FIRE DRILL GIHIMO SA BOHOL WATER
Sinulat ni Victor L. Tambis
(Makita sa hulagway sa itaas ang mga kawani sa Bohol Water, sinaksihan sa mga personahe sa Bureau of Fire Protection, nga naghimo sa tinuig nga Fire Drill didto sa opisina sa BWUI)
Sa tinguha nga makanunayong andam ilabi na panahon sa mga katalagman nga magpanghitabo sama sa sunog, ang Bohol Water naghimo sa Fire Drill nga didto kini himoa sa BWUI compound, 613 Bantol St, Dampas, Tagbilaran City.
Ang maong kalihokan nga gihimo niadtong June 21, 2024, ubos kini sa supervision sa Bureau of Fire Protection (BFP).
Ang mga tinugyanan sa BFP naghimo usab ug lecture kon unsa ang una ug angay buhaton aron sa pagpakig-asdang sa kalayo.
Human sa maong lecture gisunod dayon ang Fire Drill and demonstration. Ang fire drill usa ka tinuig nga kalihokan diin nagpasundayag kini sa actual nga pag execute sa tagsa-tagsa ka mga katungdanan o role nga nahitala sa Emergency Preparedness and Response Team (EPRT).
Gawas nga mando kini sa Depertment of Labor and Employment (DOLE), mahinungdanon gayud kaayo sa usa ka establisimento sama sa Bohol Water nga adunay grupo nga gitahasan aron sa dinalian nga pagtubag sa mga katalagman nga magpanghitabo.
Ang EPRT sa Bohol Water gilangkoban sa Chief Marshall nga mao ang General Manager nga si Christine Ranay, Deputy Chief Marshall nga ang Operations Manager nga si Clement George Chiu, Safety Coordinator nga si Leizel Butawan ug ang Ass’t. Head Distribution Officer nga si Nilo Miculob.
Mapasalamaton ang Bohol Water ngadto sa mga tinugyanan sa BFP, pinangulohan ni Chief Fire Marshall CInsp. Matt Reil C. Puno, sa malamposon nga pagpakig-alayon sa maong kalihokan.
Bohol Light Padayon sa Clearing ug Upgrading Activities
Sinulat ni Sheryl B. Paga
Obligasyon sa usa ka distribution utility ang pagmintenar sa sa mga distribution line facilities aron pagsiguro nga luwas sa kadaot ug mahatagan ug husto nga power reliability ang mga lugar nga nasakop sa franchise area niini.
Ang Bohol Light Company, Inc. padayon nga naghimo ug mga clearing operations dinhi sa syudad sa Tagbilaran sa tinguha nga makapadayon sa paghatag og dekalidad nga serbisyo sa kuryente.
Aduna kitay mga kalihokan sama sa modification sa mga oversagging secondary lines, pagpuli sa mga kahoy nga poste ngadto sa concrete poles, stringing ug upgrading sa mga primary nga distribution lines, splitting of loads sa mga common distribution transformers ug pakorihir sa mga accessoties niini susama sa hotspot aron malikayan ang mga low voltages or power fluctuations ug pagpamutol sa mga sanga o punoan sa kahoy nga hapit na motandog sa distribution lines sa BLCI.
Ang maong kalihokan dako ug tabang aron maminusan ang wala planoha nga mga pagkabalda sa kuryente ug mapauswag ang power efficiency ug reliability dinhi sa dakbayan sa Tagbilaran.
Giawhag sa Bohol Light ang kooperasyon sa mga konsumidor kung adunay mga service lineman nga mangayo sa inyong pagtugot kung ugaling nga mubarog ug poste diha sa boundaries sa mga yuta o mga sanga/punoan sa kahoy nga maapektuhan niining atong mga kalihukan. Basi usab kini sa mandata sa Department of Energy ubos sa balaod Republic Act 11361 kabahin sa Anti Obstruction of Power Line Act.
