Ni Eleazar Tutor Acampado
Ang Dakong Hinabang sa Pagpatambal ug Pagpaospital sa mga Kabos
SA pagsaka sa bili sa mga tambal ug sa pagpaospital, kalbaryo alang sa mga kabos ang maospital gumikan sa sakit, nadisgrasya o nabiktima sa kalamidad. Maglatagaw ang hunahuna asa manawdaw og ikapalit og tambal sa mga giresita sa doktor alang sa hinanaling kaayohan sa pasyente. Ug kon maayo na ang pasyente, bukid na usab hunahunaon asa manguykoy og ikabayad sa ospital.
Alang sa mga yanong sakit, mahimong dili na makabayad kon dunay PhilHealth ang pasyente o ang tagtungod kinsa nagdepende ang pasyente. Apan unsaon kon grabe ang sakit ug kadaot nga naangkon sa pasyente ug nagkinahanglan og daghang tambal ug hataas nga panahon sa pagpaospital?
Aron dunay ikapuno sa panginahanglan, daghan ang moduol sa mga kaila nga arang-arangan o sa mga politiko nga nailhang kusog mohinabang. O moduol sa MSWD ug moaplay sa AICS kun Assistance to Individuals in Crisis Situations.
Apan alang sa uban, labing maayo nga mangayog referral sa kongresista sa distrito nga gipuy-an, para sa hinabang sa DSWD national aron matagaan og guarantee letter ug makadiskuwento sa balayronon sa mga pangpublikong ospital. Ug kon ugaling dili paigo, mangayog hinabang sa Philippine Charity Sweepstakes Office (PCSO-Bohol) pinaagi sa ilang Medical Assistance Program.
Ubos ning maong programa, ang medikal nga hinabang ihatag ngadto sa indibidwal nga pasyente pinaagi sa pag-isyu og suwat nga garantiya ngadto sa mga ospital diin ang pasyente gitambalan. Usa kini ka sertipikasyon diin ang ahensiya ang mobayad sa bayronon sa pagpaospital apil na ang mga medisina, dayalisis, pagpatambal sa kanser, laboratoryo, implant and medical devices, ug uban pang grabeng mga sakit.
Dili sayon ang pagpangayog hinabang kay daghang papeles ang gikinahanglan ug mahimong mosamot kahilis ang imong Spartan sa pagbalik-balik og hikay sa mga papeles ngadto sa ahensiya. Labing gikinahanglan sa mga dokumento ang medical abstract sa pasyente, banabana nga balayronon sa ospital, resita sa mga medisina, ug endorsement gikan sa ospital.
Hinuon karon, mas gipadali na sa PCSO kay gihimo na nilang online ang aplikasyon. Apan kinahanglan nga magdala og taas-taas nga pailob kay dili maatiman dayon ang imong panginahanglan. Online man tuod ang aplikasyon apan mas maayo nga personal nga moadto sa buhatan sa PCSO-Bohol aron matabangan sa in-charge sa online application, kay dali ra makasulod sa ilang portal.
Daghan na sa mga Bol-anon ang nakapangayog hinabang sa PCSO ug usa ta sa nabenepisyohan niini. Busa dako ang ahong pasalamat sa PCSO kay nakapangayo kog hinabang nga P70,000.00 sa pagkadisgrasya sa ahong amahan ug naospital sa Tagbilaran. Ang maong kantidad nakatapak-tapak gyod sa dakong bayronon sa ospital.
Bisan og may moingon nga ang PCSO usa sa mga naggiya sa katawhan nga mosugal sa Lotto, sa Swertes, sa Sweepstakes ug uban pa, dako usab kinig gidalang papel alang sa panginahanglang medikal sa katawhang Pilipino.
Sa pagdis-og sa panahon, manghinaot kita nga padayong magatuman sa iyang misyon ang PCSO ilabina ngadto sa mga kabos. Ug dili sa mga pasyente nga sapian ug kaila sa mga nanagdumala sa PCSO, ug sa mga politiko, nga makakuhag hinabang labing menos 200,000.00 samtang nagpabugnaw sa humot nga lawak sa St. Lukes, sa Kaulohan.
Bahin sa Tagsulat:
Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.