BOHOL LIGHT nagpabiling pinaka-ubos sa balayronon sa kuryente dinhi.
Ang Bohol Light Company, Inc. (Bohol Light) nagpabiling pinaka-ubos ang gihatag nga balayronon sa kuryente alang sa ilang mga konsumidor. Kining maong balayronon, alang sa distribution, supply ug metering charges.
Kining pinaka-ubos nga balayronon, mao kini ang gipaningil sa kumpanya sa matag bulan nga konsumo sa kuryente sa atong mga konsumidor. Kining maong presyo, mao ang ppinaka-ubos kung itandi sa ubang mga electric cooperatives ug pribadong distribution utility companies.
Adunay mga components nga atong makita diha sa atong mga electric billing statements alang sa balayronon sa kuryente. Mao kini ang: Generation, Transmission, Distribution, Government, and Other Charges.
Ang Generation ug Transmission rates gitawag kini sila ug pass through charges. Ang ipasabot niini, mao nga kung unsay gi-bill sa mga Power Generators ug sa Transmission o National Grid Corporation of the Philippines (NGCP) ngadto sa Bohol Light Company, Inc., mao ra usab kini ang isingil diha sa mga konsumidor; ug ang koleksyon niini igo ra usab nga ibayad sa atong power suppliers ug sa NGCP.
Ang Distribution rate gilangkuban kini sa Distribution, Supply, and Metering (DSM) charges nga nag kantidan lamang niini mao ang P0.9840/kWh. Kini siya ang musulod sa panudlanan sa Bohol Light nga maoy magamit alang sa administrative, operation ug maintenance expenses. Ang mao nga rate fixed na kini, ug dili basta-basta madugangan tungod kay pre-applied ug pre-approved kini sa Energy Regulatory Commission.
Ang DSM rate sa BLCI walay pagsaka sugod sa tuig 2015. Kung pila lamang ang makuha sa BLCI gikan sa DSM rate nga P0.9840/kWh, mao ra usab kini ang gastohon sa Tagdumala alang sa pag implementar sa atong mga proyekto para sa kalambuan sa atong serbisyo publiko.
Samtang ang gitawag ug “Other Charges” mao ang Value Added Taxes (VAT) nga gimando gyud nga atong kolektahon ug iduso ngadto sa Bureau of Internal Revenue (BIR), Lifeline Subsidy Program ug Senior Citizens Subsidy Discounts.
Ang Bohol Light buot usab magpahibalo ngadto sa atong mga konsumidor nga ang presyo sa balayranan sa kuryente, mag usab-usab sa matag bulan tungod sa fluctuation sa Generation Cost components ug ang volatility sa presyo diha sa spot market.
Karong bulan sa Marso adunay dyutay’ng pagtaas sa atong presyo niini kon itande sa bulan sa Pebrero sa kantidad nga P1.46/kWh alang sa nga residential consumers ug P1.55/kWh ngadto sa mga commercial consumers.
Ang atong electricity rates effective sa Marso 2024 billing period, mahimo nang P9.08/kWh alang sa Residential category ug P8.79/kWh alang sa mga Commercial consumers.
Bisan pa man niining maong pagsaka, ang rate sa Bohol Light Company, Inc., nagpabilin gihapong usa sa pinakaubos nga presyo dinhi sa Visayas region ug sa atong lalawigan sa Bohol.
Ang dugang mga detalye mahitungod sa computation ug components sa Electricity Rates makita sa BLCI official website www.bohollight.com.
Kon aduna kamoy mga pangutana kabahin sa billings, palihog lang dalha diri deri sa atong opisina o tawag lang sa hotline # 0931-852-4312 aron mahatagan ug katin-awan.
BWUI mipatin-aw sa water bill sa matag bulan nga balayranan
Caption: Makita sa itaas ang hulagway sa water bill sa BWUI nga gi-apud-apud matag bulan diin gilatid ang mga mahinungdanon nga data mahitungod sa konsumo sa tubig.
Susama sa uban nga mga utility providers, ang Bohol Water adunay systema mahitungod sa pag generate sa water bill ngadto sa tagsa-tagsa ka mga accounts sa konsumidor nga narehistro sa maong kompanya.
