BWUI nagpadayon paghatud ug tubig sa mga nagkalain-laing konsumidor
Sinulat ni Victor L. Tambis
Ang hulagway sa water truck sa Bohol Water nga mao ang naghatud ug tubig sa Tamblot St. haduol sa BPSTEA bldg.
Sa tinguha nga mapadangat ang tubig sa pipila ka dapit nga nakasinati sa kakulang niini dala sa El Niño, ang Bohol Water nagpadayon sa paghatud ug tubig sa mga konsumidor sa naasoy nga mga dapit pinaagi sa water truck.
Pagkakaron, ang mga lugar nga gihatagan ug unang pagtagad sa paghatud ug tubig mao ang mga lugar sa Rizal St, Tamblot St, nga duol sa BPSTEA bldg.
Gihatdan usab ug tubig ang mga konsumidor sa Torrero St, ug tanang sakop sa Brgy. Cogon niining dakbayan.
Lakip usab nga gihatagan ug pagtagad mao ang mga lugar nga makasinati ug susamang problema.
Tungod sa ka mahinungdanon sa maong water truck, ang Bohol Water adunay dugang pa nga usa ka unit sa water trunck nga gipaabot.
Kining maong bag–ong unit sa water truck, muabot karong bulan sa Octobre niining tuiga.
Gilauman sa Bohol Water nga niining mga umaabot nga bulan, ilabi na kon matapos na ang El Niño, mabalik na sa normal ang bul-og sa tubig nga magagikan sa mga tinubdan o pumping stations nga nahimutang sa lungsod sa Corella ug sa dakbayan sa Tagbilaran.
Gihatagan usab ug igong pagtagad sa Bohol Water ang pagbutang ug generator sets sa mga pumping stations uban ang operator nga anaa sa lungsod sa Corella.
Gihimo kiini aron sa pagtubag sa pagkapalong sa kuryente ilabi na ang PU#1 tungod sa ubos nga voltahe.
Bohol Light nagpahinumdom sa mga sumbanan sa pag-apply sa koneksyon sa kuryente
Sinulat ni Sheryl B. Paga
Kung mo-apply kita ug koneksyon sa kuryente sa Bohol Light Company Inc. (BLCI), mao kini ang mga lakang nga kinahanglan pagasundon.
Kung nagplano ka nga mobalhin ngadto sa bag-ong balay o opisina, o kung ikaw nagtukod ug building alang sa negosyo dinhi sa Tagbilaran City, kinahanglan ka nga mo-apply ug koneksyon sa kuryente sa Bohol Light.
Sulod sa milabayng 24 na ka tuig, ang Bohol Light naghatag ug serbisyo sa elektrisidad sa mga kabalayan, opisinahan ug mga establisemento nga mas bintaha ug mas kasaligan.
Lakip niini ang pagsubay sa maayo ug sayon nga proseso kung gusto ka nga magpa-konek ug kuryente.
Kining mosunod, mao ang mga gikinahanglan nga isumite sa usa ka applikante human ma-aprobar ang iyang koneksyon on site:
a.) Ang aplikante kinahanglan mokuha ug Certificate of Connection gikan sa Office of the Building Official (OBO) sa City Hall.
b.) Maghatag sa iyang Standard Electrical Plan nga pinirmahan ug selyado sa usa ka professional Electrical Engineer (PEE).
c.) Magkuha ug kopya sa Approved Vicinity Map gikan sa City Assessor’s Office nga nagpakita sa road right of way (RROW).
d.) Affidavit sa tag-iya sa yuta ug pagtugot alang sa private pole nga ilabi na kung naa nahimutang ang building sa 2nd lot or sa luyong bahin.
e.) Kopya sa approved subdivision plan nga nagpakita sa mga boundary sa yuta isip reference sa location alang sa metering. Aplikabol kini sa mga subdivision lamang.
f.) Kopya sa cedula sa building owner ug SPA sa owner’s representative.
g.) Kopya sa valid ID sa building owner.
h.) Building Permit
i.) Land Title
j.) Tax Identification Number nga makuha sa Bureau of Internal Revenue (BIR).
Kung makumpleto na ang mga dokumento nga gilista sa unahan, pagadalhon kini sa aplikante didto sa buhatan sa BLCI
Aron mahatagan siya ug payment order.
Human sa pagbayad, adunay 24 ka working hours nga ang customer mahatagan sa iyang supply sa kuryente.
