BLCI nagpadayon sa pagpanghinlo sa distribution line facilities
Sinulat ni Sheryl B. Paga
Katungdanan sa Bohol Light Company, Inc. (BLCI) ang padayon nga pagpanghinlo sa mga distribution line facilities aron pagsiguro nga luwas sa kadaot ang mga linya ug mahatagan ug husto nga power reliability ang mga katawhan dinhi sa dakbayan sa Tagbilaran nga mao ang franchise area niini.
Ang buhatan sa Bohol Light Company, Inc. nakigtimbayayong sa Tagbilaran City Government inubanan usab sa mga tag-iya sa Telephone ug Cable companies aron padayon ang pagpanghinlo sa wala na gamita nga mga wires nga makita sa bisan asang dapit dinhi sa dakbayan Tagbilaran.
Gipadayon usab sa BLCI ang paghimo sa mga clearing operations sa tinguha nga kanunay kini nga makahatag og dekalidad nga serbisyo sa kuryente.
Aduna mga kalihokan ang BLCI nga gipadayon sama sa: modification sa mga over sagging secondary lines, pagpuli sa mga kahoy nga poste ngadto sa sementado nga poste, “stringing ug upgrading” sa mga primary nga distribution lines, “splitting of loads” sa mga common distribution transformer, pagkuha sa mga nikatay nga mga sagbot, ug pagputol sa mga sanga sa kahoy nga naduol na sa linya sa kuryente ug hapit na motakdo sa distribution lines.
Nag-awhag ang Bohol Light sa mga katawhan sa pagreport gilayon kung adunay namatikdang mga sagbot nga mikatay, misangit o mitakdo sa linya sa kuryente, ug sa pagpahibalo sa BLCI office aron mahatagan kini ug dinaliang aksyon samtang wala pa kini nakahatag ug kadaot.
Nakabasi usab kini sa mandato sa Department of Energy ubos sa balaod sa Republic Act 11361 kabahin sa Anti Obstruction of Power Line Act.
Ang atong pagpakabana, dakong tabang alang sa kaayuhan sa tanan ug sa tibuok katilingban.
BWUI nagpahibalo sa mga payment partners
Sinulat ni Victor L. Tambis
Sa itaas makita ang mga logo sa mga kompanya nga modawat sa bayad alang sa water bills sa Bohol Water Utilities, Inc. (BWUI). Ang mga kumpanya mao ang (gikan saw ala ngadto sa tu-o): First Consolidated Bank ug ang ilang FCBpay App, Bank of Commerce, M Luiller ug ang ilang ML Wallet, Land Bank, Palawan Pawnshop/Palawan Express ug ang ilang Palawanpay App., Security Bank ug ang BLCI.
Sa tinguha nga mahatagan ug kasayon ang mga konsumidor sa Bohol Water, ilabi na sa pagbayad sa ilang water bills, ang maong Kompanya nakig alayon sa mga establisimyento ug bangko aron mahimo kini nga modawat sa bayad gikan sa water bill sa mga konsumidor.
Sa dili pa dugay, ang Palawan Express/Pawnshop mahimo na nga modawat sa bayad sa Bohol Water diin nagdala kini sa total “payment partners” ngadto sa Pito (7) ka establisimyento.
Pagkakaron, ang mga payment partners sa Bohol Water mao ang mosunod: (1) First Consolidated Bank ug ang ilang FCBPay app; (2) Land Bank of the Philippines; (3) Bank of Commerce; (4) Security Bank; (5) M. Lhuiller ug ang ilang ML Wallet app; (6) Palawan Express/Pawnshop, ug ang ilang Palawan Pay app.; ug ang ika pito (7) ang Bohol Light Company.
Kining maong mga establisimyento ug bangko modawat lamang ug bayad sa current bill sa tubig o bill nga wala pa molapas sa due date. Kon ang pagbayad molapas na sa due date, giawhag na ang konsumidor nga adto na kini himoa sa opisina sa Bohol Water.
