BLCI padayon nagpatuman sa R.A. 11361.
Sinulat ni Sheryl B. Paga
Ang Anti-obstruction of Power Lines Act (R.A. 11361) usa ka balaod nga nagsiguro sa padayon nga pagpasa ug pag-apod-apod sa elektrisidad ug kasaligan nga mga linya sa kuryente ngadto sa mga konsumidor. Ang Department of Energy (DOE) hugot nga naglantaw sa mga Electric Distribution Utilities sama sa Bohol Light Company, Inc. kabahin niining maong kamanduan.
Matag tuig adunay isumite ang Bohol Light nga mga datos mahitungod sa aktwal nga implementasyon sa maong balaod sa gisundan nga tuig uban ang mga kasamtangang plano ug mga kalihukan.
Ang maong balaod naglatid niining musunod nga mga katuyuan:
a. Aron masiguro nga walay hunong ang pagdala sa supply sa elektrisidad gikan sa mga power producers ngadto sa transmission facilities padulong sa mga distribution utilites hangtod ngadto sa tagsa-tagsa ka mga panimalay/establisimyento nga gitawag nato ug mga end users;
b. Pagsiguro nga ang mga dapit nga giagian sa mga ekipo ug pasilidad sa kuryente dili peligro ug delikado tungod ba kahs sa mga obstructions nga natungod o naduol sa linya;
c. Ang pagsiguro nga nahibawo ang mga hingtungdang tag-iya sa yuta sa kamahinungdanon sa ikang tahas sa pagsiguro nga ang mga linya sa kuryente magpabiling gawasnon sa bisan unsang delikado nga mga kalihokan.
Hingpit nga ginadili ang pagtanum ug bisan unsang matang sa mga kahoy nga muta-as o mutubo sama sa makita sa ubos:
Obligasyon usab sa Bohol Light ang paghimo ug regular nga maintenance and inspection activities sa tibuok sakop sa franchise area nga mao ang Tagbilaran City.
Tungod niini, nag-awhag ang buhatan sa BLCI (Bohol Light Company, Inc.) ngadto sa mga konsumidor nga maghatag ug pagtugot kung adunay muanha sa inyong mga panimalay ug mananghid nga pagapu-ongan ang mga sanga sa kahoy aron malikayan ang kadaot kung kini masangit o matumba diha sa linya sa kuryente.
Nagadasig usab ang Bohol Light ngadto sa mga konsumidor sa pagpahibalo gilayon sa opisina kung aduna kamoy namatikdang mga sanga sa kahoy, palwa sa lubi o bisan ubsa nga punu-an nga nagharag na ug paduol na sa linya sa kuryente, aron mahatagan ug aksyon sa labing sayong panahon.
Ang numero nga pagatawagon mao ang mobile phone number 0922-307-2161. Makita sa ubos ang hustong sitwasyon sa mga lugar nga adunay distribution facilities.
Alang sa dugang nga katin-awan, ang mga konsumidor mahimong motawag sa BLCI office pinaagi niining mga hotline numbers: Landline Nos. (038) 412-3503/ 501-7762 local 103; Mobile No: 0931-852-4310. Mahimo usab nga magpadala ug mensahe sa official Messenger account sa Bohol Light Company, Inc. Pinaagi sa email: support@bohollight.com.
Dugang Pagpakunhod sa NRW gihimo sa BWUI
Sinulat ni Victor L. Tambis
Makita sa hulagway ang mga tinugyanan sa BWUI (Bohol Water) nga nagpuli sa mga gabok nga tubo sa tubig,
Sa tinguha nga madugangan pagpakunhod ang Non-Revenue Water (NRW) sa Bohol Water, ang maong Kompanya nag implementar sa programa sa NRW-Reduction diin nagatutok kini sa pag-ugmad sa sistema pinaagi sa pagpakunhod sa system’s loss nga sa pagkakaron anaa sa 13%.