Ang kabag-ohan sa atong Application Process Flow, gihimo sa Bohol Light aron dili masayang ang panahon ug malikayan ang pagbalik-balik sa atong mga konsumidor diha sa atong opisina.
Gihangyo usab ang mga aplikante nga iyang pagasundon ang mga standards sa atong electrical koneksyion.
Makita sa ubos ang hulagway sa New Process Flow For Application For Electric Service Connection
Alang sa dugang klaripikasyon, ang mga konsumidor mahimong motawag sa BLCI office pinaagi niining mga hotline numbers (038) 412-3503/ 501-7762 local 101; For Application Services – 09318524311 Local 103; For Power Interruptions –09223072161 Local 107; For Billing Matters – 09318524312 Local 200; For the General Information – 09318524310
Mahimo usab magpadala ug mensahe sa official Messenger account sa Bohol Light Company, Inc. o email at support@bohollight.com.
El Nino, nagkahinay apan epekto magpadayon pa
Sinulat ni Rey Anthony Chiu
Nagkahinay man ang El Niño subay sa forecast sa state weather bureau, magpadayon pa gihapon ang epekto niini ngadto sa Hunyo.
Kini maoy gipadayag ni meteorologist Leonardo Samar, sa local nga Philippine Atmospheric Geophysical and Astronomical Services Administration didto sa labing bag-o nga Kapihan sa PIA.
Masinati na nato ang nagpadayon nga pag-usab sa panahon sa El Nino, gikan sa labing pait ngadto na sa duol sa normal nga uwan-uwan nga kasagaran mahitabo sa Hunyo, dayag niya.
Apan, dugang niya, subay sa mga model nga gisundan sa weather bureau sa paghimo sa banabana sa panahon, may napakita nga nga 69 porsyento nga posibilidad nga human sa normal nga pag-uwan sa Hunyo, mapun-an ug .05 percent ang rainfall nga mao nay timailhan sa pagsugod sa La Niña sa Hulyo ngadto sa Septembre.
Kahinumduman nga nasinati sa Bohol ang mas ubos pa sa kasagaran nga uwan nga moabut unta sa Enero ngadto sa Marso, kanus-a natala sa monitoring sa PAG-ASA nga miabut sa 60 porsyento ang pagkunhod sa kasagarang uwan sa unang kwarter sa tuig.
Nunot niini, gideklara ang Bohol sa PAG-ASA nga napaubos sa taas nga paghuwaw, o taas nga lanat sa panahon nga walay uwan nga nasinati.
Kalabut sa miabut nga uwan, matud niya dili pa kadto ang sagad nga masinati sa Hunyo.
Iyang gipahinumdom nga ang bagyo nga Aghon nagdala sa wala matyempo nga uwan, nag nahimo usab nga maayong sinugdanan aron ang yuta mabisbisan ug makasugod sa pagporma sa gikinahanglan nga mga panganod alang sa Hunyo.
Duh aka adlaw nga uwan-uwan nga dili usab tibuok Bohol ang nakasinati, apan, matud niya, maayo na lang kay napaubos gyud ang kasagaran nga heat index.
Dala sa gitagna nga mas taas pa nga lanat sa epekto sa ting-init dala sa nagkahinay nga El Nino, gipanawagan sa PAG-ASA ang pagpadayon pa gihapon sa maayong bansay sa pagdaginot sa tubig, ug pagseguro nga permi ma hydrate ang lawas aron dili mabiktima sa dehydration.
TAAS PANG LABANGONON. Nagsugod na ug ka hilis ang El Nino apan ang taas nga lanat sa epekto niini, magpabilin pa nga mabati, mao nga hangyo sa PAG-ASA, padayon pa gihapon sa pagdaginot sa tubig, samtang wala pa ang normal nga pag-uwan-uwan. (Hulagway gikan sa PIA-Bohol)
Drugas nasakmit ubos ni Aris, sobra na’g P211 M
Sinulat ni Rey Anthony Chiu
Sugod sa paglingkod ni Gobernador Erico Aristotle Aumentado ug pagmandu dayun sa Philippine Drug Enforcement Agency (PDEA), Philippine National Police (PNP) ug kaalyado nga tigpatuman sa balaod, mikabat na ngadto sa 211,616,748 ang kinatibuk-ang bili sa illegal nga drugas nga nasakmit.
