Tinood ba nga adunay Diwa sa Pasko?
NI:RONIE ORILLOSA
Sa dihang linghod pa ang akong panuigon, usa ka tanghaga kanako ang kasaulogan sa Pasko sa Pagkatawo ni Hesus.
Usa niana ka higayon, sa mabugnaw nga sayong kabuntagon, samtang misapigad sa akong pagbati ang hoyohoy sa panahon sa Pasko, mibati ko ug kadasig sa pagpangutana sa akong kaugalingon kung tinood ba ang gitawag ug DIWA sa PASKO?
Nanglabay ang mga katuigan ug ania na ako karon sa hingkod nga panuigon. Nagpabilin ba gihapon kanang maong pangutana sa akong alimpatakan? Susama ba gihapon ang akong mga kabahin sa Pasko kaniadto ug karon?
Sa prangka nga pagkasulti, miabot gyud ko sa edad nga dili na ko motoo nga tawo si Santa Claus. Maoy hinungdan nga akong gisultihan ang akong inahan nga undangon na ang pagbutang ug medyas sa Christmas Tree kay gusto na usab nakong undangon ang pagpaka-aron ingnon nga anaa sa Sta. Claus sa akong palibot.
Maoy hinungdan nga sa among hilisgutan sa tulumanon nga “Open Forum” uban kang Gloria Araneta niadtong Miyerkoles, Dec. 18, mibati ko ug pagmaya kay mibalik na usab ang tanghaga: Aduna ba gyu’y Diwa sa Pasko?
Kusog ang akong tingog nga misangyaw sa kahanginan, agi ug tubag sa pangutana ni Ma’am Gloria, nga nagatoo ako nga adunay Diwa sa Pasko.
Bisan pa man kung kining maong Diwa sa Pasko gustong tabonan sa komersyal nga aspeto sa pagsaulog. Dili ikaglimod nga sobra na ang gihatag nato nga gibug-aton sa mga pagpamalit sa mga maluho nga mga gamit, pagtambong sa mga kahilayan nga kalingawan, pagtandi kung kinsa ang mas nindot ang dayan-dayan, hangtud nga makalimtan na sa mga tawo ang tinuud nga kahulugan sa Diwa sa Pasko.
Nagtuo ako nga aron makabaton sa Diwa sa Pasko, kinahanglan nakong pangutan-on ang akong kaugalingon: “Unsa man gyud ang akong gisaulog?”
Sa pagka karon ang mga tubag sa akong pangutana nagbilin nga susama sa tubag ko kaniadto:
- Nga ang Pasko mahitungod sa pagkatawo ni Jesukristo.
- Nga kini mao ang panahon sa pagsaulog, pagpasalamat, ug pagmaya tungod kay natawo ang atong Manunubos.
- Nga ang iyang pagkatawo sa kalibutan mao ang dakong sumbahan sa tinuod nga mga mithi sa gugma, gugmang putli, hugot nga pagtuo, kalooy, paghatag, pagserbisyo, kalipay, pamilya, panaghigalaay, kalinaw, paglaum, ug pagpasayloay.
Ang Diwa sa Pasko mao ang pagtoo nga si Hesus ang hingpit nga panig-ingnan sa tanan mga mithi nga makatarunganon alang kanako ug sa tibook kalibutan.
Nagtoo usab ako nga adunay Diwa sa Pasko pinaagi sa pagpakita nga nga atong gigahinan og panahon ang atong pamilya ug mga minahal sa kinabuhi.
Ang Diwa sa Pasko atong makita sa matag binuhat nga mohunong sa makadiyot sa iyang kasarangan nga gimbuhaton aron sa pagpamalandong sa esensya sa kinabuhi. Dili kita angay nga malumos sa lapok sa yutan-ong panginahanglan kay kining tanan lumalabay lamang.
Pipila sa akong paborito nga mga buluhaton sa Pasko nga nagpahinumdom kanako sa tinuod nga Diwa sa maong kasaulogan mao kadtong mitabang ko sa akong mga ginikanan sa pag-andam sa mga pagkaon nga among pagasaw-an sa Pasko; kadtong nagkatapok kaming sakop sa pamilya nga puno sa kalipay ug kalinaw; kadtong among ipa-ambit sa among mga silingan ug kahigalaan ang tipik sa among grasya; kadtong pagsalmot sa pagkanta sa mga himno sa pasalamat; ug labaw sa tanan, kadtong pagbugkos sa among panaghiusa sa pamilya taliwala sa mga saad sa gugma ug tumang paghigugma.
Nagtuo ako nga ang pagbaton sa Diwa sa Pasko nagpasabut sa pagpa-ambit sa imong talento, gasa, panaghigalaay, ug ilabi na ang pagserbisyo. Ang paghatag og serbisyo makadugang og espesyal nga kalipay sa panahon sa Pasko.
Mao kini ang rason nga ang Diwa sa pasko kinahanglang masinati matag adlaw ug matag gutlo sa atong kinabuhi – dili lang panahon sa bulan sa Disyembre.
Kay matud pa sa sanglitanan, “Ang maayong binuhatan dili gyud magbunga ug dautan.”
(Bahin sa Magsusulat: Si Ronie Orillosa mao ang Co-Founder sa Youth Lead Philippines, Inc. diin siya aktibo nga sakop hangtud karong panahona. Director for Membership usab siya sa Rotary Club Downtown San Juan, Metro Manila. Napili siyang Barangay SK Kagawad kanhi sa Dao, Dakbayan sa Tagbilaran ug siya ang Presidente sa Pangagamhanan sa mga Tinun-an sa PMI Colleges, Bohol sa tuig 2012-2013. Presidente usab siya sa Bohol Alliance of Student Councils sa susamang tuig.)