Bohol Power: Jingle Contest
Sinulat ni Sheryl B. Paga
Ang buhatan sa Bohol Light Company, Inc. ubos sa bag-o nga pagdumala sa Primelectric Holdings Inc. buot magadasig sa tanang mga Bol-anon sa pagsalmot sa Jingle Kompetisyon ug pagsumite sa mga entries hangtud sa Disyembre 13, 2024.
Kini nga kompetisyon nagtumong sa pagpadayag sa kaimportante sa Bohol Power pinaagi sa usa ka madanihon ug halandumon nga jingle nga nagpasiugda sa dakong pasalig sa kompanya, paghatag og kasaligan, episyente, ug malungtarong panuga sa mga Boholano. Gidasig ang mga partisipante sa pagpadayag sa ilang pagkamamugnaon ug nagpakita ug paghigugma alang sa probinsiya pinaagi sa usa jingle nga makapadasig kanatong tanan.
Kinahanglan usab nga kini nahasubay sa Mission ug Vision aron Bohol Power aron mas atong mabati ang kahulugan niini diha sa atong tagsa-tagsa ka mga dughan.
Mao kini ang musunod nga mga contest mechanics ug krayterya:
1. Abli sa tanang indibidwal ug grupo nga nagpuyo sa Bohol. Mahimong mosumite isip solo, duo, o grupo.
2. Ang mga entry kinahanglan nga anaa sa duha (2) ngadto sa tulo (3) ka minuto ang gitas-on, nga adunay usa ka chorus nga dili mulapas sa usa (1) ka minuto.
Isumiter ang mga entries pinaagi sa customercare@boholpower.ph sa dili pa ang Disyembre 13, 2024. Ang mga ulahi nga entries dili madawat.
3. Ang jingle kinahanglang maglangkob sa usa ka madasigon ug malipayong tono aron ipakita ang positibong epekto sa Bohol Power.
Ang mga liriko kinahanglang maglakip sa ngalan nga “Bohol Power” ug daling mahinumdoman, nga adunay madanihong melodiya nga makadasig sa mga tigpaminaw.
4. Kinahanglan ang orihinal nga trabaho. Ang bisan unsang porma sa plagiarism moresulta sa diskwalipikasyon.
Kung kita nakasumite, ang mga partisipante nagkauyon nga ang Bohol Power adunay katungod sa paggamit sa jingle alang sa mga katuyoan sa promosyon.
5. Judging and Announcement of Winners:
Ang mga entries pagahukman base sa criteria nga gilista sa ubos.
Ang mga mananaog ipahibalo sa opisyal nga Bohol Power social media platforms.
- Judging Criteria
- Musicality and Melody (30%)
- Creativity and Originality (25%)
- Message and Relevance (25%)
- Cebuano Language and Ease of Recall (20%)
- Prize
- First Prize: PHP 15,000 and feature on official Bohol Power platforms.
Alang sa dugang impormasyon, palihog ug tawag lamang niining mga numero: (038) 412-3503, 501-7762 local 200 or 202, 0931-852-4310 or 0963794440.
Pahinumdum sa mga konsumidor sa BWUI nga disconnected ang accounts
Sinulat ni Victor L. Tambis
Makita sa hulagway ang mga water meter sa konsumidor nga anaa sa stub-out
Agi ug paghatag ug katin-awan aron malikayan ang wala damha nga balayronon sa usa ka konsumidor nga naputlan sa iyang water connection, giawhag kini sa pagsusi pinaagi sa pagbisita sa opisina o pagtawag sa BWUI hotline kon wala na ba kini’y balayronon or unpaid bills sa maong account ilabi na kon dili kini dayon magpa reconnect.
