BOHOL LIGHT nagpadayon sa Clearing Operation
Sinulat ni Sheryl B. Paga
Ang Bohol Light Company, Inc. nagpadayon sa clearing operation isip usa sa electric distribution utility diin gipanigurado ang paghatag ug makanunayon nga serbisyo ngadto sa mga konsumidor deri sa dakbayan sa Tagbilaran.
Tungod niana, gibantayan ang seguridad ug kaayuhan sa power lines pinaagi sa pagpanghinlo sa mga sagbot nga nagakatay, mga sanga sa kahoy o palwa sa mga lubi nga nahiuduol sa mga distribution lines.
Ang maong lakang sa Bohol Light Company, Inc. nagpalig-on sa ilang dedikasyon aron masiguro ang luwas ug episyente nga serbisyo sa katawhan. Ang pagpatuman sa mga clearing operations sa nagkalain-laing lugar sa franchise area, pinaagi sa mga linemen gikan sa upat ka mga feeder custodians, nagpamatuod sa pag-atiman sa kompanya aron malikayan ang mga aksidente o mga problema nga posibleng makaapekto sa atong pag-apod-apod sa kuryente.
Kini nga sistema naghatag ug dugang kasiguraduhan sa mga konsumidor nga ang serbisyo sa Bohol Light kasaligan ug malikayan ang mga wala giplanong pagkapalong sa suga.
Ang maong programa nakatabang sa pagpa-improve sa power reliability dinhi sa dakbayan sa Tagbilaran, nga naghatag ug kalinaw sa huna-huna sa mga konsumidor bahin sa suplay sa kuryente.
Tungod niini, ang Bohol Light nag-awhag sa suporta gikan sa mga konsumidor pinaagi sa paghatag ug pagtugot kung adunay muanha sa ilang mga panimalay aron sa pagpananghid nga puongan ang mga sanga sa kahoy.
Nagadasig usab ang Bohol Light sa pagpahibalo dayon sa opisina kung aduna kitay namatikdang peligro nga sitwasyon nga nahiduol sa atong linya, aron mahatagan ug diunaliang aksyon. Tawag lamang pinaagi sa mobile numbers 0922-307-2161.
Mahimo usab magpadala ug mensahe sa official Messenger account sa Bohol Light Company, Inc. o email at support@bohollight.com.
Mahimo nang gamiton ang e-billing payment sa BWUI
Sinulat ni Victor L. Tambis
Subay sa programa paghatag ug kasayon sa mga konsumidor ilabi na sa pagdawat sa ilang water bill, ang Bohol Water mipahibalo nga mahimo na kini ipadala sa internet pinaagi sa email.
Kining maong kalamboan naghatag ug kasayon sa mga konsumidor ilabi na kadtong panimalay nga kanunay walay tawo sa panahon nga maghatud sa water bill ang mga kawani sa Bohol Water nga gitahasan niini.
Ang pagpadala pinaagi sa email usa ka laing pamaagi sa pagdeliber sa water bill tungod kay anaa gihapon ang pagdeliver pinaagi sa paghatud ngadto sa panimalay.
Ang konsumidor gihatagan ug kahigayonanan sa pagpili kon asa sa duha ka pamaagi nga ipagpadala ang iyang water bill tungod kay kon ang usa ka konsumidor mopili sa e-billing, dili na kini makadawat sa “hard copy” sa maong water bill.
Aron pag avail sa e-billing, kinahanglan nga ang konsumidor mopahibalo o mobisita sa buhatan sa Bohol Water ug mohatag sa iyang “email address”, diin sa maong “email ad” ipadala ang binulan nga water bill. Kinahanglan usab nga e update sa konsumidor kon ugaling adunay kausaban sa email ad nga gi rehistro sa maong account aron pagsiguro nga madawat ang bill nga ipadala sa BWUI. “Yahoo” ug Gmail” account lamang ang dawaton.
Gawas pa niini, gipahibalo usab sa BWUI nga dawaton ang bayad sa water bill (nga wala pa molapas sa due date) sa mga payment partners nga mao ang mosunod: FCB, Land Bank, Security Bank, Bank of Commerce, M. Lhuiller ug Palawan Pawnshop/express ug pwede usab mobayad sa G-Cash pinaagi sa Security Bank system.