Ang mga data nga makita sa water bill mao kining mosunod: (1) bulan sa maong billing period; (2) pangalan ug address sa konsumidor; (3) account number; (4) consumer type – residential ba or commercial; (5) konsumo sa tubig sa maong bulan; (6) kantidad sa bayronon sa maong bulan; (7) ug DUE DATE. Kining due date nagpakita kun kanus-a gyud kinahanglan nga dili ka mulapas sa pagbayad sa imong konsumo sa tubig.
Kon ang pagbayad sa maong konsumo nianang bulana molapas na sa due date nga nahipatik sa maong water bill, aduna na kini’y 2% surcharge nga mapatong sa amount due.
Gawas sa nahaunang mga data, daghan pang mga inpormasyon nga makita sa usa ka water bill nga nagalakip usab sa mga mosunod: present reading ug previous reading (dinhi, makuha nato ang actual nga konsumo nianang bulana); reading date; pangalan sa meter reader; ug ang REMARKS.
Kining REMARKS nagpakita sa prosyento sa pagsaka o pag-os-os sa average reading sa maong konsumidor. Angay gayud bantayan sa konsumidor ang REMARKS tungod kay dinhi makita kon aduna bay pagsaka o pag-ubos sa konsumo nianang bulana kung itandi sa niaging bulan. Kon taas ang pag saka sa konsumo nianang bulana (percentage increase) posibli nga adunay leakage sa linya nga nahisulod na sa metro. Mao nga importante kaayo ang monitoring pinaagi sa REMARKS nga anaa sa water bill.
Ang water bill ihatud gyud kini ngadto mismo sa panimalay sa konsumidor mga duha o tulo ka adlaw human ang mga meter readers mohimo sa pagbasa sa mga metro.
Kon ang usa ka panimalay permanente nga walay tawo sa panahon nga magdeliver ang mga bill courier, giawhag ang hingtungdan nga panimalay sa pagbutang ug MAIL BOX o bisan unsang masudlan sa maong water bill. Segun sa nasinati sa Bohol Water, adunay mga panimalay nga walay mail box ug permanente usab walay tawo sa panahon nga ihatud ang water bill. Mao kini ang hinungdan kung nganong mangita na lang ang tig-deliver sa water bill ug paagi kung asa ibutang ang water bill.
Mahinungdanon gyud nga ang usa ka konsumidor makadawat sa iyang water bill matag bulan tungod kay daghan kaayo ug impormasyon nga anaa nahipatik sa maong bill, ug aron usab malikayan ang dugang balayronon ilabi na kon ang pagbayad niini molapas na sa due date. Gawas pa, kinahanglan usab malikayan ang kahasol nga dala sa wala pagpakabana sa obligasyon sa usa ka konsumidor.
Captains Peak Resort gipasirad-an, sama’ng isyu posibleng manga-abli
Sinulat ni Rey Anthony Chiu
Gipasirad-an ang nag viral nga Captains Peak Resort sa Department of Environment and Natural Resources, apan ang kaso, usa lamang sa gatusan ka mga pagsupak sa balaod sa protected areas nga nagpanghitabo dinhi sa Bohol.
Kasagaran hinuon niini, wala na panumbalinga sa mga tinugyanan.
Niadto pang 1988 nga ang National Committee on Geological Sciences mingdeklara sa Chocolate Hills sa Bohol isip National Geological Monument, agi ug pag-ila sa iyang talagsaon nga kinaiya, matampo niini sa siyensya, ug ang pagka anindot niini nga tan-awon.
Aron mas mapalig-on ang pagpatunhay sa talagsaon nga mga bungtod, ang Chocolate Hills, nga kanhi nailhan nga Carmen Hills, gideklara nga angay panalipdan, niadtong Hulyo 1, 1997, pinaagi sa Proclamation 1037 nga gipagawas ni kanhi Presidente Fidel V. Ramos.
Kining Proklamasyon nagtuboy sa Chocolate Hills isip Nasudnon nga Geological Monument ug Protected Landscape, samtang giila niini ang talagsaon nga mga geological formations sama sa halos susama ug hugis nga mga bungtod aron pagseguro nga kapanalipdan kini’ng natural nga talan-awon, aron mapaambit sa mga kaliwatan.
Ang deklarasyon nagtumong usab nga patunhayon ang talagsaon nga Chocolate Hills nga maoy labing tataw nga imahen sa Bohol.