Ang mga kalihokan sa NRWR program nagalakip sa mga mosunod (1) pagpuli sa mga gabok nga linya sa tubo; (2) paghatag ug dinalian nga pagtagad sa mga leak; (3) pagsuta sa mga underground leak pinaagi sa paggamit sa “leak correlator logger”; (4) pagtaud ug mga district meters; (5) pagkampanya batok sa illegal connection diin ang mga tubig nausik gikan sa tinubdan or unaccounted water.
Usa sa mga sukdanan sa maayo nga pagpadagan sa sistema sa panubig mao ang ubos nga system’s loss. Gani, ang NWRB, ang ahensya sa gobyerno nga nagregulate sa tanang water provider, nagpagawas ug resolution mahitungod sa sumbanan sa pagduma sa panginahanglan sa tubig nga gi supply sa mga water providers sa tibuok nasud.
Ang maong Resolution (No. 08-0324) pinitsahan ug March 18, 2024, naga awhag sa mga water operators sa paghatag ug pagtagad sa tagsa-tagsa ka mga NRW aron mapakunhod ang mga system’s loss agi’g tubag sa kanihit sa tubig epekto sa El Niño.
SP magtugot sa Bohol Gov paglagda sa MOA sa Azolla
Sinulat ni Rey Anthony Chiu
Tugtan sa Sangguninag Panlalawigan si Gobernador Erico Aristotle Aumentado, o si bise gobernador Victor Dionisio Balite sa iyang kadtungod karon nga maoy modala sa ngalan sa Kagamhanang Probinsyal sa Bohol sa kasabutan nga sudlan niini tali sa Lungsod sa Batuan ug sa Bohol Upland Farmers Federation of Cooperatives inc. (BUFFCI) alang sa katukoran sa Azolla Greenhouse didto sa Batuan.
Ang Azolla Greenhouse gilantaw nga makahatag ug mas barato nga pilianan sa tuktokon sa mga manok, ilabi na naidtong nagbuhi ug nagpasanay sa manok bisaya dinhi.
Ang Azolla, usa ka matang sa pako nga naglutaw sa tubig, ug paspas kayo nga modaghan.
Us aka natural nga tinubdan sa organic nga abono, ang azolla namatikdan na sa mga lagtuon nga may daghang positibong epekto sa tanum, pagpa-uli sa yuta ug kon gamiton sa pagsahog sa patuktok sa manok, ang Azolla buhong sa amino acids sa iyang mga protina nga kasagaran himoon nga pamuli sa mga mahalon nga amino acids nga makuha sa commercial feeds.
Niadtong mayo 29, ang SP Committee on Agriculture nagtigum aron tukion ang hangyo ni Gob Aumentado sa pagtugot sa paglagda sa Memorandum of Agreement tali sa lungsod sa Batuan ug sa BUFFCI kinsa mao karon ang nag-unang bahan sa mga Bol-anon nga namuhi ug nagpasanay sa manok bisaya.
Alang sa BUFFCI, ang pagtukod sa Azolla Greenhouse didto sa duol sa ilang manok pasanayan sa Cambacay, Batuan, Bohol, kabahin sa proyekto sa Bohol ubos sa Native Chicken Enhancement Program nga gipatuman sa Lungsod sa Batuan pinaagi sa Municipal Agriculture Office, ug sa BUFFC.
Kahinumduman nga ang BUFFCI, nakadawat ug hinabang sa Philippine Rural Development Project (PRDP) human nga gipapundohan sa Bohol ang Native Chicken Breeding ug Chicks Hardening Facility apil na ang Marketing Enterprise sa Batuan.
Ug sanglit, mahal ang commercial nga patukatok sa manok, ang Azolla Greenhouse Project gilantaw nga maghimong sayon makuha ang organikong tinubdan sa tuktokon diha sa barangay labi na gyud sa pasilidad sa pasanayan sa manok bisaya.
