BLCI misalmot sa International Clean-Up Program
Sinulat ni Sheryl B. Paga
Ang Bohol Light Company, Inc. (BLCI) nagpadayag sa kinasingkasing nga pasalamat sa tanang misalmot sa 39th International Coastal Clean-Up ug ngadto sa mga empleyado nga niapil sa pagpanghinlo sa kabaybayunan diha sa Borja Bridge nga mao ang nagsumpay sa Tagbilaran City ug sa isla sa Dauis-Panglao lakip ang mga kasikbit nga lugar.
Ang maong kalihukan naghatag ug inspirasyon aron magpabilin ang kahinlo ug kaanindot sa kadagatan ug lakip na ang pagpanalipod sa atong kabaybayunan.
Pinaagi sa maong kooperasyon ug kadasig, nakahatag kini ug dakong tampo aron magpabiling limpyo ang atong palibot ug mas luwas alang sa umaabot nga mga henerasyon.
Atong mahinumduman nga sukad kaniadtong December 28, 2000, diin nag-sugod sa pag pagpadagan sa panuga sa BLCI dinhi sa Tagbilaran City, ang BLCI gikan sa Provincial Electric System (PES) nga ubos sa Provincial Government of Bohol pina-agi sa Joint Venture Agreement (JVA) nga gi pirmahan niadtong August 28, 2000, kanunay nga musalmot sa mga katilingbanong kalihukan sama sa Coastal Clean-up, Tree and Mangrove Planting, Brigada Eskwela, Feeding, Distribution of School Supplies and Groceries and Rice to Feed Programs.
Sa matag adlaw, gihimo sa Bohol Light ang nagkalain-laing mga kalihokan alang sa matinud-anong pagserbisyo nganha sa atong mga konsumidor deri sa dakbayan sa Tagbilaran.
Bisan sa kahigpit sa oras, ang maong kompanya naningkamot nga maka apod-apod sa kuryente ngadto sa atong mga konsumidor ug makahatag ug mga mga pahalipay ngadto sa komunidad.
Giniyahan sa tumong sa pag-ugmad sa serbisyo sa panuga, ang Bohol Light makanunayon nga naningkamot paghatag ug dugang kaugmaran sa mga pasilidad ilabi na sa nagsaka nga panginahanglan sa kuryente sulod sa lugar nga gialagaran aron sa pagpadangat sa serbisyo niini sa umaabot nga mga panahon.
Sa Bohol Light, padayon ang pagtinabangay!
BWUI misalmot usab sa Ika-39 International Coastal Clean-up
Sinulat ni Leizel C. Butawan
Hulagway sa wala: Ang mga empleyado sa BWUI nga mitambong sa pagpanglimpyo sa Bool Junction, samtang Makita sa tuo ang grupo nga niapil sa pagpanglimpyo sa Abatan River.
Subay sa programa alang sa pagpanalipod sa kalikupan, ang Bohol Water nagpakita ug suporta pinaagi sa aktibong pagsalmot sa kalihokan sa coastal clean-up niadtong Sabado, Septyembre 21, 2024.
Kini nga kalihokan agi sa pagduyog sa ika-39 nga “International Coastal Clean-up Activity” nga nagtinguha nga mapreserbar ug mapanalipdan ang atong mga kabaybayonan.
Ang maong kalihokan gitambongan sa tanang Local Government Units (LGU’s) sa Bohol isip suporta ug pagpakitag pagpakabana sa atong kinaiyahan. Nagkahiusa ang mga partisipante sa pagpanglimpyo sa kabaybayonan ug sa ubang parte sa suba (Abatan River) aron sa pagpanglimpyo niini.
Ang Bohol Water miduyog sa duha ka kalihokan nga gipahigayon sa Department of Environment and Natural Resources (DENR) ug sa Probinsya diin ang DENR gipahigayon sa Abatan River sa lungsod sa Cortes, samtang ang pagpanghinlo nga gipanguluhan sa Probinsya didto gipahigayon sa Bool Junction, Dampas. Sa maong mga lugar, daghan ug lain-laing klase sa basura ang nakolekta, gikan sa mga plastik, mga lata, ug uban pang mga butang nga dili malata.
Gawas sa pagpanglimpyo, ang mga partisipante gihatagan usab og “Volunteer Ocean Trash Data Form” diin ilang gitala ug gisegregate ang tanang mga basura nga nakolekta. Pinaagi niini, nasuta nga ubay-ubay ang nakuhang basura nga nagpalala sa problema sa polusyon sa atong mga kadagatan.
Ang maong kalihokan nga gipahigayon usa ka dako nga kontribusyon sa pagpreserbar sa kalimpyo sa atong mga kabaybayonan. Kini nagpakita sa dakong importansya sa pagtinabangay aron mapanalipdan ang atong kinaiyahan.