500 ka ektarya nga umahan sa Bohol makabenepisyosa hapit na mahuman nga proyekto sa irigasyon – PBBM
Sinulat ni Elvira Bongosia
Atol sa iyang pagbisita sa syudad sa Tagbilaran alang sa pag-apod-apod sa hinabang sa gobyerno adlaw’ng Biyernes, Hunyo 28, si Presidente Ferdinand R. Marcos Jr. nipahibawo nga mahuman na sa dili madugay ang Mabini-Cayacay Small Reservoir Irrigation Project.
“Ikinagagalak ko na ipabatid sa inyo na ang Mabini-Cayacay Small Reservoir Irrigation Project ay malapit ng matapos (Nalipay ako sa pagpahibalo kaninyo nga hapit na mahuman ang Mabini-Cayacay Small Reservoir Irrigation Project), matud pa ni Marcos sa iyang pakigpulong.
Gipadayag sa Presidente ang paglaum nga ang hapit na mahuman nga proyekto makahatag ug tubig sa kapin sa 500 ka ektarya nga umahan sulod sa duha ka lungsod samtang sila maulian gikan sa epekto sa El Niño.
“Nawa ay mapapakinabangan na [nga] ito sa lalong madaling panahon, nang mabigyan ng sapat na patubig ang lampas na limang daang ektaryang sakahan sa bayan ng Mabini at ng Alicia (Manghinaut ko nga mapahimuslan ninyo kini sa labing madali nga panahon aron mahatagan ug igong suplay sa tubig ang kapin sa 500 ka ektarya nga mga umahan sa lungsod sa Mabini ug Alicia),” matud pa ni Marcos.
Ang Pangulo mipasalig usab nga ang gobyerno magpadayon sa paghimo ug mga proyekto nga makatabang kanila sa pagbangon ug pagpalambo sa ilang panginabuhian.
Nanawagan usab siya sa mga ahensya sa gobyerno ug lokal nga kagamhana nga sigurohon nga ang mga hinabang nga ilang gidala sa lainlaing mga probinsya makaabot sa mga benepisyaryo.
Sa iyang pagbisita sa Bohol, gitunol ni Marcos ang mga pakete sa tabang sa agri-fishery, lakip ang mga makinarya sa panguma, kagamitan sa pangisda, mga liso ug mga abono isip kabahin sa padayon nga pasalig sa Department of Agriculture (DA) sa pagpauswag sa sektor sa agrikultura taliwala sa mga hagit nga dala sa krisis.
Nahatagan ug cash assistance nga P10,000 ang 20 ka piniling benepisyaryo gikan sa Bohol ug Cebu, ingon man P100 milyones nga hinabang pinansyal sa 2 ka kagamhanang probinsiyal.
Gipangunahan ni Presidente Ferdinand R. Marcos Jr. ang pag-apod-apod sa Presidential Assistance to Farmers, Fisherfolks and their families (PAFF) sa Carlos P. Garcia Sports Complex, syudad sa Tagbilaran adlaw’ng Biyernes, Hunyo 28, 2024. Nakadawat ang mga mag-uuma ug mangingisda sa Bohol ug P10,000 nga cash aid ug 5 kilos nga bugas gikan sa gobyerno. (Hulagway gikan sa PIA-Bohol)
PBBM mipasalig sa pagtabang sa mga mag-uuma, mangingisda sa Bohol
Sinulat ni Elvira Bongosia
Si Presidente Ferdinand R. Marcos Jr. niadtong Biyernes mipasalig sa pagpalambo sa kinabuhi sa mga mag-uuma ug mangingisda sa lalawigan sa Bohol.
Sa iyang pakigpulong atol sa pag-apud-apod sa Presidential Assistance to Farmers, Fisherfolk, and Families (PAFF) sa probinsiya, si Marcos misaad nga ipadayon ang mga programa nga gilaraw aron mapausbaw ang panginabuhi sa mga Boholano.
“Hindi namin titigilan at hindi [kami] titigil [sa] pagsisikap upang maibigay ang inyong mga pangangailangan. Walang sawa kaming [magpapatupad] ng mga programang [makabubuti] po sa inyo, magsasagawa ng mga iba’t ibang proyektong [makapagbibigay] ng ginhawa sa inyong buhay, at [mamumuhunan] para sa inyong kapakanan at kasaganahan,” ang Presidente mipahayag.
