Kinsa Man Gyud Ang Nagsulti Sa Kamatuoran?

Ni Ronie Oyao Orillosa

Dili pa lang dugay, pipila sa atong mga kaigsoonan mipabati sa ilang kahingawa ug kalibog sa mga panghitabo sa lalawigan labi na gyud sa mga dagkong proyekto sa pangagamhanan. 

Ang atong gobiyerno moingon nga ang ilang gisulti mao ang kamatuoran; apan ang laing panig usab ang padayon nga nag-patigbabaw sa ilang mga argumento nga lahi sa gipresentar sa pikas nga grupo.

Makapangutana kita: Kinsa man gyud ang nagsulti sa Kamatuoran?

Adunay panultihon nga naga-ingon nga naghambin ug tulo (3) ka panig ang isyu sa kamatuoran; ug kini mao ang imong panig, ang akong panig, ug ang tinood nga panig sa kamatuoran. 

Ako nagatoo nga bisan asa ka nga panig nahisakop, imo gyud nga sigurohon ang pagpagawas sa kamatooran aron kini maoy mahimong basihan sa direksyon sa atong mga kalihukan labi na gyud sa atong pangagamhanan. 

Nasayod kita nga ang kaatbang sa kamatuoran mao ang BAKAK. Mao kini ang hinungdan na kon ang usa ka opisyal sa publiko mopahayag sa kaatbang sa kamatuoran, siya ato ng pagatawagon ug bakakon.

Ang pangutana karon: Aduna bay mga opisyales sa pangagamhan nga mga bakakon kay wala sila magsulti sa kamatuoran? Ang mga panghitabo sa imbestigasyon sa Congreso maoy makatubag sa maong pangutana nga susama tingali sa tubag nga anaa sa imong hunahuna ug sa akong hunahuna.

Kun aduna may bakakon sa atong pangagamhanan, daghan ba kini sila o maihap lang ba sa tudlo?. Apan ang kadako o kagamay sa mga bakakon sa pangagamhan dili mao ang isyu. Ang tinood nga isyu mao: KINAHANGLAN PAPASON SA ILANG POSISYON ANG NAGLINGKOD NGA MGA BAKAKON SA GOBYERNO.  

Kining bakakon sa gobyerno susama sa mga hugaw nga langaw nga maoy makamantsa sa kalimpyo sa komunidad. 

Sila ang dili maayo nga mga ehemplo sa atong henerasyon karon, ug sa umaabot pa nga henerasyon sa atong nasud nga Pilipinhon. 

Sila ang hulga sa seguridad sa atong katilingban nga maoy maka-wagtang sa dugokan sa pagkamatinud-anon ug pagkamaunongon sa Gobyerno. 

Diha sa ilang pagpamakak molambo ang korapsyon, kahiwi-an ug kalaksot sa atong katilingban.

Busa, kinahanglan gayud nga maghugop kita uban sa atong hinugpong nga mga paningkamot alang sa hingpit nga pagwagtang niining mga bakakon sa gobyerno aron kita magpadayon sa pagpuyo sa kadagaya sa kalinaw, seguridad, panaghiusa, kalipay, ug kauswagan.


Kay sumala pa sa sanglitanan “Ang maayong binuhatan, dili gyud magbunga ug dautan.”

(Bahin sa Magsusulat: Si Ronie Orillosa mao ang Co-Founder sa Youth Lead Philippines, Inc. diin siya aktibo nga sakop hangtud karong panahona. Director for Membership usab siya sa Rotary Club Downtown San Juan, Metro Manila. Napili siyang Barangay SK Kagawad kanhi sa Dao, Dakbayan sa Tagbilaran ug siya ang Presidente sa Pangagamhanan sa mga Tinun-an sa PMI Colleges, Bohol sa tuig 2012-2013. Presidente usab siya sa Bohol Alliance of Student Councils sa susamang tuig.)