BLCI mihimo sa Corporate Social Responsibility nga kalihukan
Sinulat ni Sheryl B. Paga
Ang mga kalihukan sa “ADOPT A COMMUNITY CSR PROGRAM” sa Bohol Light Company, Inc. (BLCI) gihimo atol sa ilang kasaulugan sa ika-24 ka tuig sukad sa ilang katukuran.
Ang maong anibersaryo adunay tema nga “Pag-atiman sa paghigugma ug pagpaambit pinaagi sa paghatag balik sa mga tawo ug sa kinaiyahan”.
Malampuson ang mga programa nga gihimo sa BLCI gikan sa Hulyo 20 – 27, 2024. Ang maong mga kalihukan naglakbit niining musunod:
* Salo-salo sa mga empleyado atol sa Anibersaryo
* Paglimpiyo sa Baybayon
* Programa sa Pagpakaon (Feeding Program)
* Pag-apud-apod sa mga Gamit sa Eskwelahan
* Rice-to-Feed Consumer Week Program
Nagpatuman ang BLCI niining tinuig nga mga programa agi ug bulontaryo nga tabang ngadto sa komunidad, kinaiyan/kalikopan, aron paghatag ug pag-alagad sa mga konsumidor.
Sa Bohol Light, ang kinabuhi dakong bahandi.
Pagpanghinlo sa baybayon ug padayon nga feedng program gihimo sa BWUI
Sinulat ni Victor L. Tambis
Hulagway sa wala nagpakita sa BWUI ug BLCI nga naghimo sa coastal cleanup sa Mansasa seaside; samtang hulagway sa tuo nagpakita sa gihimo nga feeding program ug pag-apod-apod sa school supplies sa Divine Mercy Church, Dampas District, Tagbilaran City.
Subay sa programa sa “Corporate Social Responsibility (CSR)” ug sa “Environment Protection, and Bohol Water Utilities, Inc. (BWUI) mihimo sa kalihokan sa coastal clean-up didto sa daplin sa baybayon sa Barangay Mansasa, Tagbilaran City. Sa samang higayon, gihimo usab ang feeding program ug pagpang-apod-apod sa mga school supplies didto sa Divine Mercy Church, Barangay Dampas, Tagbilaran City.
Agi ug pagduyog sa kasaulogan sa ika 24 nga anniversary sa BLCI, kining maong kalihokan gihimo pinaagi sa pagtambayayong sa BWUI, Bohol Light Company, Incorporated (BLCI) ug ang Employees of Light and Water Multi Purpose Cooperative (ELAW-MPC) niadtong adlawng Sabado, July 20, 2024.
Ang coastal cleanup usa ka regular nga kalihokan sa BWUI agi ug commitment sa maong kompanya ngadto sa mga kalihokan sa Department of Environment and Natural Resources (DENR) sa pagpanalipod sa ecosystem ilabi na sa kadagatan aron nga kini magpabilin nga hinlo og layo sa polusyon.
PBBM niduso sa pagpalambo sa PWD-friendly nga Pilipinas
Sinulat ni Elvira Bongosia
Ang administrasyon ni Presidente Ferdinand R. Marcos Jr. nagduso sa usa ka “Bagong Pilipinas” nga nagpasiugda sa kinabuhi ug kaayohan sa mga tawo nga adunay espesyal nga panginahanglan.
“Our PWDs (persons with disability) can rest assured of government’s effective implementation of beneficial policies and programs that will guarantee equitable opportunities, special interventions, and incentives for them (Ang atong mga PWDs (persons with disability) makasalig sa epektibong pagpatuman sa gobyerno sa mapuslanong mga polisiya ug programa nga maggarantiya sa patas nga mga oportunidad, espesyal nga interbensyon, ug mga insentibo alang kanila),” si Presidente Marcos miingon.
Ang Presidente mihimo sa maong pamahayag atol sa iyang ika-3 nga State of the Nation Address (SONA) niadtong Lunes.