Kini aron ikaduso niini ang malungtaron nga turismo samtang nanalipod sa nagkadaiyang buhilaman ug ang kinatibuk-ang kalikopan sa nasampit nga lugar.
Segun sa una nga Proclamation 1037, sa kinatibuk-an nga lugar (contiguous) nga giyak-an sa mga susamag porma nga mga bungtod sa Batuan, Carmen ug Sagbayan, Bilar, Valencia ug Sierra Bullones, wala’y tugutan nga maghimo ug bisag unsa nga mga pag-ugmad aron dili madaut ang talan-awon.
Kini usab nga Proklamasyon nagpaturok sa mga kagubot sa paggamit sa mga kayutaan nga una na nga natitulohan apan nakoridas dala sa nasampit nga balaod sa pagpanalipod.
May mga tag-iyahan ug mga yuta sulod sa nadeklara nga CHPL nga una na nga nakatukod ug nga permanente nga estraktura, mga kabasakan ug mga tamnanan nga na-apil na sa mga gidili nga buhat.
DUGANG PREOTEKSYON
Niini, si kanhi Presidente Gloria Macapagal-Arroyo milagda sa Proclamation 468 niadtong Septembre 26, 1994, nga nagdeklara sa mga kapatagan palibot sa mga kabungturan sa Chocolate Hills nga dili na apil sa national monument.
Kini nga kausaban sa nahauna nga proklamasyon nagtugot na sa pag-ugmad sa mga yuta sa tiilan ug palibot sa mga bungtod, ni si kinsa man ang naghupot sa katungod niini.
Kon ang yuta, natitulohan sa wala pa ang Proclamation 1037 nga nagdeklara sa usa ka lugar nga gipanalipdan na sa balaod, ang mga katungod ug interes sa mga tag-iya nga nakapatitulo niini, kasagaran tagdon gayud ug respetohon sa balaod, matud sa DENR sa iyang pamahayag kabahin sa Captain’s Peak and Resort.
Hinuon, kay ang pagka deklara sa usa ka lugar nga gipanalipdan na sa balaod, may giisip usab nga katungod ang mga tag-iya niini, ang mga tinugyanan gimanduan sa magpatuman sa mga regulasyon ug pagdili sa unsay buhaton sa paggamit sa titulado nga yuta ug sa mga pag-ugmad niini samtang naa sa sulod sa lugar nga naapil sa napanalipdan sa balaod, bisan pa kon kini gipanag-iya sa mga pribado nga molupyo.
Sa matag plano sa pag-ugmad, kini isangko sa DENR kinsa maoy nanguna sa pagpatuman sa Proklamasyon sa pagpanalipod ug sa gipalapdan nga Republic Act 7586 ug mas gipalapad pa sa RA 11038 o ang Expanded-National integrated Protected Areas Systems (e-NIPAS) Act nga ang Chocolate Hills nasukip.
Mismo ang Barangay Canmano, diin nagbarug ang Captain’s Peak, sa usa ka Resolusyon, nanghangyo sa lungsod nga palapdan ang dalan gikan sa Libertad Norte ngadto sa Canmano, nga moagi sa nasampit nga resort.
MAGBALANTAY NGA PAMB
Gawas sa DENR, ang balaod nagtumbok usab sa kamugnaan sa Protected Areas Management Bureau (PAMB) nga apilan sa mga kapitan sa kabarangayan diin nahimutang ang mga gipanalipdang natural nga talan-awon, mga mayor ug ang DENR, aron sila ang unang mosarap sa mga kaugmaran nga supak sa balaod sa protection.
Ang PAMB nga nakahatag sila ug Resolution No 21, s. 2023 nga nag-endorso sa pagtukod sa Captains Peak Resortn human mainspeksyon ang pagtukod u gang pagpabalhin sa pasilidad ngadto sa patag.
Gimandu usab sa PAMB nga dili hilabtan ang wala itugot sa PAMB, pagmintinar lamang sa right of way, paghatag ug saktong mga kanal, parkingan, pagtukod ug Materials Recovery Facility, septic tanks ug sa pagkuha sa gikinahanglan nga mga permits.
Gawas niini, gimandu sa PAMB nga mobayad ug P5 mil isip onetime nga administrartive fee ug P2.00 nga bahin sa matag turista nga mosulod.