Chatto mipasidungog sa mga nakasakmit sa CSC honors program
Gipasidunggan ni Cong. Edgar Chatto, usa usab ka multi-awarded public servant, ang mga nakasakmit sa 2024 Search for Outstanding Government Workers.
Si Presidente Ferdinand R. Marcos Jr. ang nangulo sa seremonya sa pag award sa mga mananaog sa 2024 Search for Outstanding Government Workers nga gipahigayon sa Ceremonial Hall sa Malacañang Palace sa Manila niadtong Miyerkules (Sept. 18, 2024).
Tulo ka kategoriya sa mga awards ang naglangkob sa CSC Honor Awards Program. Kini naglakip sa Presidential Lingkod Bayan, ang Outstanding Public Officials and Employees Award o Dangal ng Bayan, ug ang CSC Pagasa Award.
Lakip sa mga mananaog karong tuiga mao si Administrative Officer V Adelfa T. Salutan gikan sa City Government of Tagbilaran sa Tagbilaran City, Bohol, nga gihatagan ug national CSC Pagasa Award.
Ang Tagbilaran City Disaster Risk Reduction and Management Office usab nakadaog sa Regional Level CSC Pagasa Award (Group Category).
Si Chatto lamang ang nag-inusarang elected official nga nakadawat sa Presidential Lingkod Bayan, Dangal ng Bayan, ug Pagasa Awards.
Sa panahon nga Bise gobernador siya sa Bohol gipasidunggan siya tungod sa iyang talagsaong mga nahimo nga nakaapekto positibo sa nasud ug niadtong gobernador siya giila siya tungod sa iyang ehemplo sa maayo nga pamatasan ug gawi isip opisyal ug nagbuhat ug mga inobasyon sa pagserbisyo sa katawhan.
Ang mga mananaog gihatagan ug mga ganti ug insentibo sama sa cash prize, awtomatik nga promosyon o pagtaas sa sweldo nga tupong sa mas taas nga posisyon, one-time executive check-up, ug scholarship opportunities gikan sa mga partner educational institutions sa CSC, ug uban pa.
Ang mga kawani sa gobyerno nga adunay talagsaong mga nahimo nga may dakong epekto sa nasud mahimo nga manominado alang sa Presidential Lingkod Bayan Award, samtang ang mga kawani nga padayon nga nagpakita ug ehemplo nga maayo ug etikal nga pamatasan bisan pa sa mga risgo sa ilang trabaho, mahimo nga i-nominate alang sa Outstanding Public Officials and Employees (Dangal ng Bayan) kategoriya.
Samtang, kadtong mga naghatag ug kontribusyon nga nagresulta sa mga inobasyon, digital transformation, o uban pang positibo nga kausaban sa ilang rehiyon, ahensya, o departamento ang kwalipikado alang sa CSC Pagasa Award.
“Hinaut nga kini mahimong inspirasyon sa ubang mga opisyal ug empleyado,” matud pa ni Chatto sa Biyernes sa iyang programa nga Kita Ug Atong Kongresista, nga giila ang gugma sa pagserbisyo isip usa ka sumbanan nga bililhon nga kina-iya.
P16M andam na pag-abli ug pagsugod sa DFA-Bohol office
Aduna nay pondong P16 milyones pagsugod sa operasyon sa Department of Foreign Office (DFA) Consular Office sa Bohol ning tuiga, matod ni 1st District Rep. Edgar Chatto.
Ang DFA-Bohol mahimutang sod sa Alturas Mall sa Tagbilaran City ug gitakdang buksan sa Nobiyembre human linawas nga gisusi sa DFA team ug staff sa kongresista.
Si Chatto nibutyag nga ang sunod nga tinuig nga alokasyon para niini nasuksok na sa umaabot nga DFA budget ug apil sa 2025 National Budget. (Ven Arigo)
Chatto nangayo ug explanasyon sa CHED, BISU mahitungod sa isyu sa Medical Scholarship
Si Cong. Edgar Chatto nangayo og klaro nga tubag gikan sa Commission on Higher Education (CHED) ug sa Bohol Island State University (BISU) mahitungod sa gi-report nga kakuwang sa mga scholarship sa tanang School of Medicine sa nasud, lakip na ang BISU School of Medicine (SOM) para sa School Year 2024-2025.
Ipatawag ni Chatto ang mga opisyal sa BISU nga gipangulohan ni Dr. Anthony Penaso ug SOM Dean Dr. Marvie Hamel Darbandi, uban ang chairman sa CHED sa iyang buhatan sa House of Representatives sa Manila.
Ang pagsusi nagagikan sa impormasyon nga 23 ra sa 47 ka enrollees sa ikaduhang batch sa BISU SOM ang malakip sa Medical Scholarship and Return Service (MSRS) program ubos sa Republic Act 11509 o ang Doktor Para sa Bayan Law.