Segun sa polisiya sa maong opisina, kon ang usa ka konsumidor maputlan sa iyang water connection tungod kay kini wala makabayad sigun sa gilatid nga tukmang panahon o sa lain nga mga hinungdan, kinahanglan nga mabayaran niini ang nagpabilin nga kantidad o amount due aron dili na mopatong ang matagbulan nga surcharge kon kini iya nang ipa reconnect. Sulod sa tulo, diin aduna kini’y konsiderasyon, ngadto sa unom ka bulan lamang ang reconnection human kini maputli, apan kon himoon ang pagpareconnect lapas sa maong panahon, isipon na kini nga new application for connection diin kinahanglan gihapon nga mabayaran ang maong wala mabayri nga kantidad lakip ang surcharge una ma connect ang maong new water application. Susamang paagi bisan kon ang maong konsumidor mo apply ug bag-o nga water connection sa lain nga building o panimalay.
Segun sa records sa opisina sa BWUI, adunay mga hitabo diin dako ang mabayaran sa usa ka konsumidor nga mo apply ug new connection tungod kay aduna siyay account nga naputlan sa lain nga building nga wala ma settle ang balayronon niini. Magkadugay ang maong unsettled amount magkadako kini.
Tungod niini ug aron malikayan ang madugang nga balayronon, giawhag ang mga konsumidor nga nakasinati sa samang hitabo sa pagsiguro nga wala na’y nagpabilin nga balayronon human maputli ug ilabi na usab kon makahukom kini nga dili una magpareconnect.
Abokasiyang “Be RICEponsible,” pagpraktis sa “ABKD”
sa konsumo sa bugas gipalanog sa DA-7 sa Bohol IOs
Sinulat ni Elvira Bongosia
Gipalanog sa Department of Agriculture-Central Visayas (DA7) ang ilang abokasiyang “Be RICEponsible” ug pagpraktis sa “ABKD” sa konsumo sa bugas ngadto sa mga miyembro sa Association of United Development Information Officers in Bohol (AUDIO-Bohol) niadtong Nobyembre 15.
Ang DA-7 maoy ni-host sa Nobyembre 15 nga general assembly sa AUDIO-Bohol isip parte sa kasaulogan sa National Rice Awareness Month (NRAM).
Si DA-7 information officer Cheryl Dela Victoria mipaambit nga matag Nobyembre gideklarar isip NRAM nga bulan, subay sa Presidential Proclamation No. 524, nga gilagdaan niadtong 2004, karon sa ika-20 nga tuig sa deklarasyon.
Dugang pa niini nga ang selebrasyon usa ka oportunidad alang sa komunidad nga maghiusa, magkat-on, ug magpasalamat sa kamahinungdanon sa bugas sa atong kultura, nutrisyon, ug pagkab-ot sa seguridad sa pagkaon. Ang unom ka tuig nga tema nga “Be RICEponsible,” usa ka panawagan alang sa pagkab-ot sa sufficiency sa pagkaon sa matag Pilipino sa ilang kaugalingong paagi.
Gi-awhag ni Dela Victoria ang mga information officers sa kalungsoran ug national government agencies nga mamahimong “Be RICEponsible” aron makab-ot ang maayong panglawas, suportahan ang mga mag-uuma, ug tabangan ang atong nasud pinaagi sa ‘ABKD’: (A)dlay, mais, etc. ay ihalo sa kanin; (B)rown rice ay kainin; (K)anin ay ayaw sayangin; ug (D)apat bigas ng Pilipinas ang Bilhin.
Iyang gipahimuslan ang kahigayonan, nga isip mga IOs ug isip communication arm sa ilang tagsa-tagsa ka LGU ug opisina, sila motabang sa pagpakaylap sa “Be RicePonsible” nga mga mensahe ug mahimong rice goodness’ bearers ug food guardians, sugod sa ilang kaugalingong pamilya, opisina, mga paryente ug higala.
Kalabot niini, gihangyo usab ni Dela Victoria ang AUDIO IOs nga ipakaylap ang “Half cup, full heart” rice social media challenge sa departamento aron madasig ang mas daghang tawo nga mukonsumo lamang sa saktong pagsilbi sa bugas ug malikayan ang pag-usik sa bugas.