Didto sa plano, ipahiluna sa DENR ang mga regulasyon ug mga pagdili aron dili mahinayak ang tag-iya, kay didto sa kuhaon niini nga Environmental Impact Statement (EIS), didto ilista ang mga pagdili ug mga regulasyon sa pagtukod.
Ang EIS maoy dokumento nga kuhaon sa mga tag-iya sa yuta sa dili pa sila kahatagan sa Environmental Compliance Certificate (ECC) sa ilang mga pag-ugmad sa lugar.
HABIG SA CAPTAINS PEAK
Wala pa usab magpagawas ug pahayag ang kagamhanan sa Sagbayan, diin possible nga una nga nagkuha sa permit ang mga tag-iya sa resort sa pagtukod sa ilang mga estraktura nga mingsaka na sa mga kabungturan, supak sa balaod sa pagpanalipud niini.
Apan, sa iyang pahayag, ang tag-iya sa Captains Peak mipatin-aw nga ang pagtukod sa resort miagi sa makuti nga pagtuki ug mga gikinahanglang pagtugot gikan sa mga tinugyanan, lakip na ang DENR.
We have complied with all environmental regulations and have taken measures to minimize our ecological footpriont throughout the development process.
Wala man isulti sa DENR kon may EIS na ba ang Captains Peak, apan gibutyag niini nga ang resort nag operate nga wala’y ECC.
Kini gitataw sa DENR 7 sa usa ka pahayag sa interview sa usa ka rehiyonal nga pahayagan.
“In the case of the Captain’s Peak Resort, the DENR issued a Temporary Closure Order last Sept. 6, 2023 and a Notice of Violation to the project proponent last Jan. 22 for operating without an environmental compliance certificate (ECC),” saysay sa DENR.
Wala usab isulti sa DENR kon may EIS na ba ang Captains Peak.
GIPASIRAD-AN
Sa kaso sa Captain’s Peak Resort, naghatag na ang DENR sa Temporary Closure Order niini niadto pang Septembre 6, 2023 ug ang Notice of Violation ngadto sa mga tag-iya sa proyekto niadtong Enero 22, 2024 tungod kay nag-bukas sila nga wala’y nakuha nga ECC, segun sa ilang pahayag.
Niadtong Marso 13, 2024, si Regional Executive Director (RED) Paquito Melicor mimando pinaagi sa Memorandum ngadto kang PENRO Ariel Rica aron magmugna ug team nga maghimo ug inspection sa Captain’s Peak alang sa pagsubay kon kini mingtuman ba sa Temporary Closure Order.
Ang DENR EMB magpabilin nga magmonitor niini, matud pa ni RED Melicor.
PAHAYAG NI GOBERNADOR AUMENTADO
Si Gobernador Erico Aristotle Aumentado mibutyag usab nga sa Septembre, 2023 pa lang, iya nga gipasubay ang pagtukod ug resort sa Captain’s Peak didto sa Chocolate Hills nga tua na sa Sagbayan, Bohol.
Kahinumduman nga ang Sagbayan, apil pa gihapon sa protected area.
Dugang sa gobernador, mi-adto na usab ug nag-imbestigar ang Sangguniang Panlalawigan Committee on Environment, ug nagduso na sa ilahang taho ug mga rekomendasyon.
Kauban usab sa gisubay sa SP niadtong panahona mao ang Bud Agta nga anaa sa Buenos Aires, sa Carmen.
“Isip magbalantay sa lalawigan, dili kita makatugot nga kini magpadayon,” matud sa opisyal nga pahayag sa gobernador nga gipagawas Marso 13.
“Atoa na nga gisugyot sa DENR ug sa PAMB (nga maoy natahasan nga motan-aw sa ingon niini nga pag-ugmad) nga usbon ang ilang palisiya aron maseguro nga ang bisan unsa nga trabahoon sulod sa Chocolate Hills Protected Landscape nga wala mahitugma sa pagkatudlo sa Bohol sa United Nations Educational Scientific and Cultural Organization (UNESCO) isip kalakip sa Global Geopark, kinahanglang dili tugotan,” tataw ni Aumentado.
Nunot niini, iyang gipadayag nga kini iyang isang-at ngadto sa kalihim sa DENR, aron magiyahan ug matudlo-an ang Bohol sa angayan nga buhaton, kalabut niini.
Sa mga pamahayag sa mga natungdan, dagway ug may gibarugan usab sila nga mga punto.