Nangutana si Chatto sa rason nganong adunay kakulangan sa scholarship sa ikaduhang batch, nga ang tanang 22 ka enrollees sa pioneering batch sa BISU SOM gi-apil man sa MSRS.
Ubos sa Doktor Para sa Bayan Law, ang MSRS program maghatag ug suporta sa mga Pilipinong estudyante nga angay makadawat ug suporta ug gusto mamahimong doctor.
Ang pinansyal nga tabang sa MSRS program naglakip sa libre nga tuition ug uban pang mga bayronon; allowance para sa mga prescribed nga libro, gamit, ug kagamitan; allowance sa uniforme; allowance para sa dormitoryo o boarding house; allowance sa plete; internship fees, lakip na ang pinansyal nga tabang atol sa mandatory internship; bayronan sa medical board review; licensure fees; tinuig nga medical insurance; ug uban pang mga subsistence o living allowances nga may kalabotan sa edukasyon.
Gipaabot ni Chatto ang opisyal nga pahayag gikan sa CHED ug BISU aron ma-klaro ang isyu.
World Bamboo Day Saulogon karong sabado, kagamhanang lokal sa Lila andam na sa paghost niini
Ang kagamhanang lokal sa lungsod sa Lila pinangulohan ni Mayor Arturo Jed Piollo ang andam na ang paghost sa kasaulogan sa World Bamboo Day karong Sabado Septyembre 28.
Kini maoy gikonpirmar ni Mayor Piollo atol sa interbyu sa DYTR news.
Matod ni Mayor Piollo nga welcome ang tanan nga motambong sa kalihokan sa Lila sa pagtanom sa kawayan sa tulo ka mga areas nga mao ang barangay Calvario, Cogon, Hambawan.
Dugang sa mayor nga motambong sa kalihokan sila si Governor Aris Aumentado, Congresswoman Maria Vanessa Aumentado ug 3rd District Congresswoman Alexie Tutor, Bohol mayors ug mga lain laing ahensiya sa gobierno nga moabag sa kalihokan.
Dugang pa ni Mayor Piollo nga way pagduha duha nga nidawat ang lungsod sa Lila sa hagit nga maoy mohost sa World Bamboo Day isip pagsupporta sa Regenisis Program ni Governor Aris Aumentado.
Mapasalamaton sab ang Mayor sa supporta gikan sa kagamhanang probinsyal gipangulohan ni Governor Aris Aumentado ngadto sa ilang lungsod sa pagpahigayon sa World Bamboo Day.
Masaligon si Mayor Piollo nga pinaagi sa gitanom nga kawayan makatabang kini sa kalikopan ug pagdaghan sa supply sa tinubdan sa tubig nga abunda sab ang ilang lungsod.
Tagbilaran City Hall aduna nay bag-ong City Administrator
Si BACU Head Alvin Luis Acuzar mao ang bag-ong City Administrator effective September 24.
Gireconfirm ang reappointment ni Acuzar atol sa regular session sa Sangguniang Panglungsod diin ang resolution giduso ni City Councilor Ondoy Borja.
Samtang, Nessy Relampagos mao ang nihulip kaniya sa Barangay Affairs Constituency Unit (BACU).
Si kanhi City Administrator Cathelyn Torremocha mao karon ang Chief of Staff sa Office of the City Mayor.
BALAK
ANG FAMILYA
Sinulat ni Engr. Rogelio Podelino
Ang familya mao’y sukaranan sa goberno
Diha sa familya nagsukad ang gahum sa tawo
Kay ang familya sama sa gamay’ng goberno
Nga guidumala sa usa ka ulo
Kon ang matag familya malig-on
Ang katilingban sa barangay malinawon
Ang kahapsay mokuyanap sa lungsod
Tanang katawhan lig-ong mobarog sa tinuod
Ang matngonan sa tanan’g katawhan
Kabata-an sa droga angay bantayan
Kay sila dali pa’ng malingla
Sa mga sindikato sa droga
Aron kabata-an mahilikay sa droga
Hatagan sila ug katungdanan sa familya
Sila ang mangulo sa takna sa pag-ampo
Patabangon sa kalihukan bisan unsa’y isugo
Kinahanglan ulo sa familya magmahugtanon
Sa mga patakaran sa familya nga pagasundon
Aron tanan magtuman sa iyang katungdanan
Para ang familya hapsay ang dagan
Ang angay nga dili hikalimtan sa familya
Sa adlaw nga Domingo tanan gayud mosimba
Isilsil sa ilang alimpatakan mga pagtulun-an
Sa Kristohanong tinuhu-an nga mao’y namat-an
Ang familya nga nagtipon sa pag-ampo
Sila sa kanunay nag-ipon pagpuyo
Sa tanan’g familya nga angay buhaton
Kini ANG FAMILYA nga sulundon