Samtang si Maidah Virtudazo, usa ka nutritionist-dietician sa National Nutrition Council (NNC) mipaambit sa hilisgotan nga “Rice and Your Health,” nga nagkutlo sa nutritional contents niini ug ang mga benepisyo sa usa ka dili pulido ug maayo nga gipasinaw nga bugas, hinungdan sa pagkaon labaw pa sa unsay gikinahanglan sa lawas, ug ang girekomendar nga daily menu base sa pinggang pinoy.
Ang AUDIO-Bohol, usa ka asosasyon sa mga information officers (IOs) o gitudlo nga IOs sa mga lungsod ug syudad, ingon man mga ahensya sa nasudnong gobyerno, uban sa Philippine Information Agency (PIA) isip secretariat ug lead agency.
Be RICEponsible! Isip parte sa NRAM, gi-awhag ni DA-7 information officer Cheryl Dela Victoria ang mga information officers isip communication arm sa ilang tagsa-tagsa ka LGU ug opisina, sa pagtabang sa pagpakaylap sa “Be RICEponsible” nga mga mensahe ug mahimong rice goodness’ bearers ug food guardians, sugod sa ilang kaugalingong pamilya, opisina, mga paryente ug higala atol sa general assembly sa grupo niadtong Nob. 15 sa Reyna’s and The Haven and Gardens sa syudad sa Tagbilaran. (Hulagway gikan sa PIA7-Bohol)
Serbisyong medikal ug uban pa, gidala sa gobyerno
ngadto sa Eskaya IP sa Canta-ub, Sierra Bullones
Sinulat ni Elvira Bongosia
Gilusad sa Philippine Information Agency (PIA) sa Bohol ang ilang pinakabag-o nga grassroots communication program nga gitawag ug “Barangayan sa Bagong Pilipinas” niadtong Nobyembre 19, sa Barangay Canta-ub, lungsod sa Sierra Bullones.
Kini nga kalihokan nagtumong sa paghatod sa tukma, may kalabutan, ug tukma sa panahon nga impormasyon sa mga programa ug mga lakang sa gobyerno ngadto sa barangay aron matubag ang usa ka isyu sa ilang komunidad.
Sa pakigtambayayong sa National Commission on Indigenous Peoples (NCIP), Philippine Health Insurance Corporation (PHIC), Association of United Development Information Officers (AUDIO) sa Bohol, ug sa Provincial Government sa Bohol, ang maong Barangayan nagdala sa “Barangay Service Caravan ug PhilHealth Konsulta” alang sa komunidad sa IP sa maong barangay ug kasikbit nga mga lugar.
Dinha usab ang mga representante sa Department of Social Welfare and Development (DSWD) ug Department of Environment and Natural Resources (DENR) aron sa pagtubag sa mga isyu nga gipadangat sa IP community.
Ang mga IP nakapahimos sa medikal nga konsultasyon ug uban pang frontline nga serbisyo sa gobyerno, nga halos dili nila makuha, tungod sa ilang pagkalayo sa labing duol nga pasilidad sa serbisyo.
Gawas niini, nakadawat usab sila ug mga libreng tambal ug mga vitamins.
Samtang ang mga ahensya sa gobyerno nagpahigayon sa ilang mga serbisyong medikal, usa ka parallel Barangayan Activity Public Fora ang gipahigayon diin ang Eskaya Tribal Council nakig-interact sa mga ahensya sa gobyerno sa ilang mga isyu, ilabi na sa update sa ilang ancestral domain claims ug uban pang issue.
Si Canta-ub Barangay Captain Conchita Sajol nagpasalamat sa mga ahensya sa gobyerno nga nalambigit sa Barangayan sa pagpili sa ilang barangay tungod kay daghan kanila ang nakapahimos sa medical consultations, nakadawat ug mga tambal ug naka-avail sa uban pang frontline nga serbisyo sa gobyerno.
