By:DONALD SEVILLA
YUTA TANG MINAHAL
Wala damha nga magkauban sila si kanhi Tagbilaran Mayor Atty.Dan Lim, Gob.Rene Relampagos, ,Atty.Edgar Chatto ug Atty Art Yap, mga haligi sa politika sa lalawigang Bol-anon sa usa ka kawsa batok sa kasamtangang namunoan sa Kapitolyo.
Bisag sila mga kaatbang kaniadto ni Dan Lim, ang mga giilang lider sa lalawigan mipadayag ug hugot nga suporta sa adbokasiyang giduso ni Lim alang sa proteksyon sa mga konsumidor sa kuryente sa Bohol ug sa kwarta sa kaban sa katawhan.
Atong nasayran kaniadto pa nga si Lim uban kang Atty.Victor de la Serna ug Atty.Tico Ochavillo dakong supak sa bisan unsang lakang nga makapamahal sa atong kuryente. Siya na lamang ang nahibilin sa orihinal nga grupo kay mitaliwan naman ang iyang mga kauban.
Apan bisan pa niini iyang gipadayon ug gibarugan ang maong katuyoan ug giisip nga hagit aron mayagyag ang kamatooran ug masabtan sa mga yanong Bol-anon pinaagi sa pagdagan batok sa mga gamhanan sa Kapitolyo.
Atong kahinumdoman nga si Mayor Dan gitudlo isip Vice Chairman sa OGÀR( Office of Governance Accountabilty and Review) ni Gob.Aris Aumentado, diin ang maong opisina gihimo aron mahimong haligi ug sumbanan sa iyang liderato.
Apan unsa kahay mga nahitabo sa tago, nakita ug naobserbahan sa kanhi Mayor nga maoy nakapaaghat kaniya pagkalas sa administrasyon ni Aumentado?
Walay perpektong lider apan si Lim nakahuman sa 3 ka termino isip Mayor sa dakbayan sa Tagbilaran.Sanglit adunay mga kritiko ug dili moangay kaniya ang iyang kasinatian sa dugay ng pangalagad dili malalis.
Usa ka abogado si Lim ug gibantog nga mosolti gayod sa iyang makitang kahiwian sa walay pagduha-duha.
Ang BLCI (Bohol Light Company Inc.) usa ka joint-venture company tali sa kagamhanang probinsiyal ug SALCON. 70% nini ang gipanag-iya sa SALCON ug gibaligya ngadto sa MORE POWER nga iya sa RAZON Group conglomerate nga nakapakurat sa tanan.
Walay igong aksyon ang lalawigan sa pagtoon ug paggamit sa iyang katungod sa “right of first refusal” batok sa maong transaksyon nga nakahatag ug pagduda sa kadaghanan.
Ulahi na ang mga lakang nga gipanghimo sa probinsiya kay hilom ug dugay raman diay nahalin kini.
Busa tùngod niini nitumaw ang mga pagtoo nga ang BOHECO 1 and 2 maoy sunod ipahigayon sa “privatization”. Ang RAZON Group dakong negosyo nga adunay nagkalain-laing interes sa port cargo handling ug public utilities, casino gaming operations ug uban pa.
Human sa pagpalit sa BLCI unsa na kaha ang mosunod? Matukod na ba kaha ang dagkong casino o pasugalan sa atong lalawigan?
Ang kasamtangang administrasyon mailhan sa mga lihok niini. Ang old Tagbilaran airport gipaabangan sa usa ka BPO(Call center) nga wala kita makadungog nga miagi sa public bidding. Dunay dakong shipyard nga natukod ug nag-operate dool sa mga pagatpatan sa usa ka lungsod sa Norte nga wala mabantayi sa atong mga enviromentalists. Ang bag-ohay gideklarar nga UNESCO World Geopark nga naglangkop sa Chocolate Hills nahimong kontrobersiyal dili pa lang dugay tungod sa mga istrukturang natukod niini alang sa negosyo sa turismo.
Kung ang panggobyerno puro nalang negosyo ug makitaan ang giatubang asa naman paingon ang interes sa publiko?
Kung naģpasulabi ang negosyo kay sa serbisyo unsa naman lang ang atong kapadulngan?
Ang usa ka lider nga adunay pagbati sa kaayohan sa katawhan kanunay naglantaw niini.Tingoha sa maayong lider ang makahatag ug ikabilin sa iyang mga ginsakpan.
Sa mga panghitabo karon ang usa ka Bol-anong dunay pagbati sa iyang yutang natawhan dili makaako nga walay buhaton ug dili manginlabot.
Sa tulo(3) ka tuig sa mga namunoan karon niabante ba ang atong kinabuhi? Natuman ba ang mga matam-is nga saad sa panahon sa kampanya nga nakapadani kanato?
Ang paghugop suporta sa atong mga kanhi lideres nagdala ug bug-at nga mensahe nga angay natong paminawon ug hinoklogan.Sa mga umaabot nga adlaw unsa kaha ang mga pasabog ni Atty.Dan Lim nga magbutyag sa tinooray nga estado sa atong panggobyerno dinhi?
Kung ang tanan magkatapok sa nagkahiusang kawsa nga dili pamolitika, ang kalamboan ug kalamposan dili halayo nga makab-ot ta!
#BarugBohol