Bohol Light: Update sa Gipahigayon nga Meter Mapping
Sinulat ni Sheryl B. Paga
Ang Bohol Light Company Inc. (BLCI) nagpatuman og usa ka city-wide meter mapping activity sugod sa Nobyembre 4, 2024 sulod sa prangkisa dinhi sa syudad sa Tagbilaran. Gipahigayon kini pinaagi sa tabang sa third-party service provider nga mao ang i3BSolutions OPC.
Ang tumong niini mao ang pag-update sa mga rekord sa mga konsumidor pinaagi sa geotagging aron makakuha ug tukma nga pagbasa sa mga metro, episyente nga paghatag sa mga electricity bills ug sayon nga pagresponde sa mga reklamo gikan sa mga konsumidor..
Sugod kaniadtong Nobyembre 4-8, 2024, anaa na kini sa 11.8% sa kinatibuk-ang tala sa active registered consumers nga 23,605 nga gilangkuban sa 15 ka mga barangay dinhi sa syudad sa Tagbilaran.
Dako ang pasalamat sa Bohol Light nga sulod sa usa ka semana nga paghimo sa maong aktibidad, wala kini’y nahibagat nga problema gikan sa atong mga konsumidor. Ang atong kooperasyon dako ug tabang aron mas mapadali ang paghuman sa maong komprehensibong trabaho.
Busa atong bantayan kining musunod nga mga butang:
1. Paghatag ug access sa premises: Atong siguraduhon nga ang mga teknisyan walay babag nga maka-access sa mga metro alang sa inspeksyon.
2. Limpyo nga mga dalan: Palihug atong siguraduhon nga walay babag ang mga dalan nga paingon sa inyong metro, sama sa mga nakapark nga sakyanan o mga debris, aron makapadayon ang mga teknisyan sa ilang mga buluhaton.
3. Mga hayop alang sa siguridad: Kung naa kamoy mga hayop sama sa iro, palihug nga siguruha nga luwas ang mga teknisyan sa panahon sa pagbisita aron walay mahitabong aksidente.
Ang tanang mga field personnel sa meter mapping activity nagsul-ob sa ilang company IDs alang sa husto nga pag-ila isip representante gikan sa buhatan sa Bohol Light.
Kung aduna kitay mga pangutana o kabalaka kabahin niining mapping activity, ayaw pagpanuko sa pagtawag sa Customer hotline pinaagi sa telepono sa (038) 412-3503 lokal 103 o 200 o mobile number sa 0922-307-2161.
Ang pagsalig sa katawhan, sa kanunay gihatagan ug bili aron padayon ang pagserbisyo sa Bohol Light isip tagahatag sa kuryente dinhi sa dakbayan sa Tagbilaran. Atong lauman nga sa kanunay ang BLCI maghatag kaninyo sa labing maayong serbisyo.
Bag-ong schedule sa office hours gihatag sa Bohol Water
Sinulat ni Victor L. Tambis
Makita sa hulagway ang payment area sa buhatan sa Bohol Water
Ang opisina sa Bohol Water nagpahibalo ngadto sa mga konsumidor nga ang maong buhatan mag abli sa adlawng Lunes hangtod sa Byernes na lamang ug dili na kini mag-abli sa adlawng Sabado.
Tungod niini, wala nay pagadawaton nga office transaction sa adlawng Sabado lakip ang pagdawat sa bayad sa mga water bills.
Gipahibalo usab nga walay noon break ang pagdawat sa bayad sa tubig gikan sa alas 8:00 sa buntag hangtod alas 5 sa hapon, Lunes hangtod sa Byernes na lamang.
Bisan sa maong kausaban, aduna gihapoy kalihokan ang maong buhatan sa adlawng Sabado diin aduna gihapoy mo duty, sama sa; mga pump operators diin 24 oras kini nga nagmonitor sa tanang mga pumping stations, ang mga tinugyanan sa maintenance group sa Production Section, mga tinugyanan sa Distribution Section diin sila ang mo atiman sa mga emergency repair sa mga leakage sa linya.