NIA 7 mamaligya ug tag P29.00 bugas sa pili’ng sector, Sept 13
Sinulat ni Rey Anthony Chiu
Tungod sa Farming Support Program sa National Irrigation Administration, may mapalit nga subsidized nga bugas humay sa tag P29 ang kilo, apan kini gitagana lamang ngadto sa mga sakop sa sector nga labing naapektohan sa kalisud.
Matud ni NIA Regional Manager Engr. Roiry Avance, ilang ilusad ang Murang Bigas sa NIA sa tag P29 karong sunod Biyernes, Septembre 13, 2024, didto sa NIA Covered Court sulod sa NIA compound sa Dao.
Kahinumduman nga pinaagi sa programang Farming Support Program (Contract Farming), ang mga maani pinaagi sa programa, mahimong ikapamaligya sa NIA sa mas barato nga presyo, apan, dugang niya, kini alang lamang sa senior citizens, solo parents, mga may kabilinggan sa lawas ug mga benepisaryo sa Pantawid Pamilyang Pilipino Program, pinaagi usab sa tabang sa Department of Social Welfare and Development Office of the Provincial Social Welfare and Development.
Pinaagi sa Sistema nga gitawag ug contract farming, ang mga mag-uuma nga benepisaryo sa programa gihatagan pinaagi sa ilang Irrigators Association of P50 mil nga kantidad sa abono ug cash nga salapi gikan sa NIA.
PInaagi niining mga nahisgutan nga inputs, ang mga IA gilauman nga maka-ani ug 5 ka metriko tonelada nga tipasi sa panahon sa ilang tingtanum.
Niini, ang katunga, adto sa mga mag-uuma apan ang laing tunga sa ginaling na nga humay, adto paingon sa NIA aron ikapamaligya sa mga Kadiawa Centers sa tag P29.
Dinhi sa Bohol, samtang nagkalisud ang mga mag-uuma sa pagpananum niadtong katapusang ting-tanum tungod sa taas nga huwaw, nakahangyo ang NIA Region 7 sa mga mag-uuma sa NIA Region 13 nga makabaylo ug 1,000 ka sako sa tag 10 ka sako, nga mao usab ang gamiton sa NIA-7 sa pagpamaligya ngadto sa mga nahisgutan nga mga sector.
CHATTO Gihangop ang pagpirma ni PBBM sa Loss and Damage Fund Board Law
Si Cong. Edgar Chatto, kinsa mao ang chairperson sa House Committee on Climate Change, mihangop sa pag-aproba sa Loss and Damage Fund Board nga balaud.
Niadtong Agosto 28, gipirmahan ni Presidente Ferdinand “Bongbong” Marcos Jr. ang House Bill No. 10722, ug pormal nga nahimong balaud diin ang nag-unang awtor niini mao si Cong. Edgar Chatto sa Kongreso.
Ang Republic Act No. 12019, nga nailhan usab nga “The Loss and Damage Fund Board Act,” usa ka sukaranan nga maghatag ug legal nga personalidad ug kapasidad sa Pilipinas aron mahimong kabahin sa board sa climate disaster fund nga gitawag “Loss and Damage Fund.”
Ubos sa balaod, ang Board, isip ang nagdumala nga hugpong sa pundo, nahatagan ug juridical nga personalidad nga adunay bug-os nga legal nga kapasidad sa pagkontrata, pag-angkon, ug pag-dispose sa mga masibog ug dili masibog nga kabtangan, ingon man sa pagpasaka ug legal nga kaso.
Mapasalamaton si Chatto kang Marcos sa pag-aproba sa maong importante nga balaod nga magbukas sa pultahan sa pagsiguro sa climate justice alang sa mga biktima sa epekto sa climate change.
Nagpahayag usab siya ug pagpasalamat sa mga co-authors, mga miyembro sa komite, mga resource speakers, mga miyembro sa House ug Senado, ingon man sa liderato ni House Speaker Martin Romualdez nga nisuporta aron mapadali sa pagpasar sa balaod aron matuman ang commitment sa presidente atol sa State of the Nation Address.
Ang Republic Act 12019 mao ang labing uwahi nga balaud nga napanday ni Chatto sa iyang katungdanan isip Kongresista ug nagpakita kini sa iyang kalantip ug katakus.