Kini human gisumada sa kapolisan sa Kampo Dagohoy ang kinatibuk-an nga accomplishments sa law enforcement sa supply reduction nga programa nga mas gisuportahan sa intelligence funds nga gisangon ngadto sa gobernador.
Sukad sa Hunyo diha nga minghural sa katungdanan ang gobernador ug dayun iyang gimandu nga seryosohon ang paglutos sa illegal nga drugas, hangtud sa Mayo 20 niining tuiga, nakahimo na ang kapolisan sa 1,115 ka operations lakip na ang buy bust, raids ug pagpatuman sa mga arrest warrants.
Niini usab, kinatibuk-an nga 1,258 ka mga tawo ang nadakpan human matumbok nga nahilambigit sa ilang arrest warrants, anaa sa lugar nga gi-raid ug napalitan ug illegal nga drugas sa kaso sa buy-bust.
Kinatibuk-an usab nga 31,120.11 ka kilo nga illegal nga drugas nga shabu ang nasakmit sa kinatibuk-an nga 18 ka buwan nga pagdumala sa kampanya kauban sa hepe sa PDEA ug sa PNP.
Segun sa taho sa Kampo Dagohoy, niadtong Hunyo 2022 ngadto sa Disyembre 2022, miabut sa 2,439.68 ka gramos o duha ka kilo kapin ang nasakmit. Niadtong tibuok 2023, miabut sa 14,059.97 ka gramos o 14 ka kilo kapin samtang sa 2024 taman sa Mayo, 14,620.46 ka gramos o 14 ka kilo kapin.
Kining tanan, subay sa standard price nga gilagda sa Dangerous Drugs Board, sa 2.4 ka kilo nga drugas nga nakuha niadtong 2022, mikabat na sa P16.5 milyones ang bili sa drugas nga nahikaw, pun-an pa sa P95.6 milyones sa kinatibuk-an nbga 2023 ug sa labing uwahi nga unom ka buwan, P99.4 milyones na ang nakuha sa kinatibuk-an nga bili nga P211.6 milyones na ang nakuha.
Dugang pa, niining tuiga, gikalipay usab sa mga tinugyanan ang kasayuran nga gilaraw nga gamiton ang usa ka pasilidad sa Cortes alang sa pagbutang ug Bohol Drug Dependents Rehabilitation Center.
Sa usa ka tigum sa gobernador kauban sa mga tinugyanan sa simbahan: Fr. Jingboy Saco, sa Diocese-Tagbilaran, Fr. Vic Uy, SVD sa HNU, Fr. Pepe Gupita Diocese-Talibon uban kang Dr. Salvador Benjamin Vistal isip consultant, Ma. Chona Egam ug Antonio Samante sa PDEA-Bohol, PLTCOL Norman Nuez sa BPPO ug Peter Dejaresco sa Bohol Chronicle para sa media, gisugdan nag tuki ang pagconvert sa Youth Home sa Cortes, isip drug rehab center.
Ang pasilidad sa Cortes, gamiton alang sa grabe na ang pagka-ungo sa drugas, apan matud sa gobernador gikinahanglan pa usab nga usbon ang mga lagda alang niini.
Samtang kini nagbadayon, aron dili malangan, giandam usab sa Bohol ang gikinahanglan nga sistema ug staffing sa command center aron may maka-focus niining maong programa.
Nanawagan usab ang gobernador sa partisipasyon sa komunidad, aron magmalampuson ang tinguha pagpalingkawas sa nga naulipon sa ginadili nga drugas.
Usa kini sa atong mga gikinahanglan sa atong tinguha nga mabatonan ang magmalinawon ang komunidad alang sa drug free environment.
DEMAND REDUCTION. Dili lang pagpawong sa supply, gilihok usab sa Kapitolyo ang pagpahiluna sa mga na-ungon na sa drugas nga mapahiuli sa ilang produktibo nga kahimtang aron mahibalik sa pagpanginabuhi nga tarong ug luwas na sa drugas, Kini gamit ang pasilidad sa rehabilitation nga natukod na didto sa Cortes. (Hulagway gikan sa PIA-Bohol)
Unang heirloom seeds harvest giselyohan
Sinulat ni Elvira Bongosia
Ang Heirloom Harvest nga proyekto nga mitapos sa usa ka malampusong harvest festival niadtong Mayo 16, 2024, nagtimaan sa usa ka kinalabwan nga milestone tulo lang ka buwan human sa paglusad niini sa Bohol District Jail Female Dormitory (BDJFD) ning syudad.
