Republic Act 12063: Solusyon na Kaha sa Daghang Gradwado Nga Walay Trabaho?
Ni ELEAZAR TUTOR ACAMPADO
SUKAD kaniadto ug hangtod karon, nagprodyus kita og daghang gradwado apan kulang sa oportunidad nga makatrabaho. Maoy hinungdan nga daghan kanila, apil na ang liboan ka mga Bol-anon, nanglangyaw sa laing nasod nga nagtanyag og daghang oportunidad sa pagpanarbaho.
Apan subo usab palandongon nga bisan pa sa kadaghan sa mga trabaho didto, duna kitay mga gradwado ug pasado sa board exam sa pagka titser, pagka nurse, pagka midwife, ug uban pa nga nagpaulipon isip mga sulugoon sa mga harianon ug kuwartaan nga mga amo.
Dili nato sila mabasol. Kay mas palabihon pa nila nga magpaulipon basta naay ikapakaon sa pamilya kay sa maghangad sa langit ug mogahi ang tiyan sa kagutom.
Ang kakulang sa oportunidad sa pagpanarbaho dinhi sa Pilipinas usa ka kritikal nga isyu nga padayon nga gipangitaan og solusyon sa daghang mga presidente nga nanimon sa atong nasod. Apan karon padayon gihapon… ug misamot pa sa pagsulbong sa atong populasyon.
Ning bag-o lang, gipirmahan ni Presidente Ferdinand R. Marcos Jr, ang Republic Act 12063 kun Enterprise-Based Education and Training (EBET) Framework Action. Kini nga balaod gipasar aron mahatagan og kasulbaran ang kritikal nga isyu sa kawalay trabaho sa daghang mga gradwado.
Ang Republic Act 12063, o EBET Framework Act nagtumong aron mapalig-on ang apprenticeship program sa nasod ug matubag ang panginahanglan sa jobs-skills mismatch. Unya maugmad ug madugangan ang kahanas sa atong mga trabahanteng Pilipino aron makakompetensiya sa tibuok kalibotan.
Kining bag-ong balaod usa ka dakong tulay aron mahatagan og solusyon ug maugmad ang pagpanarbaho sa nasod pinaagi sa pagpokus sa pagpausbaw sa kahanas ug kalamboan sa matag Pilipino nga mosulod sa pagpanarbaho ug negosyo.
Mopalig-on kini sa pakigtambayayong sa pribadong mga sektor aron ipahaom ang mga programa sa pagbansay-bansay sa tinuod nga panginahanglan sa industriya nga sudlan sa usa ka trabahante.
Kon hingpit kining matukod ug mahan-ay ang pagpauswag sa karera ug mga kahanas sa mga Pilipino nga may kalabotan sa industriya, direkta kini nga makatubag sa kakulangon sa pormal nga pagbansay-bansay ug dili haom nga mga kahanas sa usa ka trabaho. Unya maseguro nga ang matag Pilipino makatampo og dako sa kaugmaran sa nasod ug makabenepisyo sa pag-angat niini.
Manghinaot kita nga hingpit gyod kining tutukan sa mga magdumala ning maong programa ug hatagan og dakong pagtagad ang kabatan-onan sa mga probinsiya ilabina sa lalawigan sa Bohol. Ug aron masangkapan sila sa tukma nga kahanas nga ilang gikinahanglan sa pagpangita og trabaho nga mohaom kanila.
Sa sunod gula, hisgotan nato ang dakong oportunidad sa pagpanarbaho isip OFW kun Online Filipino Worker.
Malipayong adlaw, Sano, ug daghang salamat sa pagsunod sa atong kolum matag Domingo.
Si Eleazar Tutor Acampado, kanhi staff writer sa Bisaya Magazine. Nakadaog na sa Palanca Literary Awards for Cebuano Short Stories. Ug kasamtangang nagserbisyo isip Sangguniang Barangay member sa West Poblacion, Garcia-Hernandez, Bohol.