Cong. Edgar Chatto nangulo sa usa ka tigum isip presiding officer
Si Cong Edgar Chatto nangulo isip presiding officer sa usa ka meeting sa Philippine Red Cross – Bohol Chapter Board of Directors.
Sa maong tigum, mihimo sa iyang report si Chapter administrator Emmanuel Pilayre.
Ang maong report kabahin sa ilang gitawag ug “accomplishments and service delivery plans.”
Ang Philippine Red Cross – Bohol Chapter mao ang gitahasan sa implementing response activities panahon sa emerhensya ug katalagman nga mahitabo sa usa ka lungsod ug lalawigan.
Ang PRC – Bohol Chapter mao usab ang nagpahigayon sa makanunayon nga “blood donation drives”, youth leadership trainings, ug uban pa nga mga kalihukan.
Buhatan ni Cong. Edgar Chatto mipahibalo sa schedule sa pagpang apud-apod sa cash incentives alang sa 2ND BATCH OF COLLEGE ACADEMIC ACHIEVERS
Ang SCHEDULE sa Distribution of Cash Incentives alang sa ika duhang hut-ong sa COLLEGE ACADEMIC ACHIEVERS gitakda na karong Martes, September 10, 2024 sa may mga 10:00 ang takna sa KABUNTAGON.
Gihangyo ang mga hingtungdan sa pagbisita sa buhatan ni Cong Edgar Chatto sa G/F Capitol Bldg., Tagbilaran City.
Gihangyo usab sila sa pagdala ug USA KA VALID ID para maclaim ang ilang cash incentive.
Sa mga hingtungdan, palihug hinumdumi nga kung dili makuha ang cash incentive sa gikatakda nga schedule, maforfeited ang maong cash incentives.
Ang mga tinun-an nga makadawat sa ilang CASH INCENTIVE mao sila si: Baclayon, Rica Mae; Bague, Nicole; Bulaquina, Mary Cris; Cescon, Chelsea Joyce; Gerodias, Elisha Christte; Leria, Francis John; Llorente, Deocel; Lopez, Ferdinand Roy; Manlapas, Marjorie; Mijos, Jeshil; Morala, Jhona Vel; Morastil, Chairajane; Narit, Nina Roan; Oerba, Maria Venus; Pineda, Charish; Sayson, Daisy Rose; Socias, Liza Mae; Solijon, Jodel; Sumabong, Julia Allaine and Tolon, Judy Ann
BALAK
ANG LANGITNONG KABILIN
Sinulat ni Engr. Rogelio Podelino
Sukad nakasala ang una tang guinikanan
Sila si Eva ug si Adan
Guipapahawa sila sa para-iso
Bisan supak sa ilang gusto
Sa ilang dakung sala nga nabuhat
Nawala ang kinabuhing hayahay ug ahat
Nawala sa tawo ang kahigayonang makasaka
Sa gingharian sa langit nga walay nagbalda
Ang himaya-anong kinabuhi nga guitagana
Sa daklit nawala ug nahanaw na
Karon tawo naglakaw mora ug walay tumong
Nangindahay siyang mabuhi nga matarong
Kina-iya sa mga guinikanan
Sukad pa sa panahon ni Abraham
Sa ilang pagtaliwan ning kalibutan
Katigayonan sa anak ibilin ang tanan
Kung daghan ang mga anak magbahin
Sa katigayonan ug bahandi nga nahibilin
Kon pagpahat sa mga anak dili angay
Kining hitabo-a mahimong pabilo sa away
Milibkas ang pipila ka siglo
Ang gugma sa GINOO para sa tawo
Nagpabiling buhi sa IYANG galamhan
Guihatagan ang tawo laing kahigayonan
Aron matuman saad sa AMAHAN sa tawo
Ang BUGTONG ANAK IYANG guipakatawo
Lalang sa ESPIRITU SANTO nahimong tawo
Guihimogso ni SANTA MARIA ug natawo
Sa pagkatawo ni JESU CHRISTO
Nahibalik ang kahigayonan sa tawo
Makasunod siya sa katigayonan sa langit
Nga ma-o ang kinabuhing hingpit
Aron ang tawo makasubay sa dalan
Kinahanglan magtuman sa mga kasugoan
Saad sa langitnong himaya nga guibilin
Aron maangkon: ANG LANGITNONG KABILIN