NI:RONIE ORILLOSA
Social Media: kaayohan o kadautan?
Subo palandungon nga ang Social Media, isip usa ka taytayan sa kasayuran ug impormasyon, nahimong biktima sa pang-abuso sa mga walay prinsipyo nga gustong magpakaylap ug bakak ngadto sa katawhan pinaagi sa gitawag ug peke nga balita (fake news).
Kini nga pang-abuso nahimong usa ka kontemporaryong hampak sa katilingban nga padayong nakaigo sa mga tawo gikan sa tanang kahimtang sa kinabuhi – ma kabus ka man o adunahan, bata o tigulang.
Akong ipahungaw kining akong sentimyento inubanan sa akong posisyon ug baruganan kabahin sa peke nga balita.
Alang kanako, kining mga peke nga balita sa Social Media, mikaylap na ug naka-apekto na sa katilingbanong panghuna-huna, opinyon ug desisyon sa atong katawhan kabahin sa daghang mga aspeto sa atong kinabuhi lakip na ang politika ug pagdumala sa renda sa pangagamhanan.
Ang pagbaha sa peke nga balita sa Social Media miabot na ug makapa-alarma nga yugto sa kinabuhi sa banay, lalawigan, ug nasud nga Pilipinhon.
Adunay mga tawo nga naningkamot sa pagtuis sa kamatuoran aron lang mahatagan ug katagbawan ang ilang kagutom sa kahakog ug kagutom sa gahom.
Kining mga tawhana gustong mupahaum sa ilang peke nga balita sa kun unsay ilang gustong makuha alang lang gyud sa ilang kaugalingon.
Aduna bay solusyon ang pagkuyanap sa bakak nga balita sa Social Media? Sa pagka karon, anaa kita sa yugto sa komunidad diin halos lisud na gyud ang pagsumpo sa bakak nga impormasyon nga usahay ang bugtong butang na lang nga atong mahimo karon mao ang pagpalayo sa plataporma nga magladlad kanato niining mga hulga batok sa kamatuoran sa atong katilingban.
Apan dili kita magpakawala sa paglaum. Angay gayud kita nga magmabinantayon. Atong dasunan ang mga pamantalaan ug estasyonan sa radyo nga nangilabot batok sa mga tigsabwag ug bakak nga balita.
Atong panalipdan ang interes sa tinood nga media nga magpagawas sa kamatuoran sa hiwi nga binuhatan sa mga opisyales sa atong pangagamhanan.
Dili kita mahadlok sa pagpakigbisog batok sa bakak nga kasayuran pinaagi sa pagpanalipod sa tinood nga pamantalaan nga maoy institusyon nga nagpabilin nga nagbarog alang sa makiangayon ug makatarunganon nga manlalaban sa atong baruganan.
Ubani ako sa pagpadayag sa akong opinyon sa mga mahinungdanong isyu sa katilingban. Mutabang kita sa pagsumpo sa bentaha sa social media nga nag-abuso ug giabusohan.
Kay sumala pa sa sanglitanan “Ang maayong binuhatan, dili gyud magbunga ug dautan.”
(Bahin sa Magsusulat: Si Ronie Orillosa mao ang Co-Founder sa Youth Lead Philippines, Inc. diin siya aktibo nga sakop hangtud karong panahona. Director for Membership usab siya sa Rotary Club Downtown San Juan, Metro Manila. Napili siyang Barangay SK Kagawad kanhi sa Dao, Dakbayan sa Tagbilaran ug siya ang Presidente sa Pangagamhanan sa mga Tinun-an sa PMI Colleges, Bohol sa tuig 2012-2013. Presidente usab siya sa Bohol Alliance of Student Councils sa susamang tuig.)