Segun pa ni Dr. Stella Marie Lapiz, Provincial Veterinarian, ang patuktok sa manok milangkob sa kinatibuk-an nga 70%-80% sa kinatibuk-an nga galastohan sa pagpamuhi ug manok bisaya, mao nga kon makahimo na ang Bohol sa ilang kaugalingon nga tuwa sa manok nga gikan sa silinganan, angan kining tutokan aron mamenosan ang pagpamalit sa mahal nga tuwa.
Niini, gitumbok usab ni Dr. Lapiz nga sa mga local nga tuwa sa manok nga pwede makuha, ang azola adunay taas nga protina, mao nga kon matuman ang gilaraw nga Azolla Greenhouse, may 70 ngadto sa 80 ka kilo nga azolla ang magamit sa Bohol matag semana.
Kon mogamit sa azolla, natural momenos ang kita-on sa mga namuhi ug manok bisaya ug mapadaghan na ang supply sa mas barato ug lami-an nga karne sa manok alang sa tanan.
Sa MOA, gitumbok didto nga ang Bohol maoy magpabarug sa usa ka Azolla greenhouse nga may kadak-on nga 87 metros kwardado, kini pagapundohan sa 20% Development Fund sa Office of the Provincial Veterinarian.
Ang OPV usab maoy maghatag sa teknikal nga suporta sa pagdumala sa Azolla Greenhouse, pagmonitor sa pagpatuman sa proyekto ug sa pagpadagan niini.
Sa laing bahin, ang Batuan maoy mohatag sa 87 metros kwadrados nga luna didto sa Cambacay samtang gikasabutan nga kon dili na gamiton isip Azolla Greenhouse, itugyan na sa Batuan ang gitukod nga pasilidad.
Ang BUFFC usab maoy mohatag sa teknikal nga tabang sa pagpalahutay sa operasyon sa Azolla Greenhouse, pagtumbok sa mobantay niini human kini mahatagan sa bansaybansay sa pagpatunhay ug pagpadagan sa proyekto ug pagpahiluna sa mga lagda sa paggamit sa Azolla labi na sa paghimo sa regular nga mga taho sa pagpatuman sa proyekto.
Hunyo 17 usa ka holiday tungod sa ‘Eid’l Adha’
Sinulat ni Rey Anthony Chiu
Magpaabt sa taas nga holiday sa Hunyo 15-17, 2024, kini human gideklara na ni Presidente Ferdinand Marcos Jr and Junyo 17 nga holiday.
Kini usab magpadugang sa holiday sa Hunyo human sa kasaulogan sa kaugalingnan sa Hunyo 12.
Pinaagi sa Proklamasyon 579, gideklara ni PBBM ang Hunyo 17 nga regular nga holiday sa tibuok nasud aron kahatagan ug higayon ang katawhan nga magsaulog sa Eid’l Adha (Pangilin sa Pagsakripisyo)
Matud pa sa proklamasyon, ang Eid’l Adha usa sa duha ka mga dagko nga kasaulogan sa mga Muslim.
Sa Republic Act 9849, gideklara ang ila napulo ka adlaw sa Zhul Hijja, ang ika napulo nga buwan sa Islamic Calendar, isip nasudnong holidaytungod sa paghandum sa Eid’l Adha.
Girekomendar usab sa National Commission on Muslim Filipinos ang Hunyo 17 =, Lunes isip mao nay nasudnong holiday tungod sa Eid’l Adha.
Ang proklamasyon, gilagdaan ni Exec Secr3etary Lucas Bersamin sa ngalans a Presidente Hunyo 4, 2024.
GSIS members nga naapektuhan sa El Niño mahimo nang mo-apply ug emergency loan
Sinulat ni Elvira Bongosia
Gipahibalo sa Government Service Insurance System (GSIS) nga mahimo nang mo-apply ang ilang mga aktibong miyembro nga naapektuhan sa El Niño ug emergency loan.
Matud pa ni Sherwin B. Viva, GSIS-Bohol Frontline Service Division Chief, nga ang emergency loan magamit na sa tanang mga kwalipikadong aktibong miyembro nga nagtrabaho o nagpuyo sa lalawigan sa Bohol.