Sa maong kausaban sa adlawng trabahoan, ang mga konsumidor sa Bohol Water adunay kapilian nga adto kini mobayad sa mga payment partners nga mag-abli sa adlawng Sabado, sama sa: M. Lhuiller, Palawan Express/Pawnshop ug sa mga on-line payment partners nga mao ang G-Cash pinaagi sa Security Bank, FCBpay, ML Wallet, Palawanpay ug ang Bayad Centers (tungod kay sa adlawng sabado serado usab ang FCB, LandBank, Security Bank ug Bank of Commerce). Sa kanunay padayon naninguha ang buhatan sa Bohol Water nga mahatagan ug sayon ug conveniente nga paagi sa pagbayad.
Isla sa Panglao nalakip sa Top 10 Trending
Destinations sa Skyscanner alang sa 2025
Sinulat ni Elvira Bongosia
Ang isla sa Panglao nalakip sa Top 10 Trending Destinations sa Skyscanner alang sa 2025, ang bugtong destinasyon sa Pilipinas nga nasulod sa listahan.
Nahimutang sa ika-8 nga pwesto sa listahan sa labing maayong mga lugar nga bisitahan, ang Panglao nakakita ug impresibong 77% nga pagtaas sa mga pagpangita sa flight sa unang tunga sa 2024, nga nagpalig-on sa status niini isip usa ka pangunang destinasyon sa turismo sa eco-cultural.
Ang Skyscanner, usa ka nanguna nga platform sa pagbiyahe sa kalibotan, gibase kini nga mga ranggo sa pagtaas sa mga pagpangita sa paglupad tali sa Enero 1 ug Hunyo 30, 2024, kung itandi sa parehas nga panahon sa 2023.
Ang Reggio Calabria sa nasud sa Italy ang nag-una sa pwesto nga nakakuha ug 541% nga pagtaas sa mga pagpangita sa paglupad.
Ang Top 10 Trending Destination sa Skyscanner alang sa 2025 naglakip sa Reggio Calabria, Italy (+541% nga pagtaas); Tartu, Estonia (+294% nga pagtaas); Siem Reap, Cambodia (+241% nga pagtaas); Baltimore, USA (+217% nga pagtaas); Portsmouth, Dominica (+186% nga pagtaas); Cordoba, Spain (+133% nga pagtaas); Tromso, Norway (+85% nga pagtaas); Panglao, Bohol, Philippines (+77% nga pagtaas); Stuttgart, Germany (+70% nga pagtaas); ug Thiruvanan-thapuram, India (+66% nga pagtaas).
Nahimutang sa habagatan-kasadpan sa Bohol, gipasigarbo sa Panglao ang limpyo nga mga baybayon niini ug ang buhi nga kinabuhi sa dagat nga naghimo sa isla nga usa ka sikat nga destinasyon alang sa mga mahigugmaon sa baybayon ug mga mananalom. (Hulagway gikan sa PIA7-Bohol)
PAGHANDUM: The President Carlos P. Garcia Memorabilia Collection, usa ka gasa sa nasud gikan sa mga kaliwat ni Presidente CPG
Sinulat ni Elvira Bongosia
Gi-inagurahan sa National Museum of the Philippines (NMP)-Bohol niadtong Nobyembre 4 ang bag-ong exhibit nga giulohan ug PAGHANDUM: The President Carlos P. Garcia Memorabilia Collection, dungan sa anibersaryo sa pagkahimugso sa labing bantogang anak sa probinsiya.
Ang exhibition sa gallery adunay pinili nga mga artwork, litrato, muwebles, ug personal nga memorabilia—pagpasidungog sa malungtarong kabilin sa kanhi Presidente.
Ang Paghandum exhibit usa ka nindot nga paagi sa pagpasidungog sa kabilin ni Presidente CPG, usa ka inila nga tawo sa kasaysayan sa Pilipinas ug usa sa labing gitahud nga mga anak sa Bohol.
Ang iyang kinabuhi ug mga kontribusyon, ilabina ang iyang Filipino First Policy ug dedikasyon sa kagawasan ug kultura sa Pilipinas, angay nga saulogon ug hinumdoman.
Ang President Carlos P. Garcia Memorabilia Collection usa ka gasa sa nasud gikan nila Maria Carla Josefa G. Campos, Jose Carlos G. Campos, ug Isabel Campos Bustos— mga manununod ni Presidente CPG.
