Bag-o nga office hour schedule, payment partners gipahibalo sa BLCI
Sinulat ni Sheryl B. Paga
Ang buhatan sa Bohol Light Company, Inc. (BLCI) nga karon ubos na sa pagdumala sa Primelectric Holdings Inc. (PHI), buot magpahibalo sa atong mga konsumidor sa kabag-ohan sa oras ug adlaw sa business transaction diha sa opisina.
Sugod niadtong Nobyembre 1, 2024, gi-implentar ang 40-hour workweek schedule nga kanhi 48 hours. Abli ang opisana sugod Lunes hangtod sa adlaw’ng Byernes na lamang gikan sa alas 8:00 sa buntag hangtud sa alas 5:00 sa hapon.
Busa, kung kinsa kadtong gustong mubayad sa adlaw’ng Sabado, mahimo kitang muadto sa bisan asa nga sangang buhatan sa M.Lhuilier sa tibuok nasud.
Palihog ug dala sa mga billing statements alang sa kasayon sa atong transaction diha sa atong mga payment partners.
Pwede usab kitang mubayad pinaagi sa atong pinakabag-o karon nga QR Pay App sa Security Bank payment facility. Ang atong buhaton mao lamang kining musunod:
1. Pagkuha ug QR Code:
∙ Magpadala lamang kita ug mensahe sa BLCI QR Pay Facebook Account ug ihatag ang atong registered Account Number ug Account Name. Mahimo usab kitang magpadala ug e-mail sa accounting_blci@bohollight.com o i-text sa mobile number 0950-520-5643.
∙ Adunay in-charge nga maoy mo-generate sa individual unique QR Code alang sa matag registered account. Sa pagkakaron, available kini panahon sa Office Hours, 8:00a.m.-5:00p.m.
2. Unsaon Paggamit ang QR Scan Code:
∙ Gamita ang imong mobile banking app o bisan unsang QR code scanning app aron ma-scan ang code gamit niining musunod nga mga online facilities:
∙ Isulod ang kantidad sa bayad, ug kompletoha ang transaksyon.
3, Mga angayan nga hinumduman kung kita mubayad pinaagi sa e-payment:
∙ Ang matag QR Code permanente, talagsaon, ug dili mabalhin sa bisan kinsa nga kustomer.
∙ Kini nga e-payment applicable lamang ngadto sa mga konsumidor nga WALAY OVERDUE o WALAY NAKATATAK NGA NOTICE OF DISCONNECTION aron pagsiguro nga malikayan sa kahasol kon kita maputlan.
Nagdasig ang BLCI sa paggamit niining maong pamaagi sa QR Pay Code diin pwede natong gamiton bisan kanus-a ug bisan asang dapita.
Alang sa dugang mga kasayuran, mahimo kitang motawag sa telephone numbers (038) 412-3503/ 501-7762 local 208.
Mga linya sa tubig gipamutang agi ug pangandam sa tukuron nga dako nga commercial establishment
Sinulat ni Victor L. Tambis
Linya sa tubo giladlad sa Bohol Water agi ug pagpangandam sa tukuron nga dakong commercial establishment
Kuyog sa kalamboan sa syudad ilabi na sa umaabot nga tukuron nga dakong establisimento komersyal nga anaa sa Hangos St, haduol sa City hall ug sa Kapitolyo, ang Bohol Water miladlad ug mga linya agi ug pagpangandam sa gikinahanglan nga tubig kuyog niini.
Gibanabana nga dako ang bul-og sa tubig nga gikinahanglan sa maong mga commercial establishment mao nga ang Bohol Water mipuli sa mga linya sa tubo gikan sa 3”diametro ngadto sa 4”diametro padulong na sa sulod sa Hangos St. gikan sa J.A. Clarin haduol sa Panda Tee.
Gipahimuslan kini sa Bohol Water samtang ngatrabaho usab ang contractor sa road improvement sa maong lugar diin anaa nagsubay ang mainline padulong na sulod sa maong dapit.
Gihimo sa maong Kompanya kining maong trabaho sa pagpuli sa mga linya niini aron ikapaniguro nga sa dili pa magsugod ang pagtrabaho sa maong dakong commercial establishment, mahuman na o ready na ang linya nga sarang mag supply sa tubig sa maong dapit.