Si Presidente Marcos miingon nga ang iyang administrasyon nakapasiugda na ug daghang livelihood programs nga gituyo aron masiguro ang kaayohan sa mga PWD sukad siya milingkod sa katungdanan.
Gibutyag usab sa Presidente nga ang Philippine Health Insurance Corp. (PhilHealth) molusad sa sunod tuig sa mga benepisyo alang sa mga kabataang PWD ug senior citizens alang sa ilang mga nag-unang panginahanglan ug mga nag-unang palaliton.
“Lahat ng mga ginagawa nating ito, katuwang natin palagi ang pribadong sektor, lalo na sa mahahalagang bagay ng trabaho at pasahod,” matud pa sa Presidente.
Ang mga pamahayag sa Presidente nakaani ug makabungol nga palakpak ug abi-abi atol sa iyang ikatulong SONA.
ARON MAKASILBI SA KATAWHAN
Unta dili abusahan ang ‘Napo Hanging Bridge’
Sinulat ni Rey Anthony Chiu
Human masinati ang ka sayon sa ilang kinabuhi nga may tulay na silang kaagi-an paingon sa labing duol nga elementarya ug high school, buot na sa mga katawhan sa Barangay Napo, Inabanga nga dili na kini nga imprasktraktura mawala pa.
Nunot niini, nanghangyo ang mga molupyo sa Napo ngadto sa mga turista nga karon nagbutang sa Napo Hanging Bridge nga apil na sa ilang itinerary sa ilang pagsuroy sa Bohol, ayaw intawon abusari ang tulay kay kon kini maguba, mobalik ang kalisud sa katawhan pag-tabok ngadto sa mga eskwelahan, sa ospital ug sa mga kapangomprahan.
Si Jean Jerosas, kinsa nanimuyo mismo sa ubos sa hanging bridge, misubay nga sa matag adlaw, may permi nga panon sa mga turista nga mosuroy labang sa tulay, aron makasinati sa kakuyaw nga maglakaw sa tulay nga magduyanduyan ubay sa paglakaw.
Sa diha nga naguba ang karaan nga tulay nga nagsumpay sa Barangay Napo ngadto sa Barangay Cawayan sa pikas tampi sa suba, napugos ang mga tawo nga mobayad ug tag P10 matag labang sa suba sakay sa sakayan bugsayan, kana kon walay P100 nga ikaplete sa habalhabal paingon ug pauli gikan sa lungsod.
Ang kasagarang katawhan sa Napo mga Mag-uuma, mga construction workers kay mga panday ug igo ra ang sweldo sa pangunsumo.
Lisud sa panahon sa emergency, kon may manganak, kanunay na nga maabtan intawon sa daplin sa dalandalan na lang samtang maghuwat nga nay bugsayan nga makahatud labang sa suba, subay niya.
Nasolbad na unta ang ilang suliran niadtong 2020 diha nga gitrabaho ang bag-ong tulay nga motabok ngadto sa Cawayan, apan, wala madugay nga serbisyo, naabtan sa bagyo nga Odette ug naanod ang bag-ong nahuman nga tulay, saysay ni Jerosas.
Sukad niadto, nahagsak usab ang paglaum sa mga taga Napo nga makahimog mas sayun nga paglabang sa suba.
Hangtud nga niadtong Disyembre 8, 2022, sa suwat ni Gobernador Erico Aristotle Aumentado, gipahibaw niini si Inabanga Mayor Jose Jono Jumamoy nga mohatag ang kagamhanang probinsyal sa Bohol ug P10 Milyones isip donasyon sa Bohol alang sa pagpahiuli sa gibanlas nga tulay.
Sa nahisgutan nga suwat, gimanduan usab sa Gobernador ang mayor nga makig coordinate sa Kapitolyo aron mapagawas na ang pundo.
Si Congresista Vanessa Aumentado, asawa sa gobernador usab mismo ang usa sa mga nag-aghat sa mga may maayong kabubot-on nga pundohan ang Disaster Relief sa Kapitolyo, aron mapa-apudapod kini sa mga lugar nga nanginahanglan, subay sa taho sa buhatan sa KOngresista.