Ang Land Bank ug ang Security Bank pwede modawat sa on-line payment pinaagi sa ilang websites ug kinahanglan adunay account o deposit ang konsumidor sa maong mga banko.
Pwede usab himoon ang pagbayad pinaagi sa G-Cash apan kinahanglan nga adunay QR code ang account nga pagabayaran sa konsumidor.
Gawas sa nahisgutan nga payment partners nga modawat sa on-line payment ug mga “app” nga ang pagbayad pinaagi sa cellphone, ang tanang nahisgutan nga mga payment partners modawat sa “over-the-counter” nga pagbayad ngadto sa ilang tagsa-tagsa ka mga buhatan.
Gipaningkamutan sa Bohol Water nga sa dili madugay ang “Bayad Center”/ ”Bayad app” maapil na sa mga payment partners.
Gani pagkakaron, pwede na modawat sa over-the-counter payment ang mga “Bayad” partners nga mao ang mosunod nga mga outlets: (1) 4R Payment Center, Luiton, Gallares, St; (2) CDJ Global Travel & Tours, B. Aquino Ave. near old airport; (3) CML Bills Payment Center, CPG Ave. cor. Borja St.
Public hearing sa plano sa BWUI, BLCI gipanawagan
Sinulat ni Rey Anthony Chiu
Gisugyot didto sa Sangguniang panlalawigan Committee of the Whole nga nagkatigum nga maghimo ug public forum aron mahibaw-an kon unsay gusto sa mga konsumidor sa Bohol Light Company ug Bohol Water Utilities Incorporated: paliton ba ug balik, o ipabilin ba ang 30 porsyento nga shares sa kompanya nga iya gihapon sa Kapitolyo.
Kini maoy mingtumaw nga mga sugyot gikan sa mga sakop sa Bohol Governance, Accountability and Review Team (BOGART), kinsa maoy nanghangyo ug Sangguniang Panlalawigan special hearing rong timbangon kon unsa na ang nahitabo sa minilyon nga gipapuhunan sa Kapitolyo human mabaligya sa unang mga administrasyon ang Provincial Public Utilities Department (PPUD).
Niadtong nangagi nga administrasyon, nahukman sa Bohol nga ibaligya ang PPUD nga maoy nagpadagan sa serbisyo sa suga ug tubig sa Tagbilaran, tungod sa kawalay kapasidad sa goberno nga mopadagan sa negosyo nga manginahanglan sa dinali-an nga mga solusyon ug dagkong pamuhunan.
Sa kinatibuk-an nga P155M, napalit sa Salcon Power ang PPUD, apan human sa 25 ka tuig nga moexpire ang prangkisa nga iya sa PPUD, kinahanglan na usab nga makadesisyon ang Kapitolyo kabahin sa pag-extend o sa pagpalit ug balik sa mga nabaligya nga utilities.
Sa pagkahalin, nagpabilin ug 30 porsyento nga bahinan sa shares ang Kapitolyo sa nahalin nga mga utilities, ug kini gitugbangan usab sa Salcon Power sa 70 porsyento.
Sa panahon ni kanhi Goberndor Erico Aumentado, nahukman nga paliton ug balik ang shares nga nabaligya, apan, nagasto na ang halin niini ug nanginahanglan nga usab sa komplikado nga mga pamaagi aron mahibalik sa Bohol ang utilities nga nahalin na.
Karon nga anaa na sa panahon nga desisyonan sa Bohol ang pagrenew sa prangkisa sa Salcon nga karon Bohol Light Company Incorporated ug Bohol Water Utilities Incorporated, ug human mingtubo na ngadto sa usa sa mga lig-on nga kompanya sa Bohol, matud sa BOGART nga angayan lamang nga ang mga konsumidor masayud usab sa sitwasyon aron makatabang sa desisyon.
Si provincial Administrator Aster Caberte, mipadayag nga magpatawag ang Kapitolyo ug Power Forum isip venue nga ang mga konsumidor, mapasayran sa sitwasyon, aron mao nay mohimog desisyon.