Niadtong Enero 29, 2024, si Agricultural Training Institute (ATI) Region 7 Center Director Gracia F. Arado ug ang tag-iya sa Green Gardens of Hope (GGH) nga si Emmanuel Gamonez, uban ni kanhi ATI-7 Center Director ug nagsilbi nga project consultant Dr. Carolyn Daquio ug Wardens Edgar del Rosario BJMP-Ubay ug Ivy Rose Pinat-BDJFD nga girepresentahan ni Psyche Posadas ug JO2 Larry Orillena isip mga saksi, milagda ug Memorandum of Understanding alang sa Heirloom Harvest: A Sustainable Legacy for a Nutritious Food Security project sa GGH sa lungsod sa Balilihan.
Ang proyekto nga usa ka hiniusang paningkamot tali sa ATI-7, GGH, ug BDJFD, usa ka testamento sa gahom sa public-private partnership.
Pinaagi sa paggamit sa potensyal sa heirloom seeds, ang proyekto dili lang nagsiguro sa malungtarong suplay sa produkto apan naghatag usab kini og usa ka therapeutic ug skill-building nga plataporma alang sa mga Persons Deprived of Liberty (PDL) sa correctional facility.
Ang impresibong abot sa BDJFD naglakip sa 11 ka kilo nga okra, 6.5 kilo sa pipino, 3.5 kilo sa lettuce, 1.5 kilo sa spinach, ug 1.25 kilo sa pulang lingin nga radish. Dugang pa, ang reserbasyon sa 10,864 ka liso sa mga okra ug 1,766 ka liso sa pepino alang sa seed banking nagpasiugda sa pasalig sa dugay nga pagpadayon niini.
Isip usa ka testamento sa epekto sa proyekto, ubay-ubay nga donasyon nga 1,200 ka mga liso sa red-orange okra gihimo ngadto sa Bohol District Jail-Ubay alang sa umaabot nga pagtanum, dugang nga pagpalapad sa pagkab-ot ug impluwensya sa inisyatibo sa Heirloom Harvest.
Nitambong atol sa kalihokan silang Acting Warden Ma. Joy Torreon, JO1 Psyche Posadas, Engr. Rizaldy Mercadal, Acting Chief sa PASS ug ang Information Officer sa ATI-7 nga si Doris Isabel Racho, kauban si Engr. Emmanuel Gamonez, tag-iya sa GGH.
Gitambongan usab kini nila Maria Theresita Ramirez sa Mayor Lucas Asotigue Learning Site for Agriculture ug kanhi Baclayon Vice Mayor Marilyn Bobsie Uy nga usa usab ka agri-enthusiast.
BALAK
SA MATAG PITIK SA KASINGKASING
Sinulat ni Engr. Rogelio Podelino
Ang kasingkasing maoy tubod sa kinabuhi
Dugo naglatay sa kaugatan aron tawo mabuhi
Diha sa kasingkasing mogitib ang gugma
Kon hinog na sa panahon moabot ang takna
Ang lig-on nga sumbanan sa paghigugma
Ang balaanong kasugu-an maoy subaya
Sa pagpamitas sa mga nangalimyong mga bulak
Aron padaygan sa imong gugmang busilak
Kung lunsay ug dalisay ang imong gugma
Sa pagpangaliyupo sa dalaga dili ka motaka
Andam kang mosuong sa mga pagsulay
Sa taas nga panahon ikaw molahutay
Kay hinukad sa kasingkasing ang imong gugma
Walay makababag sa imong tinhuha sa dalaga
Ang tawong mag-antos sa kaulahian masantos
Kay ang imong gugma busilak ug tim-os
Ug miabot ang bulawanong higayon
Nga ang matam-is nga pasaleg gipahigayon
Daw gibayaw ka sa ika pitong langit
Kay ang gugma sa imong sinayuran nasungkit
Apan adunay laing gugma imong ampingan
Ang gugma alang sa GINOO nga labaw sa tanan
Bisan nakasala ang tawo batok sa GINOO
Gihigugma gihapon sa GINOO ang tawo
Ang paghigugma sa GINOO maoy labing balaan
Sa pagtuman sa IYANG mga kasugu-an
Higugma-a ang GINOO sa tibuok mong balati-an
SA MATAG PITIK SA IMONG KASINGKASING
sulod sa imong dughan.