Sa iyang mensahe, si Gob. Erico Aristotle Aumentado miingon nga isip mga Boholano, angay nga i-highlight kanunay ang mga kalampusan nga nahimo ni kanhi Presidente CPG sulod sa iyang katuigan sa gobyerno, nga nagpasabot sa kontribusyon niini sa ekonomiya sa nasud.
Ang kabilin ni CPG milapad isip usa ka magbabalak, orator, magsusulat, magtutudlo, abogado, lider gerilya, senador, ekonomista sa politika, ug estadista, nga nag-umol kaniya isip ehemplo sa pasalig sa soberanya sa Pilipinas ug kagawasan sa ekonomiya nga gilakip sa iyang Filipino First Policy.
Ang Filipino First Policy nagpasiugda sa primacy sa mga industriya sa Pilipinas kay sa mga langyaw nga negosyo pinaagi sa paghatag gahum sa mga lokal nga prodyuser ug paggarantiya sa pinalabi nga mga katungod sa mga Pilipino sa mga butang sa nasudnong ekonomiya ug patrimonya.
Nahimutang sa 2nd floor sa NMP-Bohol, bukas kini sa publiko gikan sa adlaw’ng Martes hangtod Domingo, gikan alas 9 sa buntag hangtod alas 5 sa hapon.
Ang exhibit sa NMP-Bohol naghatag ug kahigayonan sa mga lokal ug bisita nga maapresyar ang epekto sa nasud ni kanhi Presidente Carlos P. Garcia, ang kinabuhi ug kabilin sa ika-8 nga Presidente sa nasud. (Hulagway gikan sa PIA7-Bohol)
Listahan sa regular ug special non-working
holidays sa 2025, gipagawas sa Malacañang
Sinulat ni Elvira Bongosia
Si Presidente Ferdinand R. Marcos Jr. ni-isyu sa Proclamation No. 727 nga nagdeklarar sa regular holidays ug special (non-working) days alang sa tuig 2025.
Sumala sa proklamasyon sa Presidente nga gilagdaan ni Executive Secretary Lucas Bersamin niadtong Oktubre 30, ang mga regular holidays ug special (non-working) days sa nasud alang sa tuig 2025 mao ang mosunod:
Regular holidays – New Year’s Day – Enero 1 (Miyerkoles), Araw ng Kagitingan – Abril 9 (Miyerkoles), Huwebes Santo – Abril 17, Biyernes Santo – Abril 18, Labor Day – Mayo 1 May (Huwebes), Independence Day – Hunyo 12 (Huwebes), National Heroes Day – Agosto 25 (Katapusang Lunes sa Agosto), Bonifacio Day – Nobyembre 30 (Domingo), Christmas Day – Disyembre 25 (Huwebes), ug Rizal Day – Disyembre 30 (Martes).
Special (non-working) days – Ninoy Aquino Day – Agosto 21 (Huwebes), All Saints Day – Nobyembre 1 (Sabado), Feast of the Immaculate Conception of Mary – Disyembre 8 (Lunes), ug Last Day of the Year – Disyembre 31 (Miyerkoles).
Additional Special (non-working) days – Chinese New Year – Enero 29 (Miyerkoles),
Sabado Santo – Abril 19, Christmas Eve – Disyembre 24 (Miyerkoles), ug All Saints’ Day Eve – Octobre 31 (Biyernes).
Samtang special (working) day ang EDSA People Power Revolution Anniversary sa Pebrero 25 (Martes).
Ang mga proklamasyon nga nagdeklara sa nasudnong holidays alang sa pag-obserbar sa Eidul Fitr ug Eidul Adha ipagawas human matino ang gibanabanang petsa sa Islamic holidays pinasubay sa Islamic calendar (Hijra) o sa lunar calendar, o sa Islamic astronomical calculations, hain man ang magamit.
Ang National Commission on Muslim Filipinos morekomendar ngadto sa Presidente sa aktuwal nga mga petsa diin kini nga mga holidays matag usa matunong.
Gitahasan sa proklamasyon ang Department of Labor and Employment (DOLE) sa pag-isyu sa implementing guidelines alang sa proklamasyon, nga gipaabot nga epektibo dayon.