Kini nga lakang, nahasubay usab sa gisugyot sa BOFART.
KANHI DIRECTOR. Si Norris Oculam, kinsa usa sa mga milingkod isip director sa nabaligyang utilities mipasalig nga walay kwarta sa Kapitolyo nga nawala sa iyang pagpamuhunan, ug gani sa duh aka tuig nga siya naglingkod, mapakita niya ang mga dokumento nga mopamatuod sa iyang gipasalig. Daghang namasangil nga nawala na ang pamuhunan sa Kapitolyo sa utilities niini nga gibaligya kaniadto. (Hulagway gikan sa PIA-Bohol)
Sitwasyon sa mga LSA Gipatin-aw sa HRMDO
Sinulat ni Rey Anthony Chiu
Adunay mga trabahante nga ang ilang posisyon nga gihuptan, posisyon nga personal nga gisalig (trust position) sa mga nagtudlo kanila. Aduna usab posisyon nga ang serbisyo, taman lamang (co-terminus) sa gahum sa nagtudlo kanila (appointing authority).”
Kini karon maoy gibasehan nga ang 18 ka mga Legislative Staff Assistants (LSA) sa Office of the Vice Governor ug sa Sangguniang Panlalawigan, nahimong nagbitay sa hangin, human nga ang appointing authority napa-undang sa serbisyo tungod sa kamatayon ni Bise Gobernador Victor Dionisio Balite, matud ni Provincial Human Resource Management and Development Officer (PHRMDO) Anne Mariquit Oppus, sa usa ka interview.
Si Bise Gov Balite, maoy gitahasan sa balaod nga mamirma sa mga appointments sa mga trabahante ubos sa Legislative Branch sa Kapitolyo, apan sa pagkamatay sa bise-gobernador, natural lamang nga wala nay mopirma sa renewal sa mga empleyado.
Matud ni Oppus, nga sa pagka suspenso sa gobernador, ug sa paglihok sa balaod, misaka si VGob Balite sa nabakante nga pwesto ug si Board Member Tita Baja, maoy nahimong acting nga Bise Gobernador.
Niadtong panahona, si Acting VG Baja, segun sa balaod sa Civil Service Commission on Omnibus Rules on Appointments and Other Human Resources Action (ORAOHRA) makatudlo na unta ug makapirma sa mga appointments sa mga LSA human sa 30 ka adlaw nga tingtrabahoan sugod sa iyang pormal nga paglingkod isip Bise Gobernador.
Apan sa wala pay 30 ka adlaw, sa pagkamatay ni BiseGob Balite, si Acting Vice Gov Tita Baja, natural nga molingkod sa nabakante nga pwesto, hinungdan nga dili na usab siya makapirma sa appointments sa mga nabitay nga LSA.
Niadtong Hulyo 21, misuwat si Oppus ngadto sa Department of Interior and Local Government (DILG) Bohol pinaagi ni Director Jerome Gonzales aron mangayog lamdag sa kasamtangan nga sitwasyon, kay matud pa niya, daghang nagkadaiyang opinion ang nanggawas, apan mas maayo nga opisyal ang makuha nga posisyon nga kabasehan sa PHRMDO.
Sa kasamtangan, minghatag na ang DILG sa opisyal nga designation sa pagka acting ViceGov ngadto kang Board Member Vincenzo Arcamo, kinsa maghuwat na usab sa 30 ka adlaw, ayha pa siya makapamirma sa mga appointments sa mga tawo sulod sa Office of the Vice Governor ug sa Sangguniang Panlalawigan.
Isip molingkod sa sensitibo nga buhatan sa Bise Gob, natural lamang usab nga ang opisyal nga molingkod didto, mopili sa iyang kasaligan nga mga tawo, dayag ni Oppus.
Nunot niini, matud sa opisyal sa PHRMDO nga ang iyang buhatan, ministerial lamang ang ilang trabaho.