Apan ang wala paghaum sa mga balaod, lagda ug ang sistema sa burokrasya sa nasud, possible nga nagbisbis usab sa mga linsok nga motubo taliwala niining mga lutak sa balaod, nga sama sa ang linsok mamahimong dagkong kahoy unya, kini makalumpag sa mga institusyon nga nagpatuman niini.
Pila pa kaha ka kaso sa pagsupak sa mga balaod ang manglutaw sa sunod nga mga adlaw?
Sa buwan sa Pebrero
Bohol PPO, Tagbilaran CPS pulos Nanghawod sa regional UPER
Sinulat ni Rey Anthony Chiu
Doble nga dungog ang nakuha sa mga kapolisan sa Bohol ug Tagbilaran diha nga ilang nasakmit ang labing tag-as nga Unit Performance Evaluation Rating (UPER) subay sa ilang Command Memorandum Circular (CMC).
Kini matud pa ni Police Lieutenant Colonel Norman Nuez, tigpamaba sa Campo Dagohoy ang Bohol Provincial Police Office ug police director sa Police Community Affairs and Development Unit, atul sa senemanang programang Strategic Information Broadcasting through Internet and Other Access (SIBIA).
Matud niya, alang sa buwan sa Pebrero 2024, ang Bohol Provincial Police Office pinangulohan ni Police Senior Superintendent Lorenzo Batuan maoy nakakuha sa labing taas nga puntos sa UPER alang sa mga Provincial Police Offices sa Central Visayas.
Sa laing bahin, ang Tagbilaran City Police Station pinangulohan ni Police Lieutenant Colonel Homobono Sayon usab ang misakmit sa labing taas nga ranggo sa mga Component Cities Police Stations sa Sentrong Kabisay-an.
Ang TCPS nakakuha sa rating nga 90.96.
Gradohan ang matag police station ug units sa 40 points sa Administration ug 60 points sa Operations
Ang UPER System sa PNP mao nay gigamit aron masukod ang ka maayo sa mga nagkadaiyang buhatan ug units sa kapolisan, isip giya sa pagtimbangtimbang sa performance sa pagpatuman sa mga programa sa PNP ug sa ilang kaugalingon nga mga responsibilidad ug gimbuhaton.
Sa gisagop nga sitema, mahiusa niini ang paghimo sa binuwan nga pagtimbang sa mga performance sa mga National Administrative Support Units (NASUs), National Operational Support Units (NOSUS), sa National Capital Region Police Office (NCRPO) Districts, NCRPO District, Stations, Police Regional Offices (PROs), Police Provincial Offices (PPOs), City Police Offices (CPOs), City Police Stations (CPSs), Component City Police Stations (CCPSS), Municipal Police Stations (MPSs), Regional Mobile Force Battalions (RMFBS), Provincial Mobile Force Companies (PMFCS), ug sa City Mobile Force Companies (cMFCs).
Pinaagi sa UPER, dinhi mabasehan kon ipabilin ba o ibalhin ang unit commander, gamhan ang mga opisyal nga nagdumala sa dayag nga pagtala ug pagkuha sa mga Uper reports.
Magsilbe usab kini nga standard nga sumbanan sa mga nagdumala sa paghatag ug ranggo sa mga buhatan sa PNP ug mga units niini, mamonitor ang mga mandatus ug direktiba sa Chief PNP sa pag grado sa performance sa unit commander sa natad sa operation ug administration.
Ang UPER usab magsilbe nga mekanismo sa feedback sa pagmonitor sa dagan sa pagkab-ot sa gilantaw nga tumong ilabi na sa pagtumbok kon ang mga proyekto, programa ug kalihukan napatuman ba aron makab-ot ang mga katuyuan niini.
SA SIBIA GISIBYA ni Lt Col Norman Nuez ang dobleng kadaugan sa Bohol PPO ug Tagbilaran City PS sa ilang parehong sapong nga unit performance evaluation rating sa mga lalawigan ug component city stations sa Region 7. (Hulagway gikan sa PIA-Bohol)
3 ka adlaw nga ‘Kadiwa ng Pangulo’
ipahigayon sa Old Tagbilaran Airport
Sinulat ni Elvira Bongosia
Isip tubag sa pagsaka sa presyo sa mga pagkaon, ang Kadiwa ng Pangulo (KNP) program ilusad sa probinsya karong Marso 15 sa Old Tagbilaran City Airport aron mahatagan ang mga Boholano ug presko ug barato nga mga produkto sa agrikultura ug pangisda.