Sa padayon nga paningkamot sa pagtabang sa mga komunidad nga makabangon gikan sa krisis sa El Niño sa Central Visayas, ang Presidente personal nga mibisita sa probinsiya sa Bohol aron sa paghatag sa nagkalain-laing tabang sa gobyerno ngadto sa mga mag-uuma, mangingisda ug mga pamilya sa usa ka programa sa Carlos P. Garcia Sports Complex sa syudad sa Tagbilaran.
Si Marcos mitunol sa agri-fishery assistance packages, lakip na ang mga makinarya sa panguma, kagamitan sa pangisda, mga liso ug mga abono isip kabahin sa padayon nga pasalig sa Department of Agriculture (DA) sa pagpauswag sa sektor sa agrikultura taliwala sa mga hagit nga dala sa krisis.
Human sa pag-apod-apod sa mga serbisyong suporta, ang Presidente nanghatag ug cash assistance nga nagkantidad ug P10,000 matag usa ngadto sa 20 ka pinili nga mga benepisyaryo gikan sa Bohol ug Cebu, ingon man ang P100 milyones nga hinabang pinansyal ngadto sa duha (2) ka probinsiya.
Dugang pa, ang Department of Social Welfare and Development (DSWD) nag-apod-apod ug cash assistance nga P10,000 matag usa ngadto sa 10,000 ka mag-uuma ug mangingisda ubos sa Ayuda para sa Kapos ang Kita (AKAP) Program.
Ang ubang mga ahensya sa gobyerno sama sa Department of Trade and Industry (DTI), Department of Labor and Employment (DOLE), Technical Education and Skills Development Authority (TESDA), ug Office of House Speaker Ferdinand Martin Romualdez ang nagpaabot sa ubang mga porma sa tabang sa giila ang mga benepisyaryo ug mitambong sa maong kalihokan.
Gitunol ni Presidente Ferdinand R. Marcos Jr. ang P50 milyon nga tseke kang Bise Gob. Dionisio Balite ang alang sa Bohol nga Presidential Assistance to Farmers and Fisherfolk and their Families (PAFF), dugang sa tabang pinaagi sa mga ahensya sa nasudnong gobyerno sama sa DTI, DOLE, TESDA, ug DA sa iyang gitawag whole-of-government approach sa pagpatuman sa programa. Ang ceremonial distribution gipahigayon niadtong Hunyo 28, 2024 sa CPG Sports Complex, sudad sa Tagbilaran. (Hulagway gikan sa PCO/PIA)
Atul sa unang PBBM Pres Visit Lain pa nga P7M itunol sa 3 NGA isip hinabang
Sinulat ni Rey Anthony Chiu
Gawas sa possible nga minilyon nga ibilin ni Presidente Ferdinand Marcos Jr sa Bohol pinaagi sa iyang gipundohan nga Presidential Assistance to Farmers, Fisherfolk ug ilang Families (PAFFF), may mga ahensya usab sa kagamhanan nga nagpatuman sa ilang mga programa pang-ayuda ang moduyog pinaagi sa paghatag sa kapin sa P7 milyones nga hinabang kapanginabuhian ngadto sa ilang mga gitabangan nga kahugpungan ug indibidwal.
Sa kilid sa kalihukan nga pagpang-apud-apud sa Presidente sa iyang tabang, ang Department of Labor and Employment (DOLE) may kinatibuk-an usab nga P 4,193,934 nga bili sa tabang panginabuhian alang sa upat ka proyektong ilang gisuportahan, nga may kinatibuk-ang 133 ka mga benepisaryo.
Upat ka mga representante sa mga kahugpungan sama sa Pagsa Multi-Purpose Cooperative nga naghimo ug bino gikan sa lomboy ug bugnay nga makadawat ug P911,760.00, sa Alburquerque Calamay Makers Tagb City Port vendors nga makadawat ug P999,948.00, sa Kapunongan sa Mang-asinay sa Alburquerque nga tighimo sa asin tibuok nga napundohan ug P99,990.00 ug sa parent Workers Association sa Causwagan Nortes sa Catigbian nga may pundo na nga P366,496.00, ang modawat sa ilang mga pundo, sinaksihan sa Presidente ug sakop sa Cabinet nga iyang iuban.
