Incentives for Enterprises Act, or Create, law).
Ang Create law naghatag ug VAT exemption sa pipila ka health products ug medical devices diin ang FDA gitahasan sa pag-ila sa mga produkto ug ipadala ang listahan ngadto sa BIR. Ang circular subay usab sa Train law, sumala pa sa BIR.
Matud pa nga ang paghatag ug real-time updates ngadto sa mga Filipino mahitungod sa mga butang sa buhis, lakip na ang VAT exemption sa pipila ka mga tambal, kabahin sa “thrust for Excellent Taxpayer Service” sa buhatan.
Marso 11 dili holiday – Malacañang
Sinulat ni Elvira Bongosia
Ang giingong deklarasyon sa Marso 11, 2024 nga usa ka nationwide regular holiday usa ka “fake news,” matud pa sa Malacañang.
Sa Facebook post, ang Official Gazette of the Republic of the Philippines mitawag sa dokumento nga mikatap sa social media nga nagdeklarar sa pagsaulog sa Eid’l Fitr nga “spurious.”
“ATTENTION: The circulating document labeled ‘Proclamation No. 729’, which purportedly declares Monday, March 11, 2024, as a nationwide regular holiday in celebration of Eid’l Fitr, is spurious (Ang circulating document nga gimarkahan ug ‘Proclamation No. 729’, nga giingong nagdeklara sa Lunes, Marso 11, 2024, isip usa ka nationwide regular holiday sa pagsaulog sa Eid’l Fitr, usa ka bakak,)” matud pa sa post.
Gipasabot sa Palasyo nga ang maong dokumento usa ka “tampered version of Proclamation No. 729, s. 2019”, nga gi-isyu ni kanhi Executive Secretary Medialdea sa miaging administrasyon.
Ang Eid al-Fitr o ang “Festival of Breaking the Fast” usa ka Islamic festival nga nagtimaan sa pagtapos sa buwan sa puasa sa Ramadan.
Ang Palasyo wala pa modeklarar ug holiday alang sa Eid’l Fitr.
BALAK
KON MAPALIT PA ANG GUGMA
Sinulat ni Engr. Rogelio Podelino
Dinhi sa kalibutan ang salapi gamhanan
Halos tanan’g butang mapalit sa adunahan
Kon ikaw adunahan tinahud ka sa tanan
Inila ka sa katilingban
Kon unsa’y imong gusto makuha sa kasayon
Bisan ang mga anak ni Eva nagoa-ulipon
Kay ang ilang tuyo ang imong ka-adunahan
Nga magpuyo sila nga bulahan
Daghan ang nanimpalad tungod sa gugma
Gisugal ang kinabuhi nila
Sa tinguha nga ilang makaplagan
Ang gugma’ng maidlas sangatanan
Kay ang gugma’ng tim-os ug dalisay
Lisud hikaplagan sa mga tawo’ng pasaway
Kay nagtago man sulod sa balati-an
Sa mga linalang nga buotan
Ang gugma dili.nimo mahibalo-an
Kon anus-a kini moturok sa imong dughan
Si kupido ra ang nasayod sa hinungdan
Kon mogitib na kini sa imong balati-an
Daghan unta’ng mga adunahan ang malipayon
Kon ang gugma mapalit pa gilayon
Apan sakgaw sa kinaiyahan ang tanan
KON MAPALIT PA ANG GUGMA SA BULAWAN