Ang Pagpangayam og Kliyente Alang sa Imong Online Freelancing Business
Ni ELEAZAR TUTOR ACAMPADO
USA ka lapad ug ihalas nga lasang ang internet, apan puno kini sa oportunidad alang sa mga online freelancer.
Sama sa bisan unsang kalasangan, mahimong hadlok ang pagnabigar, ilabina kon nangita ka sa mga idlas nga binuhat: ang ideyal nga kliyente.
Apan ayaw kahadlok. Makasugakod ra ka sa imong pagpangayam ug mahimong makakaplag og bulawan.
Ania ang mga dapit diin mahimo nimong makit-an ang labing maayo nga kliyente alang sa imong online freelancing business.
1. Freelancing Platforms
Mahimo nimong makaplagan ang ideyal nimong kliyente sa mga freelancing platform sama sa Upwork, Fiverr, OnlineJobsPH, Freelancer ug uban pa, diin ang mga kliyente nagpundok aron mangita og mga talentado nga freelancer. Kini nga mga plataporma nagtanyag og hinan-ay nga estruktura diin mahimo nimong pangitaon ang nangita og freelancer sa haom nga serbisyo nga imong gitanyag, mahimo nimong mapili kinsa ang gusto nimong kliyente ug adunay proteksiyon sa bayad sa imong kahago.
Niadtong 2013 sa nagsugod pa ko sa ahong online freelancing, nakakuha ko og kliyente sa Upwork isip content marketer. Unya $2.2 ang bayad kada oras sa 40 ka oras matag semana. Gamay ra tuod ang suholan apan mao kadtoy sinugdanan sa usa ka malamboon nga online freelancing career.
2. Social Media
Ang LinkedIn, Twitter, Facebook, ug bisan ang Instagram mahimong tabunok nga dapit sa pagpangayam alang sa mga kliyente. I-optimize lang ang imong mga profile, ipaambit ang imong kahanas, makiglambigit sa mga diskusyon nga aduna kay kasayoran ug kahanas, ug pagkonektar sa mga potensyal nga kliyente sa imong target nga negosyo.
3. Ang Imong Network
Ayaw ibaliwa ang gahom sa kasamtangang mga kaila o network. Tabangi ang mga higala, pamilya, kanhing mga kauban, ug bisan ang imong lokal nga komunidad. Dili lang nimo mahibaw-an duna diay nanginahanglan sa imong mga serbisyo o nakaila sa usa nga nanginahanglan.
4. Content Marketing
Ang paggama og bililhong mga unod nga ibutang sa blog, artikulo, bidyo o mga post sa social media, makahatag og kahigayonan nga madani ang mga potensyal nga kliyente. Kini naghatag usab kanimo og kahigayonan nga mahimong eksperto sa hunahuna sa mga kliyente nga nangita sa imong serbisyo.
5. Cold Pitching
Ayaw kahadlok nga direktang mokontak sa mga potensyal nga mga kliyente pinaagi sa email o LinkedIn. Panukiduki kon unsa ang ilang mga panginahanglan, ipahiangay ang imong tono, ug ipakita kon unsaon nga sila makabenepisyo sa imong kahanas.
6. Mga Komunidad sa Gi-target nga Negosyo
Suhira ang online nga mga komunidad, forum, ug grupo nga may kalabotan sa imong gi-target nga negosyo. Usa kini ka dakong minahan sa bulawan alang sa pagpangita sa mga kliyente nga espesipikong nangita sa imong kahanas.
Ang pagpangita sa mga kliyente usa ka nagpadayon nga proseso. Apan sa usa ka estratehikong pamaagi ug inanay nga pagpadayon, mahimo nimong manabigar ang kalasagan sa kalibotang digital diin imong matukod ang usa ka mauswagon ug malamposong online freelancing business.
Hinumdomi lang, nga ang yawe mao ang pagka-aktibo, magtukod og mga relasyon ngadto sa mga kliyente, ug ipakita ang imong dakong bili sa kalamposan sa ilang negosyo.
Malipayong pagpangita sa una nimong kliyente, Sano!
Bahin sa Tagsulat:
Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.