Gisugdan ang pagpahiuli sa tulay niadtong Nobyembre 15, 2023, kini natapos niadtong Hunyo niining tuiga, ug aron magamit na dayun, gibuksan na kini sa publiko.
Sa daku nga kalipay sa mga taga Napo, may migitib nga kahingawa sila nga gibati diha nga ilang nakita nga may mga tawo nga sa ilang hilig sa kakulba, uyogon ang hanging bridge, o manggidungan ug tabok ang daghan nga mga tawo nga sobra na sa kapasidad aron molahutay ang tulay.
Usahay mosaka na ngani sa screen nga ali sa tulay aron walay madisgrasya, akong singgitan, apan daghan gyud nga dili usab motuo, unta, makasabut sila unsa ang tabang sa tulay namo nga taga Napo, sulti ni Jerosas.
Gani si Kongresista Vanvan ug Gob Aris, misulti man gayud nga dili paagi-an ug motor, aron dili dali maguba, karon, daghan ang mag-abusar, mao nga manawagan mi, dugang ni Jerosas.
Dili na kami buot nga mobalik pa niadtong panahon nga magkalisud mi ug labang, labi na gyud ug baha, unya delikado sa mga gagmay nga sakayan, panapos ni Jerosas.
BALAK
ANG LIG-ON NGA GABAYAN SA TAWO
Sinulat ni Engr. Rogelio Podelino
Tungod sa sala sa una tang mga ginikanan
Ang tawo huyang ug baroganan
Nagkinahanglan ang tawo ug gabay
Aron dili siya mahisalaag sa dalan’g gisubay
Kay ang kinabuhi daghan ug katalagman
Nahimo kini’ng kalbaryo sa katawhan
Nagkada-iya ang gibuhat aron lang mabuhi
Kay ang mga pama-agi managlahi
Sa dinhi pa si KRISTO sa kalibutan
Gitukod NIYA ang IYANG simbahan
Ibabaw sa usa ka.bato
Nga ang ngalan Pedro
Ang IYANG mga pagtulun-an ug mga wali
Gisulat sa IYANG mga sumusunod sigi
Gisulod sa mga sugong gitago-an sa kweba
Aron dili mawala ug masubay sa kaliwatan nila
Sa diha’ng wala na si KRISTO sa kalibutan
Ang IYANG mga apostoles nagsangyaw tanan
Hasta uban’g sumusunod nagsangyaw gihapon
Sa maayo’ng balita sa tanan’g panahon
Ang mga tawo uhaw kaayo sa maayo’ng balita
Nga ang katawhan gitubos na sa ilang sala
Pinaagi sa pagkamatay ni JESUS sa krus
Kay gimahal sa GINOO ang tawo sa lubos
Milibkas pa ang gatusan ka tuig sa hingpit
Human mokayab si KRISTO paingon sa langit
Anha pa namugna sa simbahan’g Katoliko
Ang usa ka talagsa-on’g libro
Kini nga basahon o libro naghatag ug kalig-on
Sa pagtuo sa tawo sa GINOO dayon
Mabasa sa tawo ang angay buhaton
Sa pagdayeg sa GINOO sa tanan’g panahon
Maghatag kini ug kasibot sa balati-an
Nga daghan ka pa angay pagatun-an
Nga ikahimu-ot sa ato’ng GINOO
Sa pagsigi ug repaso sa mga psalmo
Kon batasanon nimo ang pagsigi ug basa
Mohugot ug.motim-os ang imong gugma
Sa ato’ng GAMHANAN’G MAGBUBUHAT
Nga maoy nagbuot sa tanan’g binuhat
Kini nga libro angayan basahon sa tanan
Aron ka makasubay sa tul-id.nga dalan
Sa imong pagbasa mohugot ang imong pagtuo
KINI ANG LIG-ON NGA GABAYAN SA TAWO