Kinatibuk-ang 240 ka mga indibidwal ang nakapahimos sa serbisyong medikal sa maong Barangayan.
Samtang ang mga ahensya sa gobyerno nagpahigayon sa ilang mga serbisyong medical atol sa “Barangay Service Caravan ug PhilHealth Konsulta” sa Barangay Canta-ub, lungsod sa Sierra Bullones niadtong Nob. 19, usa usab ka parallel Barangayan Activity Public Fora ang gipahigayon diin ang Eskaya Tribal Council nakig-interact sa mga ahensya sa gobyerno sa ilang mga isyu, ilabi na sa update sa ilang ancestral domain claims ug uban pang issue. (Hulagway gikan sa PIA7-Bohol)
Mga estudyante sa isla sa Cabul-an, gibisita sa NRAM team; Mga pakete sa bugas gipangapud-apod
Sinulat ni Elvira Bongosia
Gibisita sa Bohol National Rice Awareness Month (NRAM) team ang Cabul-an Elementary School sa Barangay Cabul-an, lungsod sa Buenavista niadtong Nobyembre 14, 2024, isip lugar alang sa NRAM briefing ug outreach.
Ang team, gilangkuban sa Department of Agriculture-Central Visayas (DA7), DA-Agricultural Training Institute-7 (DA-ATI7), DA-National Food Authority (DA-NFA7) ug sa Provincial Government of Bohol (PGBh) pinaagi sa Office of the Provincial Agriculture (OPA) ug ang Office of the Provincial Social Welfare and Development (OPSWD), Department of Education ug ang Local Government Unit (LGU) sa Buenavista.
Si Buenavista Mayor, Atty. Dave Duallo, nagpasalamat sa grupo sa pagpili sa iyang lungsod, diin ang Barangay Cabul-an, usa ka isla nga barangay maoy napili nga lugar.
Matud ni Duallo nga ang Buenavista bug-os nga nagsuporta sa mga programa ug proyekto sa DA, diin ang NRAM alang sa bugas hinungdanon kaayo, nga mao ang panguna nga pagkaon.
Gipaambit sa mayor nga ang matag lugas sa bugas importante kaayo ug dako ug bili, nga dako ang atong pagsalig niini nga palaliton, isip mga rice eaters.
Si School District Supervisor, Dr. Ma. Pamela Cenita, nidasig sa mga tinun-an ingon man sa mga magtutudlo sa pag-apply ug pagsundog sa ilang nakat-onan sa rice briefing.
Matud niini nga sa ilang pagtudlo, wala gyud nila gihatagan ug importansya, ni gilakip sa ilang pagtudlo ang importansya sa bugas sa husto ug saktong konsumo sa pagkaon.
Gihagit niya ang ilang mga magtutudlo sa pagsiguro nga ang bawon sa mga estudyante hingpit nga mahurot.
Si Agricultural Program Coordinating Officer sa Bohol (APCO-Bohol) Roman Dabalos sa DA7 nisubli nga dili mag usik-usik sa bugas ug ubang pagkaon.
Sa briefing, gipasiugda ang ABKD, nga adunay interactive nga diskusyon ug partisipasyon sa mga estudyante nga moapil.
Gi-recite usab sa tanan ang rice pledge nga gipangunahan sa grade 6 learner.
Ang ubang mga aktibidad nga gipahigayon mao ang rice trivia challenge ug on-the spot drawing contest.
Gitapos ang tibuok adlaw nga kalihokan sa pag-apod-apod sa 580 kilos nga bugas, nga giputos sa tag 1 ka kilo sa matag estudyante.
Nakadawat ug tag 1 kilo nga bugas ang mga tinun-an sa Cabul-an Elementary School sa Barangay Cabul-an, lungsod sa Buenavista niadtong Nobyembre 14, 2024, diin gipahigayon ang National Rice Awareness Month briefing ug outreach sa DA7. (Hulagway gikan sa DA7)
Aplikasyon alang sa gun ban exemption nagsugod na
Sinulat ni Elvira Bongosia
Kadtong nagtinguha nga mo-aplay alang sa exemption sa poll gun ban gipahinumdoman nga kumpletohon ang ilang mga kinahanglanon sa dili pa isumite ang ilang aplikasyon sa Commission on Elections (Comelec).