Ang kagamhanang probinsiyal pinangulohan ni Gob. Erico Aristotle Aumentado, nakigtambayayong sa mga ahensya sa nasudnong kagamhanan alang sa paglusad sa Kadiwa sa alas 9:30 sa buntag adlaw’ng Biyernes.
Kapin sa 100 ka exhibitors ang mosalmot sa Kadiwa nga gilangkoban sa mga lokal nga mag-uuma, grupo sa mga mag-uuma, ug micro, small, and medium enterprises (MSMEs) nga mamaligya ug presko nga mga prutas, utanon, bugas, isda, karne, processed products, ug handicrafts sa ubos nga presyo.
“Nalipay ako sa umaabot nga paglusad dinhe sa atong lalawigan sa KADIWA ng Pangulo nga ipahigayon sa Old Tagbilaran Airport, karong Marso 15,” pahayag ni Aumentado.
Pangunahan sa amahan sa lalawigan ang paglusad sa Kadiwa sa Bohol uban ni Presidential Assistant for the Visayas Usec. Terence Calatrava, isip guest of honor.
Ang Kadiwa (Katuwang sa Diwa at Gawa para sa Masaganang Ani at Mataas na Kita) usa ka convergence program aron masiguro ang suplay sa pagkaon sa kabanikanhan.
Kaabag niini ang Department of the Interior and Local Government (DILG), Department of Agriculture (DA), Bureau of Fisheries and Aquatic Resources (BFAR), Department of Trade and Industry (DTI), Department of Labor and Employment ( DOLE), Department of Social Welfare and Development (DSWD) ug ang Philippine Information Agency (PIA).
Gipasiugdahan ni Pres. Ferdinand R. Marcos Jr., ang programa sa Kadiwa nagtumong sa paghatag sa mga konsumidor ug akses sa barato ug dekalidad nga mga produkto, ilabina sa presko nga produkto, samtang nagtabang usab sa mga mag-uuma, mangingisda ug micro-enterprises sa pagbaligya sa ilang mga produkto sa patas nga presyo sa merkado.
Ang Kadiwa program, nga gipasiugdahan ni Presidente Ferdinand R. Marcos Jr., usa ka farm-to-consumer market chain nga nagwagtang sa mga intermediary, nga nagtugot sa mga lokal nga prodyuser nga makamugna ug mas taas nga kita pinaagi sa pagbaligya sa ilang mga produkto direkta ngadto sa mga konsumidor. Gitubag usab niini ang panginahanglan sa pagpausbaw sa produksiyon ug pagmentinar sa barato nga presyo sa mga batakang palaliton nga mopabor sa mga konsumidor. (Hulagway gikan sa PIA-Bohol)
BALAK
ANG GIPANGANDOY NGA HIMAYA
Sinulat ni Engr. Rogelio Podelino
Sa kapunawpunawan didto sa kalangitan
Mga angheles ug mga kerubines nag-ambahan
Naghimaya sa LANGITNON’G HARI
Ang tinubdan sa tanan’g kinabuhi
Ang pagpuyo sa tawo dinhi sa kalibutan
Sa hinulaman nga kinabuhi angay ampingan
Kay ang tanan aduna’y kinutuban
Busa mangandam sa takna nga tanan
Ang kalipay nga kalibutanon lumalabay
Sa katagbawan sa tawo dili makahumpay
Daw duna’y haw-ang sa imong galamhan
Nga gusto nimo nga pagahulipan
Kay ang tawo ulipon man sa sala
Ang iyang baruganan labihan kahaguka
Aron makalampas sa mga pagsulay
Dangop KANIYA aron dili ka magmahay
Ang kinauyokan nga tuyo pagpakabuhi sa tawo
Nga madagaya-on ang kahimtang sa husto
Kon unsa’y buhaton aron mahidangat sa langit
Ang dapit nga wala na ang mga kasakit
Matag tawo nga mituo nga aduna’y GINOO
Nangandoy nga sa IYANG gingharian makaadto
Didto ang tanan nagmaya sa wala’y katapusan
ANG GIPANGANDOY NGA HIMAYA kon motaliwan na kita ning kalibutan