Kon kinsa ang gitudlo sa appointing authority, human sa ilang pagtimbang kon nakaabut ba sa minimum requirement sa posisyon nga okuparan, igo lamang sila nga moduso niini alang sa approval sa Civil Service Commission, pahayag ni Oppus.
Niini, sa gikabaniog nga sugilon kabahin sa pagpanaktak sa Kapitolyo, pasalig ni Oppus, ang Kapitolyo nangita ug paagi alang sa sayon nga paglingkawas sa mga legal nga suliran, apan, wala sa gipili-an sa Kapitolyo ang buhat nga wala masubay sa balaod, segun sa buhaton unta sa mga buot lamang mamolitiko.
NAA BA GYUY GITAKTAK? Subay sa dagan sa panghitabo ug sa pagpatuman sa balaod, mahimong may mapaundang sa trabaho apan dili kay nataktak, kon dili tungod kay ang mipasalig sa ilang pagsalig, wala na. Ang bag-ong molingkod, natural lamang nga magdala sa iyang mga kasaligan sa Kapitolyo, mao kini ang balaod sa kinabuhi. Ug sa pangalagad sa sensitibong posisyon. (Hulagway gikan sa PIA-Bohol)
Civil Service Bohol exam sa DCPNHS ipahigayon
Sinulat ni Elvira Bongosia
Nipagawas ug regional advisory ang Civil Service Commission (CSC) kalabot sa ipahigayong 2024 Career Service Examination – Pen and Paper Test karong Agosto 11.
Ang Online Notice of School Assignment (ONSA) alang sa Agosto 11, 2024 nga Career Service Examination – Pen and Paper Test (CSE-PPT) gihimong accessible sa publiko niadtong Hulyo 28, 2024.
Apan gipasabot sa CSC nga wala nila tuyoa nga ang University of Bohol ang nabutang nga venue alang sa Career Service Examination – Subprofessional.
Giklaro sa CSC nga ang venue alang sa CSE – Subprofessional mao ang Don Cecilio Putong National High School (DCPNHS) ug dili sa University of Bohol.
Busa, ang tanang examinees gikan sa lalawigan sa Bohol nga mokuha sa Career Service Examination – Subprofessional gihangyo nga i-double check ang ilang room assignment pinaagi sa ONSA sugod Hulyo 30, 2024, aron ma-update ang ilang room assignment.
Alang sa bisan unsang pangutana, ang mga aplikante sa eksaminasyon mahimong motawag sa CSC Field Office-Bohol pinaagi sa numero sa telepono (038) 501-7046 o pinaagi sa email sa boholcsc@gmail.com.
BALAK
ANG KAAIMYON SA MGA BULAK
Sinulat ni Engr. Rogelio Podelino
Sa sayong kabuntagon mohuros ang hoyohoy dayon
Ug ang kahumot sa mga bulak moalibwag dayon
Ug ang ilang kahumot imong masimhot
Nga mohatag ug katagbawan sa balati-ang naghuot
Dayon ang mga buyog manglupad
Nangita sa mga bulak bisan asa ipadpad
Kay modimdim sa katam-is sa bulak sa dakung kahimu-ot
Ang mga bulak nindot idayandayan sa panimalay
Naghatag kini sa palibot ug kapiskay
Labi na kon ang panimalay gipalibutan
Sa maanindot nga mga bulak nga labihan kadaghan
Panahon sa kagabhi-on
Ang dama de noche sa kahumot mangalimyon
Bati-on nimo nga nahilambigit ka sa kinaiyahan
Kining tanan mugna sa KAHITAS-AN
Ang walingwaling sa kabukiran
Nindot sud-ongon sa ilang kadaghan
Makabig ang mga buyog sa pagpaniba
Aron modimdim sa ilang katam-is dayon mopahawa
Ang mga bulak nindot idayandayan
Sa mga altar sulod sa simbahan
Moalibwag ang kahumot sa mga bulak sa mga katawhan
ANG KAALIMYON SA MGA BULAK masinati sa kadaghanan