Si Comelec Chairman George Garcia sa usa ka pahayag nipasalig sa mga aplikante nga makuha nila ang exemption sulod lang sa usa ka semana, kon ilang isumiter ang kompletong rekisitos.
Matud pa niini nga sa pipila ka mga kaso, ang pag-apruba sa aplikasyon alang sa exemption nalangan tungod kay ang mga dokumento dili kompleto.
Nagsugod adlaw’ng Lunes, Nobyembre 18, ang aplikasyon alang sa gun ban exemption.
Giingong kadtong mo-apply ug exemption mahimo usab nga mogamit sa online payment system.
Sugod sa Enero 12, 2025, ipatuman sa Comelec ang gun ban kalabot sa midterm elections sa Mayo.
Kasamtangang gipahigayon usab sa Comelec ang unang convention alang sa mga election officers, provincial election supervisors ug regional election directors.
Ang kombensiyon nagtumong sa pagtudlo sa mga opisyal sa botohan sa paggamit sa bag-ong automated counting machines ug uban pang butang mahitungod sa automated election.
Gamit, kamahinungdanon sa kawayan, gituki sa Kapihan
Sinulat ni Rey Anthony Chiu
Gikan sa kasagarang tinuohan nga poor man’s timber, ang botong, kawayan o lunas, mao na karon usa sa mga gipili nga materyal sa konstraksyon, dili lamang para sa damba, apan bisan sa finishing sa construction.
Kini maoy gipadayan ni Architect Erven Digal, kang kinsa nga konstraksyon nga ginama sa kawayan didto sa isla sa Pamilacan, nakadaug sa usa ka pasidungog alang sa Pamilacan Folk Village.
Ang Pamilacan Folk Village maoy Silver winner sa International Architecture and Design Awards 2023 alang sa kategorya nga Restaurants Bars Architecture Built / Professional Category.
Ang konstraksyon nga migamit sa botong ug kawayan, giabut man galling ug kakuwang sa supply sa materyales, hinungdan nga ming-abut na ang kontraktor ug pamalit ug botong ug kawayan sa Mindanao.
Kini nagpakita lamang kon unsa ka kuwang ang supply sa kawayan sa Bohol, sagbat ni Adelo Caberte, presidente sa Amazing Bohol Bamboo Association (ABBA), kinsa maoy guests sa Kapihans a PIA nga nagpasaysay sa maayong kaugmaon kon mosagop ang mga Bol-anon sa pagpananum ug kawayan o botong.
Matud pa ni Archt Digal, kinsa sakop usab sa ABBA, ang kalig-on sa kawayan ug botong gikabaniog na sa mga arkitekto ug engineers, kinsa wala kayo magdahum nga ang pobreng kahoy, mamahimo diay nga usa sa mga labing pangitaon nga supply sa construction.
Ang fiber nga anaa sa kawayan o botong, maoy kina-ingnan nga dili kini dali nga mabali, kay mobawog lamang kini, dili sama sa kahoy nga inig ka tinggo, hagsak na dayon, maoy hinungdan nga kasaligan kini sa damba.
Apan karon, sa daghan nga matang sa kawayan ug botong, may natanum na dinhi nga giant bamboo, o kadtong kawayan nga ang kinatibuk-an nga diametro, moabut na ug 8 pulgadas.
Ang kawayan usab karon maoy gipadaghan tungod sa naglobo nga panginahanglan sa engineered bamboo, diin ang lipak nga botong o kawayan, pit-on aron mamahimong usa sa mga labing lig-on nga table para sa konstraksyon, saysay ni Archt Digal.