Usa kini ka dugang kalamboan, ilabi na nga gikataho usab sa Bohol Water sa mi-aging semana ang pag reactivate sa PU# 13 nga nag-alagad sa Barangay Cogon ug Booy.
Lakip kini sa programa sa Bohol Water pag-palambo sa serbisyo sa panubig sulod sa gialagaran nga lugar o franchise area ug lakip usab ang mga kasilinganan nga mga dapit diin ang Bohol Water nagaplano usab sa pag expand sa service area.
DENR, nipasidaan sa publiko sa posibleng panghitabo sa pagdahili sa yuta ug pagbaha
Sinulat ni Elvira Bongosia
Gipa-amping karon sa Department of Environment and Natural Resources (DENR) ang publiko tungod sa mga posibleng insidente sa pagdahili sa yuta ug pagbaha sa nasud.
Base sa datos ng DENR – Mines and Geosciences Bureau, nikabat na sa 1,995 ka mga barangay sa Pilipinas ang prone sa landslide ug pagbaha.
Kini natala sa Cordillera Administrative Region (CAR), Ilocos Region, Cagayan Valley, MIMAROPA, Central Visayas ug Western Visayas base na usab sa datos nga nakalatid sa geohazard maps.
Matud pa sa DENR nga nihatag na sila ug abiso sa tanang mga local government units (LGUs), Disaster Risk Reduction and Management Councils (DRRMCs) ug bisan sa mga residente.
Nanawagan usab ang DENR nga magpatuman sila ug preemptive evacuation protocols.
Giingong mas maayo nga susihon ug maayo ang mga lugar nga nakasinati ug pagdahili sa yuta sa dili pa pabalikon ang mga residente sa ilang mga panimalay.
Ang MGB nag-awhag sa publiko nga magbantay sa mga geohazard sa ilang lugar pinaagi sa pagsusi sa MGB-published geohazard maps nga anaa sa online platforms sama sa GeoriskPH’s HazardHunterPH: [HazardHunterPH](https://hazardhunter.georisk.gov.ph).
Ang DENR–Mines and Geosciences Bureau nipagawas niining listahan sa mga barangays nga natino isip landslide-and-flood prone nga mga lugar gikan Oktubre 27 hangtod Nobyembre 1, 2024. Bisan pa nga wala malakip sa kasamtangang listahan ang pipila ka probinsiya nga nahisgutan sa DOST-PAGASA nga mga advisories nga naapektuhan sa STS Kristine, gitambagan gihapon ang publiko sa pag-activate sa mga tukma nga mga lakang sa pagpangandam ug bantayan ang umaabot nga geohazard advisories, kung adunay kalit nga pagbag-o sa ulan o kahimtang sa panahon. (Hulagway gikan sa DENR/PIA)
‘Lakbay Alalay’ gi-activate sa DPWH alang sa Kalag-kalag
Sinulat ni Elvira Bongosia
Gi-activate sa Department of Public Works and Highways (DPWH) ang Lakbay Alalay Motorists Assistance Program aron makatabang sa pagsiguro sa kaluwasan sa kadalanan ug hapsay nga pagbiyahe atol sa pagsaulog sa All Souls’ Day ug All Saints’ Day.
Sa gipagawas nga pahayag ni DPWH Kalihim Manuel Bonoan, niingon kini nga iya nang gimando ang deployment sa composite teams ngadto sa mga strategic locations sa tibuok nasod aron madumala ang gipaabot nga pagdagsang sa mga motorista, ilabina gikan sa alas 8:00 sa buntag sa Oktubre 31, 2024, hangtod sa alas 5:00 sa hapon sa Nobyembre 2, 2024.
Kini nga mga DPWH Lakbay Alalay Teams, matud niya, gilangkoban sa mga uniformed field ug crew personnel nga motrabaho sa round-the-clock shift sa ilang gitudlo nga mga estasyon.
Matud pa niini nga gipaabot ang pagdagsa sa mga motorista alang sa Undas 2024 maong ilang gipalihok ang ilang Lakbay Alalay Motorists Assistance Stations aron mahatagan dayon ug kasaligan nga tabang ang mga nagbiyahe nga publiko.
Ang DPWH Regional ug District Engineering Offices sa tibuok nasod aktibo usab nga nagpahigayon ug routine maintenance activities sa mga national roads, ilabina sa mga rota paingon sa mga sementeryo ug simbahan.