Laing pa usab nga tabangan ug modawat sa ilang mga sweldo abag sa kalisud ang 14 ka mga empleyado sa gipasira nga Captains Peak Resort sa Sagbayan nga modawat sa kinatuibuk-ang P131,040 ug laing pasweldo sa 360 ka LGU Balilihan Displaced Workers nga mikantidad ug P1,684,800, taho ni DOLE Bohol employment officer Maria Eloida Cantona.
Ang DTI usab may itunol nga 25 kilos nga bugas ug P8000 nga bili sa mga groceries ngadto sa siyam ka mga kanhi rebelde apan mipili na nga mangnabuhi nga malinawon, matud ni Provincial Director Vierna Teresa Chiu-Ligan.
Ang 9 ka mga benepisaryo, kabahin lamang sa 78 ka mga KR nga gitabangan sa DTI pinaagi sa Pangkabuhayan sa Pagbangon at Ginhawa (PPG).
Gani, taho sa hepe sa DTI, gipaabut na usab nila ang lain pang P1.2M nga pundo alang sa pagpadayon niining proyekyo.
Sa laing bahin, ang TESDA mohatag sa 20 ka mga benepisaryo niini sa pundo alang sa bansaybansay sa Organic Agriculture Production NC II nga mokamntidad sa P627,816.00 ug lain pang 20 ka mga benepisaryo sa starter kits alang sa Shielded Metal Arch Welding nga mokantidad ug tag P15,00 ang kada usa sa kinatibuk-ang P300,000.
Suma total, ang TESDA mohatag sa P927,816.00 anang adlawa, matud ni Carlito Quintano, Provincial Director.
Ang mga Kongresista usab sa Bohol mohanatag ug tag 5 kilo nga bugas sa matag benepisaryo nga motambong sa kalihukan.
Gibanabana nga 7500 sa mga motambong sa kalihukan sa Presidente gikan sa District 1, District 2 ug District 3 samtang laing P2500 ang magagikan sa syudad sa Tagbilaran ug sa Kapitolyo sa Bohol.
BALAK
ANG LINTUNGANAY SA ATONG PAGPAKABUHI
by Engr. Rogelio Podelino
Matag tawo sa ibabaw ning kalibutan
Tagsatagsa ug alan nga gi-agi-an
Kay tawo gihatagan ka man ug kagawasan
Ikaw ang magbuot sa imong kagustuhan
Manginabuhi sa pa-agi nga matarong
Aron sa katilingban ikaw makaharong
Dili magbuhat nga supak sa IYANG mga sugo
Hikalimti ayaw ang matag adlaw nga pag-ampo
Apan kalibutan sa mga buhi malinglahon
Na-a sa palibot ang mga matentalon
Agnihon ka sa kalibutanon’g kalipay
Aron imong kasub-anan mahupay
Tawhanon kina-iya ang kasaypanan
Magupok ang iyang baroganan
Mopasulabi ang lawasnon’g kahidlaw
Ang iyang pagka maligdong mahanaw
Ang pagpakgang sa mga tental dili tiaw
Kay ang balati-an labihan’g gi-uhaw
Kinahanglan bug-os ang imong baroganan
Aron kahigayonan pagpakasala mapugngan
Kay dinhi sa walug sa mga buhi
Nagkadaiya ang mga buluhaton nga hiwi
Magbaton ka ug baroganan’g timgas
Aron sa mga kasal-anan dili ka magasgas
Kay sa matag adlaw nimo’ng pakigbisog
Sungsungon ang makusog nga sulog
Likayan ang mga kahilayan
Aron mopadayon ka sa unahan
Kay katapusan sa kinabuhi dili man kapugngan
Ang tanan aduna may utlanan
Magsubay sa matarong nga dalan
Aron wala kay kabilinggan
Kay atong tinguha makaabot unta sa langit
Paghimaya sa GINOO sa hingpit
Magmatngon ka tawo sa imong kinabuhi
KINI ANG LINTUNGANAY SA PAGPAKABUHI