Sayun rang itanum, ug segun sa kadak-on nga buot maangkon, kon magkaguwang na ang kawayan, human sa tulo ngadto sa lima ka tuig, maayo na kini nga gamiton, matud ni Caberte.
Matud ni Caberte, sa dugay nga panahon, nakalimtan sa mga Bol-anon ang kawayan ug botong nga maayo kayo alang sa konstraksyon, ug labaw sa tanan, maayo sa kalikopan.
Ang botong may taas pa nga kapasidad nga mohigop sa carbon nga gipagawas sa tawo ug sa pagkadugta sa mga butang sa kalibutan, ug ang kinaiya sa botong nga mobugkos sa yuta aron dili kini makankan ug modahile, dili na malalis.
Daghan usab ang moangay mokaon sa ubod sa kawayan, samtang ang iyang mga hingkod nga buko, mao nay gipanghimo nga mga baso, ug sudlanan nga pabor sa kalikopan.
Sa kamaayo sa kaugmaon nga ikatanyag sa kawayan o botong, nahunahunaan nga maghugpong ang mga nagtanum, mamalitay, tigpangpanday, tigpag-amakan, tighimo ug basket ug nigo, tighimo ug gamit sa balay ug mga panday, apil na ang mga nanamum aron mopasanay, ug nananum alang sa pag-adorno sa nataran, aron hiusahon ang us aka hiniusang mapa sa industriya sa botong ug kawayan sa Bohol, pasabut ni Caberte.
Gilauman usab sa ABBA nga pinaagi sa paghiusa sa mga naglihok sa industriya, makatabang ang mga sakop sa usag usa sa pagpaugmad sa industriya ug pagpahiuli sa mga lugar sa Bohol nga wala nay gipangtanum.
BAR NGA KAWAYAN. Sa kadaghan sa kawayan nga gikinahanglan alang niining kamalig didto sa Pamilacan, miabut ang kontraktor ug pamalit sa mga materyales sa Mindanao, butang nga sayon ra unta nga ika supplysa mga taga Bohol, apan walay makontak nga makadeliver sa dinaghan, matud ni Archt Erven Digal. (Hulagway gikan PIA-Bohol)
KAUGMAON SA KAWAYAN. Kon ang botong ug kawayan, sakto lang ang edad sa pagputol, menos ang posibilidad niini sa bokbok, ug makatabang kini nga bansay sa pagpasanay pa sa kawayan nga dili na mapuo pa, pasabut ni Adelo Caberte (tunga) samtang may dugang pang pamaagi si Archt Erven Digal, sa pagtambal sa botong aron dili bokbokon. (Hulagway gikan sa PIA-Bohol)
Labing unang solar power plant sa Bohol gi-inagurahan
Sinulat ni Elvira Bongosia
Human sa duha ka tuig, ang Dagohoy Solar Power Plant Project sa PetroGreen Energy Corp (PGEC) gi-inagurahan niadtong Nobyembre 21, nga gikonsiderar nga mao ang labing una ug pinakadako nga single-site solar facility sa probinsiya.
Nahimutang sa 22 ka ektarya sa Barangay San Vicente ug Sta. Cruz sa lungsod sa Dagohoy, aduna kini 1,270 ka solar tables nga gilangkoban sa 40,628 ka units sa Trina Solar-brand panels nga nagprodyus og 41,000 MWh nga kuryente matag tuig, pagsiguro nga makuha ang kahayag sa adlaw sa duha ka kilid sa panel aron mapadako ang abot niini.
Ang planta mopaandar sa mga 15,000 ka balay ug wagtangon ang kapin sa 2.3mn t/y sa carbon emissions.
Ang switch-on ceremony gitambongan nila Gov. Erico Aristotle Aumentado, Second District Rep. Maria Vanessa Aumentado, Bise presidente ug chief operating officer sa PGEC nga si Francisco Delfin Jr., Dagohoy Mayor Hermie Relampagos, Department of Energy (DOE) Usec. Rowena Cristina Guevara, mga opisyal sa Taisei Construction Company, National Grid Corporation of the Philippines (NGCP), mga municipal ug lokal nga opisyal.
