NI:Eleazar Tutor Acampado

Ang Dakong Oportunidad sa Pagpanarbaho Isip Online Freelancer

HINAY ang tinapya sa mga balod nga mihalok sa baybayon. Ang mainit nga huyop sa hangin nanghapuhap sa mga punoan sa luni. Samtang ang kahumot sa bag-ong templa nga barakong kape nagliyo-liyo ug gisayaw-sayaw sa hangin.
Dili kini usa ka postcard sa bakasyon. Kini ang adlaw-adlaw nga reyalidad sa nagkadaghang mga Bol-anon nga nihangop sa digital nomad nga estilo sa kinabuhi, gibiyaan ang mga makaluya ug makaguol nga trabaho sa siyudad alang sa kalinaw sa isla.
Kining tanan lunlon kahayag sa adlaw ug buko juice ba?
Isip usa ka Bol-anon nga online freelancer usab, tugoti ako nga ipaambit ang mga kaayohan ug kaanindot sa pagpanarbaho dinhi sa isla sa Bohol.

MGA POSITIBO
Gawasnon nga Motrabaho Bisan Asa: Kalimti ang adlaw-adlaw nga pagbiyahe! Dili ka na mag-apas og kasakyan aron lang makasulod sa trabaho o makauli sa balay. Mahimo kang makatrabaho bisan asa basta adunay koneksiyon sa Internet  –  sa usa ka kapehan sa atubangan sa baybayon sa Panglao, sa usa ka payag sa kilid sa bukid sa Loboc, o sa bisan sa imong kaugalingong duyanan sa luyo sa inyong balay.
Ang nindot nga mga talan-awon sa Bohol mahimo na nimong opisina. Pangutan-a lang si Maria, usa ka VA kun virtual assistant gikan sa Loboc, nga kanunay nagtrabaho sa payag sa iyang pamilya nga nag-umbaw sa Loboc River, nagdumala sa social media alang sa mga negosyo sa tibuok kalibotan.
Hawid Nimo ang Imong Oras: Goodbye na sa 8-to-5 nga mga eskedyul sa pagtrabaho. Mahimo na kang momata og sayo aron masud-ong ang pagsubang sa adlaw ug maligo sa dagat sa sayong kabuntagon, mopahulay sa udto unya mosuroy sa Chocolate Hills, o motrabaho hangtod sa gabii kon moabot ang inspirasyon. Ikaw ang agalon sa imong kaugalingong oras.
Si David, usa ka web developer gikan sa Anda, nagsugod sa iyang adlaw-adlaw nga buntagong paglakaw-lakaw uban sa iyang pinanggang Golden Retriever, sa dili pa mag-coding sa mga website sa e-commerce alang sa mga kliyente sa Manila ug sa gawas sa nasod.
Dako ang Potensyal nga Kita: Kung itandi sa mga lokal nga merkado sa trabaho, ang online freelancing nagbukas sa mga pultahan sa global nga mga kliyente ug mas taas nga suholan. Kini nagtanyag sa usa ka mas maayo nga kalidad sa kinabuhi ug pinansyal nga seguridad bisan sa mga hilit nga dapit sa probinsiya. Sila si Maria ug David nakakuha na karon og komportableng kita nga nagtugot kanila sa pagsuporta sa ilang mga pamilya ug pagpamuhunan sa ilang kaugmaon.
Balanseng Trabaho ug Kinabuhi: Human sa mga gimbuhaton alang sa kliyente, mahimong modiretso na sa Alona Beach aron maglangoy-langoy samtang magpaabot sa pagsalop sa adlaw o mosuroy ug makigduyog sa magpista sa mga kalungsoran.
Ang online freelancing dako gayod og ikatabang sa mga Bol-anon, ilabina niadtong mga gradwado nga nagpangita pa gihapon og trabaho o sa mga duna nay trabaho apan nagpangita og taas-taas nga suweldo.
Kon si Maria migahin og dakong panahon sa pagtabang sa umahan sa iyang pamilya ug pag-apil sa mga kalihokan sa komunidad, si David nalingaw sa pagsuhid sa mga baybayon sa Anda ug sa pagbiyahe sa Southeast Asia.

MGA NEGATIBO:
Pag-usab-usab sa Kita: Mahimong pista ug mahimong gutom usab kanunay. Kini usa ka kamatuoran alang sa daghang mga online freelancer. Ang pagtukod sa usa ka lig-on ug permanenteng dagayday sa kita nanginahanglan og oras, paningkamot, ug makanunayon nga komunikasyon sa kliyente.
Ang Disiplina sa Kaugalingon mao ang Yawe: Walay boss, walay mga deadline (usahay). Ang paglangay-langay mahimong labing daotan nga kaaway sa usa ka online freelancer. Busa kinahanglan nga disiplinado ug kanunayng dasig sa epektibong pagdumala sa oras.
Bation nga Nag-inusara: Ang pagtrabaho nga anaa ra sa balay nahilahi kaayo kaysa naandan. Bation nimo ang pag-inusara. Busa maningkamot nga makiglambigit sa ubang mga freelancer, moapil sa online nga mga komunidad, o mangita og co-working space aron mabuntog ang kamingaw.
Kanunay Magsalig sa Internet: Samtang nag-uswag ang internet access sa Bohol, ang panagsa nga pagkapalong ug paghinay mahimong makabalda sa dagan sa trabaho. Busa ang pagbaton og backup nga mga koneksiyon mahinungdanon kaayo. Kon walay home fiber connection, anaay Pisonet ug personal hotspot sa cellphone.
Ang pag-online freelancing dinhi sa Bohol usa ka talagsaong kasinatian, usa ka kombinasyon sa pagtuman sa propesyonal nga ambisyon ug masinati ang kalinaw sa kinabuhi sa isla. Dili kini maingon nga walay mga hagit, apan ang pagbati nga gawasnon, ikaw ang magbuot sa imong oras, ug ang dakong potensiyal nga kitaon, nagahatag og magantihong paagi sa pagpanarbaho o pagnegosyo.
Ang mga istorya nila ni Maria ug David nagpamatuod nga uban sa kahanas, determinasyon, ug koneksyon sa internet, makab-ot sa mga Bol-anon ang talagsaong kalamposan samtang nagatagamtam sa katahom ug kalinaw sa ilang puloy-anan sa isla sa Bohol.
Kon ikaw Bol-anon adunay kahanas sa pagtanyag og mga serbisyo sa mga negosyante nga nagmanggad sa ilang mga produkto sa online, ayaw itugot nga mabiyaan ka sa labyog sa panahon ug limitahan ang imong kaugalingon.
Sa sunod gula, hisgotan nato kon Unsaon nga Mamahimong Malamposong Online Freelancer.
Daghan kaayong salamat sa pagbasa, Sano!

Bahin sa Tagsulat:
Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.