Ang updated nga listahan sa mga holiday sa sunod tuig, base sa Proclamation No. 727 nga giisyu sa Malacañang niadtong Oktubre 31. Kini wala maglakip sa Eid al-Fitr ug Eid al-Adha. Usa ka bag-ong Proklamasyon ang ipagawas kung ang petsa niini gitakda sumala sa Islamic nga kalendaryo (Hijra), o lunar nga kalendaryo, o mga kalkulasyon sa astronomiya sa Islam. (Hulagway gikan sa PIA-Bohol)
Krimen gikan Hulyo-Sept
mikunhod ug 3.92 %: PNP
Tres puntos nobenta y dos (3.92 %) porsyento nga magkunhod o mas dyutay ang natala nga mga krimen nga nahitabo sa Bohol niining tuiga, kon itandi sa susamang panahon sa miaging tuig.
Sa pagka matudo, mikunhod ang kinatibuk-an nga krimen sa Bohol gikan sa Hulyo 1 ngadto sa Septembre 30, 2023 kon itandi sa susama nga higayon sa 2024, taho sa Kampo Dagohoy nga karon ubos na ni Police Senior Superintendent Arnel Banzon.
Ta taho sa Bohol Provincial Police Office (BPPO) pinaagi ni operations officer Police Major Fernandez, gikan sa 696 ka krimen nga makahulga sa kalinaw ug kahapsay, nakuhaan na kini ug 50 ka kaso gikan sa Hulyo ngadto sa Septembre 30, 2024, nga karon anaa na sa 645.
Ang pagkunhod, mikabat sa 7.19 porsyento.
Sa pagtandi sa mga salaud nga may kalambigitan sa pagpatay-ug sa kahimtang sa kalinaw, sa kinaibuk-an nga salaud nga may kalambigitan sa kahapsay ug kalinaw, gikan sa 204 ka kaso, 138 na ka kaso nga napailawom sa kadtong masilotan sa Revised Penal Code.
Apan bisan pa kong mikunhod ang mga kaso, matud ni Police Major Christopher Ras Fernandez, operations chief sa Kampo Dagohoy, kadtong mga salaud nga masilotan sa mga espesyal mga balaod, may 16 ka kaso nga pagsaka, gikan sa 491 ngadto na sa 507.
Sa laing bahin, sa mga krimen nga naghulga sa kaluwasan sa katawhan, gikan sa 962 ka kaso sa miaging tuig, 947 na karon ang krimen nga nahitabo sulod sa 92 ka adlaw.
Ang 15 ka kaso nga pagkunhod, katumbas sa 1.58 porsyento.
Sa duha ka matang sa salaud, nakab-ot s amga crimebusters sa Kampo Dagohoy ug sa kinatibuk-ang pwersa sa kapolisan sa Bohol ang 3.92 porsyento nga pagda-us-os sa kaso sa krimen, base sa mosunod:
Gikan sa Hulyo 1-Sept 30, 2023 nga may 1657 ka kaso, kini napa-kubos ngadto sa 1592 sa 2024, o kinatibuk-an nga 65 ka kaso ang nawala. (RAHC/PIA-7/Bohol)
LINAW NA. Sa taho sa 47IB kabahin sa hulga sa mga rebelde, wala nay namatikdan nga mga kagubot, bisan sightings man lang, matud ni Major Jayrod Cabahug, didto sa hiniusang PPOC ug PADAC didto sa Ceremonial Hall sa Kapitolyo, Nob 6, 2024. (Hulagway gikan sa PIA-Bohol)
17 coastal towns mahi-apil
Sa FishCore Project – BFAR
Napulo ug pito sa 29 ka mga coastal municipalities sa Bohol ang mahi-apil sa Philippine Fisheries and Coastal Resiliency Project (FishCoRe) nga gipundohan sa World Bank ug ipatuman sa Bureau of Fisheries and Aquatic Resources (BFAR) sulod sa pito ka tuig, kini matud ni BFAR Provincial Fisheries Officer Candido Samijon.
Ang mga kalungsuran sa Panglao, Dauis, Baclayon, Alburquerque, Loay, Lila, Dimiao, Valencia, Garcia Hernandez, Jagna, Duero, Guindulman, Anda, Candijay, Mabini, Carlos P. Garcia ug Ubay, maoy mga kalungsuran nga kanng kinsang mga mananangat ug namuhi ug isda sa mga fish cages, mahimong mahatagan pa ug dugang panginabuhi-an ug teknikal nga tabang gikan sa P11 bilyones nga proyekto nga ipatuman usab sa duha ka Fisheries Management Areas (FMA) sa nasud.