Sa iyang mensahe, gidayeg ni Guevara ang proyekto, nga nag-ingon nga ang PetroGreen usa ka aktibo nga kontribyutor sa katumanan sa mga target sa pagbag-o sa enerhiya sa nasud.
Matud pani Guevara nga gitarget sa DOE ang 35 porsyento nga renewable energy ang generation mix sa 2030 ug 50 porsyento sa 2040, usa ka kritikal nga lakang alang sa Pilipinas aron matubag ang mga panginahanglanon sa enerhiya apan ibutang usab ang nasud isip aktibong partisipante sa aksyon sa klima sa kalibutan.
Samtang matud pa ni Gob. Aumentado nga aron mapalambo ang pagtubo ug madani ang mga mamuhonan, gikinahanglan sa Bohol ang kasaligan ug eco-friendly nga tinubdan sa kuryente.
Sa iyang bahin, si Rep. Aumentado mipadagay sa iyang hingpit nga pasalig sa pagsuporta sa mga proyekto sa renewable energy.
Sa pagkakaron, nagkuha sa probinsya ang tinubdan sa kuryente sa probinsya sa Leyte.
Isip destinasyon sa mga turista, ang Bohol aduna nay kapasidad nga 47 porsyento o 28 MW sa peak demand.
Gilauman nga motaas kini sa kinatibuk-an nga 113 MW sa 2043.
Sa usa ka hinungdanon nga milestone padulong sa malungtarong enerhiya sa lalawigan sa Bohol, ang Dagohoy Green Energy Corporation (DGEC), uban sa DOE ug local government leaders sa Bohol, mi-switch-on sa 27MWp Dagohoy Solar Power Project (DSPP) nga nahimutang sa Brgy. San Vicente ug Sta. Cruz, lungsod sa Dagohoy niadtong Nobyembre 21, 2024. (Hulagway gikan sa PIA-Bohol)
BALAK
NGANO NGA ULIPON ANG TAWO SA SALA
Sinulat ni Engr. Rogelio Podelino
Kinabuhi sa tawo puno sa mga tanghaga
Dali siya makabeg pagbuhat ug sala
Mas bug-at ang hunghong sa demonyo
Kay sa kabeg sa anghel sa GINO-O
Kadaghanan haguka ug baroganan ang tawo
Dili nimo matugkad kon ngano?
Dali makabeg pagbuhat ug dautan
Kay sa magsubay sa matarong nga dalan
Ang hinungdan gusto makakumkum ug salapi
Sa labing sayon ug dali bisan kon hiwi
Mga lalaki mosulod negosyo sa droga
Kay dali kaayo ang tubo sa kwarta
Mga babaye itanyag ang ilang lawas
Madali makasalapi pinaagui sa pakighilawas
Ang uban’g babaye maala-an nga edukako
Diay mga babaye’ng tawagon lang sa telepono
Kay ang pagpangita ug salapi sa minaayo
Magpatulo ka sa imong singot gamay ra kaayo
Lapoy kaayo ang kalawasan human sa trabaho
Pagdapat sa likod makatulog dayon ug sayo
Ambot ngano tawo mahilig maglunang sa sala
Wala nila palandongi ang ilang ugma
Tungod sa kawad-on magmarka ug bahala na
Dili hunahuna-on ang dangatan unya nila
Balaod ba sa kinaiyahan ang tawo mahuyang?
Dali ra kaayo ang tawo matikwang
Dyotay ra ang mga tawo nga nagbinu-otan
Kay dalan sa matarong malisud agui-an
Ang labing maayo nga buhaton
Mangaliya kanunay sa GINO-O ipadayon
Magmatngon nga dili ka mahidagma
DIOS KO “NGANO NGA ULIPON ANG TAWO SA SALA?”