Dugang pa, ang mga nag-implementar nga mga opisina nga adunay nagpadayon nga mga proyekto sa mga dagkong ruta gimandoan sa pag-align sa mga iskedyul sa proyekto, lakip ang pag-instalar sa mga road safety signage ug mga pahimangno sa trapiko, aron malikayan ang paghuot sa trapiko ug mga aksidente.
Ang DPWH nakigtambayayong usab sa ubang mga ahensya sa gobyerno, apil ang Land Transportation Office (LTO), Philippine National Police (PNP), ug local government units (LGUs), alang sa bisan unsang gikinahanglang tabang.
Ang DPWH nagpahigayon usab ug massive cleanup drives ug repair works sa mga nasudnong dalan ug mga taytayan aron masiguro ang road safety ug episyente nga kasinatian sa pagbiyahe alang sa umaabot nga All Souls Day ug All Saints Day. (Hulagway gikan sa DPWH/PIA)
P29/kg nga bugas ibaligya sa mga huyang nga sektor sa lungsod sa Pilar, San Miguel
Sinulat ni Elvira Bongosia
Ipihigayon sa National Irrigation Administration (NIA) Region VII ang pagpamaligya sa ‘Bagong Bayaning Magsasaka (BBM) Rice nga tag P29 matag kilo sa lungsod sa Pilar ug San Miguel.
Sa Oktubre 29 (Martes), mapalit ang tag P29/kg nga bugas sa La Suerte Barangay Hall, sa La Suerte, lungsod sa Pilar.
Samtang sa Oktubre 30 (Miyerkoles) mapalit ang BBM rice sa Cambangay Norte Barangay Hall, Cambangay Norte, lungsod sa San Miguel.
Ang mga huyang nga miyembro sa komunidad nga naglakip sa mga senior citizens, solo parents, 4Ps beneficiaries, ug persons with disabilities (PWD) ang makapalit lamang sa maong mga bugas.
Gipahinumdoman sila sa NIA-7 sa pagdala sa ilang senior citizen, solo parent, PWD o 4Ps identification card.
Gi limitahan lamang og usa ka sako matag tawo ug pinaagi sa ‘first come, first serve basis’ ang pagpalit sa maong barato nga bugas.
Matud pa ni NIA-7 information officer Zarline Sambas, ang bugas nga ibaligya abot gikan sa mga Bol-anong mag-uuma nga niapil sa NIA Farming Support Program (Contract Farming).
Ang pagpamaligya sa mga baratong bugas sa kalungsoran nagpaila sa pagsugod sa panahon sa pag-ani ug usa ka milestone human sa malampusong pagpatuman sa Farming Support Services Program (Contract Farming) sa NIA, nga naghatag og P50,000 kada ektarya sa mga mag-uuma alang sa mga liso, abono, ug salapi.
BBM Rice @P29. Ang mga bugas nga ginabaligya sa NIA abot gikan sa mga Bol-anong mag-uuma nga niapil sa NIA Farming Support Program (Contract Farming). (Hulagway gikan sa PIA7-Bohol)
BALAK
UNSA KABALA-AN ANG GUGMA
Sinulat ni Engr. Rogelio Podelino
Guina-ingon sa mga karaang panultihon
Nga guinasunod sa mga tawo karon
Ang gugma usa ka buta
Ug ang nahigugma dili makakita
Ang gugma dili nimo masayran
Ngano sa kasingkasing nagaguikan
Daklit lang kining motuyhakaw
Sa panahon ikawmora ug walay hanaw
Sa oras nga bati-on ka ug gugma
Imong kaugalingon siguing nag-alingasa
Gusto nimo ang guihigugma makita kanunay
Kay bati-on ka ug katagbawan sa kalipay
Ang tawo nga nahigugma
Tanang oras andam ug tagana
Nga magsakripisyo para sa guihigugma
Kay ti-unay ug busilak ang iyang gugma
Wala nay molabaw sa gugma sa GINOO
Nga guitagana alang lamang sa tawo
Natawo ug namatay ang BUGTONG ANAK
Para ang katawhan dili mahisugamak
Ang guibuhat sa atong MANUNUBOS
Mga katawhan sa ilang mga sala natubos
Kini ang virtud sa DIOSNONG GUGMA
Ingon ni-ana ang: UNSA KABALAAN ANG GUGMA