Gitambagan ni Viva ang mga miyembro nga mag-aplay pinaagi sa GSIS Touch mobile app alang sa kasayon ug kombenyente.
Matud pa nga ang mga old-age/disability nga mga pensioner nga nagpuyo sa probinsiya mahimo usab nga maka-avail pinaagi sa Over-The-Counter (OTC) transaction.
Ang panahon sa pag-apply sa maong loan molanat gikan Hunyo 5, 2024 hangtod Hulyo 4, 2024.
Ang GSIS nigahin ug P4.3 bilyones alang sa emergency loans sa ilang mga miyembro ug pensioners sa 17 ka mga dapit sa nasud nga grabeng naapektuhan sa El Niño.
Kahinumdoman nga ang Probinsya sa Bohol nideklarar ug state of calamity tungod sa epekto sa El Niño phenomenon.
Ang Provincial Board, sa regular session niini niadtong Mayo 21, 2024, nga gipangulohan ni Bise Gobernador Dionisio Victor Balite, mi-aprobar sa pagdeklarar ug state of calamity sa probinsiya.
Sa binuwan nga tigom sa Association of United Development Information Officers (AUDIO)-Bohol niadtong Mayo 24, 2024 sa The Farm at Alicia, gi-awhag ni GSIS-Bohol Information Officer ug Frontline Service Division Chief Sherwin B. Viva ang mga information officers sa mga lungsod ug national government agencies sa lalawigan sa Bohol sa pag-download ug paggamit sa GSIS Touch mobile app alang sa kasayon ug kombenyente. (Hulagway gikan sa PIA7-Bohol)
BALAK
ANG GINOO AY GUGMA
Wala’y tawo makatugkad sa gahum sa GINOO
Kon unsa’y IYANG gibuhat para sa tawo
Tanan’g kaayuhan gihatag NIYA
Aron ang tawo mabulahan siya
Gipahiluna ang tawo sa harden sa Eden
Wala tumana sa tawo ang IYANG gibilin
Mikaon sa prutas nga gidili
Gipapahawa ang tawo sa Eden ug dali dali
Bisan pa sa pagka makasasala sa tawo
Gihigugma gihapon ang tawo sa GINOO
Nagbilin SIYA ug saad sa tawo
Nga luwason ra ang tawo sa GINOO
Kay ang tawo masupilon man pag-ayo
Gipa-antos ug dugay sa GINOO
Ang mga Israelitas pinili nga mga tawo
Nag-antos pagka ulipon sa taga Egypto
Hangtud mi-abot si Moses aron mahaw-as sila
Sa pagka ulipon sa taas nga panahon na
Kay ang Pharaoh sa Egypto nagmagahi man
Napulo ka milagro ang gikinahanglan
Mi-abot ang panahon katawhan luwason na
Si Birhen Maria ang ANAK gipanamkon niya
Sa lalang sa ESPIRITU SANTO
Ang BUGTONG ANAK nahimo’ng tawo
Nagpuyo isip tawo dinhi sa kalibutan
Gisakit ug namatay diha sa krus labihan
Sa kamatayon sa BUGTONG ANAK
Ang kara-an’g templo nabu-ak
Sa kamatayon sa ANAK mihilak ang langit
Ug nabalot ang kalibutan sa kangitngit
Dayon naghimaya kay luwas na ang karawkan
Ug ang gangha-an sa langit naablihan
Tungod sa daku’ng gugma sa GINOO
Gisakripisyo ang ANAK aron maluwas ang tawo
Ang gugma sa GINOO sa mga katawhan
Dili ni bisan kinsa’ng linalang matumbasan
Dili matugkad ang gugma sa GINOO
Gikinahanglan lang hugot ang pagtuo sa tawo
Kay kita’ng tawo kang Adan mang kaliwat
ANG GINOO AY GUGMA sa tanan’g binuhat