Kini mao ang FMA 6 nga gilangkoban sa mga lalawigan sa Region 1, Region 3, Region 4-A, Region 4B, National Capital Region ug Cordillera Autonomous Regions ug sa FMA 9 nga naglakip sa Region 7, Region 8, Region 9, Region 10 ug Region 13, nga may kinatibuk-ang kadagatan nga moabut sa 32 milyones ka ektarya nga kadagatan ug katubigan sa nasud, dugang ni Samijon.
Dinhi, gilauman nga 1.15 milyones ka mga sakop sa industriya sama sa mga mangingisda, mga nagnegosyo sa pangisda ug panagatan, lakip na ang uban pang abay nga mga stakeholders gikan sa 24 ka lalawigan ug 11 ka rehiyon sa nasud makabenepisyo sa mga bansay sa pagpalig-on sa kapasidad sa pagdumala sa mga kadagatan ug pangidaan subay sa lagda sa FMAs pinaagi sa pagplano nga gikonsiderar ang climate resilience aron mapahi-uli ang kasaligan nga suplay sa pagkaon gikan sa marine ecosystems.
Niini, abagan sila sa mas moderno ug molahutay nga panginabuhian ug pamuhunan, pagpamenos sa usik sa makuha nga isda ug kahinguhaan aron mas modaku ang abut ug himoong mas kasaligang panginabuhian ang pangisda.
Pinaagi usab niini, magamhan ang mga kawani sa BFAR sa paghimo ug mga impratsraktura ug lig-on nga mga sistema aton mapatunhay ang maayong pagdumala sa mga proyekto sa mga FMAs nga nalakip niining proyekto, matud pa ni Joeren Yleaña, component head ug sakop sa National Project Management Office sa BFAR central Office.
Sa proyekto usab, nagtuo si Glen Gavas, 63 anyos nga taga Tapon Ubay, kinsa maoy presidente sa Ubay Fish Vendors Association nga maoy ngdumala sa Ubay Fish Landing nga makatabang kini sa ilang mga mangingisda ug pagnegosyo gikan niini.
Ang FishCoRe, may daku nga ikasuporta sa mga programa ni Gob Erico Aristotle Aumentado sa pagpadaghan sa mga isda aron mobarato kini ug mas dali nga mapalit sa mga Bol-anon, samtang matabangan ang mga mangingisda nga nabuhi apan naputos sa utang pamuhunan alang niini. Rahc/PIA-7Bohol)
GIDALA SA NPMO. Pinaagi sa Talakayan, gipasabut sa BFAR National Project Management Office ang FishCoRe sa mga Bol-anong stakeholders sa industriya, ug unsa ang mahimo sa proyekto alang sa kaayuhans a mga Bol-anon, atul sa FishCoRE Caravan didto sa Candabong, Anda. (Hulagway gikan sa PIA-Bohol)
BALAK
MAAGHOP ANG BALATI-AN
Sinulat ni Engr. Rogelio Podelino
Ang tawo linalsng sa GINOO
Gihuypan aron may kinabuhi ug espiritu
Gipapuyo sa Eden aron magmalipayon
Apan ang gidangatan sukwahi hino-on
Hinungdan gihinginlan ang tawo sa paraiso
Diha nagsugod ang mga suliran sa tawo
Magpatulo sa singot aron mabuhi
Antuson ang mga kasakitan sa kinabuhi
Batasan sa tawo adunay duha ka matang
Masinugtanon sa tanan bisan unsay kahimtang
Ang usa masupilon nga wala sa husto
Suliran sa katilingban kay masupakon pag-ayo
Ang tawo nga buotan gihigugma sa tanan
Gikawilihan kon magpahilayo sa katilingban
Panahon sa kalisud dangpanan sa katawhan
Sa kanunay dili motalikod sa nagkinahanglan
Tawo nga buotan may kahadlok sa GINOO
May paghigugma ug timgas nga pagtuo
Nagsubay sa matarong nga dalan
Ang NAPULO KA SUGO maoy iyang talamdan
Pagtuo sa GINOO maoy gabayan sa kinabuhi
Mas lig-on pa sa kahoy kamagong dili mabali
Dili motalikod sa iyang husto nga baroganan
Ang tawo nga MAAGHOP ANG BALATI-AN