Kwalipikadong Konsumidor sa Bohol Light, mahimo nang mo-claim sa Bill Deposit Refund
Sinulat ni Sheryl B. Pagas
Maayong balita! Kon ikaw kwalipikado alang sa Refund sa Bill Deposit diin nasuta nga walay penalties sulod sa nilabay’ng tulo ka mga tuig ug nagpabilin ka nga maayo ang payment record gikan sa pagbayad sa “Customer Deposit”, pwede na kining makuha ang maong deposit.
Ang unang batch nga nadeklarar nga pwede makakuha sa Customer Bill Deposit Refund nikabat ug 335 registered accounts diin gisugdan na ang pagtaho sa maong balita ngadto sa mga hingtungdan pinaagi sa pagbutang ug mga pahibalo diha sa ilang mga billing statement nga giapod-apod sugod niadtong December 15, 2024.
Kung ikaw usa sa mga nakadawat sa “Notice”, palihog ug bisita gilayon diha sa opisina sa Bohol Light sulod sa napulo ka adlaw aron kini ma proseso.
Mao kini ang mga gikinahanglan:
Magdepende sa customer kung unsay paagi sa iyang pagkuha (claim) sa refund; mahimong direkta kining ihatag ngadto sa customer pinaagi sa cheke, o di gani, ibayad ang kantidad sa refund ngadto sa mosunod nga bill sa kuryente.
Ang pag-refund sa bill deposits mandato kini ubos sa Article 7 ug Article 28 sa Magna Carta for Residential Electricity Consumers diin gilatid nga ang usa ka customer nga relihiyosong gabayad sa iyang electric bills “on time” sulod sa milabay nga tulod ka tuig (o 36 months) ug walay record nga giputlan sa serbisyo sa kuryente, maka-claim ug 100% refund sa deposit ug ang obligasyon usab sa pagbayad niini.
Kung aduna kitay mga pangutana kabahin sa proseso sa Customer Bill Deposit Refund palihog ug tawag lamang sa atong hotline numbers at (038) 412-3503 / 501-7762 local 101 or 202. Pwde usab kitang mo text or dial at 09318524310, 09318524311 or send a message at Bohol Light Company, Inc. official chat box.
Ayaw palabya kining maong kahigayunan. Apply na!
BWUI nanghatag ug uniform sa Taloto National High School
Sinulat ni Victor L. Tambis
Sa wala: ang mga tinun-an sa Taloto National High School nga nagasul-ob sa MAPEH uniform nga gihatag sa Bohol Water Utilities, Inc. Makita usab ang mga magtutudlo uban ni City DepEd Superintendent Wilfreda Bongalos ug ang mga opisyales sa BWUI. Sa tuo: ang School Principal nga si Mr. Nilo Sendrijas mipakita sa MAPEH uniform nga gihatag sa BWUI.
Subay sa programang kaakohan ngadto sa komunidad o Corporate Social Responsibility (CSR), ang Bohol Water Utilities, Inc. mihatag ug 35 sets nga P.E. uniform ngadto sa Taloto National High School niining syudad sa Tagbilaran.
Ang maong uniporme gi apod-apod ngadto sa mga tinun-an sa maong tulunghaan aron maoy magamit sa ilang P.E class.
Ang pag turn-over sa maong donasyon gisaksihan ni Ms. Wilfreda Bongalos, City DepEd Superintendent.
Mapasalamaton ang mga magtutudlo pinangulohan sa ilang principal nga si Mr. Nilo J. Sendrijas, diin sila miingon: “Gibati namo ang kalamposan samtang nagtan-aw sa mga tinunan nga malipayon nga nagsul-ob sa ilang MAPEH uniform nga gihatag sa BWUI.
Miingon ang mga taga Bohol Water: “Kami sa TNHS family mipadayag sa among matinud-anong pasalamat sa Barangay Council sa Taloto pinangulohan ni Brgy. Capitan Eugene Zamora sa ilang walay kaluya nga pagsuporta aron pagtuktok sa dughan sa mga opisyales sa Bohol Water pinanguluhan ni Christine Ranay aron mosanong sa among panginahanglan alang sa mga estudyante.”
Ug ang mga benipisyaryo misumpay sa pag-ingon ug “Daghan…daghan kaayong salamat Bohol Water. Usa kini ka gasa nga among nadawat niining panahon sa kapaskohan.”
Tungod sa kamahinungdanon sa maong katuyu-an, ug agi’g paghatag ug suporta ngadto sa mga kabataan, gihatagan sa Bohol Water ug dakong pagtagad ang mga panginahanglan sa mga pampublikong tulunghaan subay sa kaakohan sa komunidad sa maong Kompanya.
PINASKOHAN SA NIA
P29/kilo humay ibaligya ngadto’s pili nga sector, Dec 20 sa NIA Dao
Sinulat ni Rey Anthony Chiu
Agi og pinaskohan sa National Irrigation Administration (NIA) Region 7, mapalit ang sat P29 ang kilo nga bugas humay sa mga pili nga sector Disyembre 20, 2024, didto sa NIA Covered Court, sa Dao, atbang sa Panda Tea Garden Suites.
Ang barato nga bugas, o mas nailhan nga Bagong Bayaning Magsasaka (BBM) Rice, mapalit sa tag napulo ka kilo nga sako, sa mga senior citizens, solo parents, persons with disabilities ug mga benepisaryo sa Pantawid Pamilyang Pilipino Program (4Ps), kon makapalita sila sa ilang membership IDs sa nga mahisgutang mga sector.
Sa sitwasyon nga ang membro manugo lamang sa laing tawo, gikinahanglan kini makapakita sa Authorization Letter nga gipirmahan sa rehistrado nga sakop.
Kay dili usab kayo daghan ang suplay sa bugas, matud sa NIA nga ilang unahon og entertain ang una moabut hangtud nga matilok ang pahat ipamaligya alang niining adlaw sa pamaligya.
“Kinahanglan nga magdala sa mga gikinahanglang pagmatuod aron makapalit og usa lamang ka sako sa tag 10 ka kilo,” pahimangno sa NIA.
Ang BBM Rice, abot sa mga Bol-anon nga mag-uuma nga misalmot sa NIA Farming support Program o Contract Farming.
Kahinumduman nga sa Contract Farming sa NIA, ang mag-uuma nga may usa ka ektarya nga humayan, kontratahon sa NIA pinaagi sa paghatag niini og P50 mil sa matag ektarya, alang sa dugang inputs nga kinahanglan sa humayan, abangan sa makinarya sama sa traktor ug pangpalit sa pamatay dangan.
Ang katunga sa abut sa ani, maoy mahimong suplay sa BBM Rice nga mapalit sa tag P29 ang matag kilo, samtang ang laing katunga, magdepende sa mag-uuma kon para pangunsumo sa iyang banay o ibaligya gihapon usab.
LMP mihangyo sa mga Kongresista nga i-apil sa prangkisa sa BLCI ang kalungsuran
Sinulat ni Rey Anthony Chiu
Human wala na maka-angay sa lay-at nga serbisyo sa kasamtangan nga power distribution utility, pormal na nga gihangyo sa mga mayor sa Bohol ang tulo ka mga representante sa Kongreso sa pagpalakip na sa mga kalungsuran sa Bohol sa prangkisa nga gikahatag sa Bohol Light Company Incorporated.
Kini kay ang Korte Suprema, una na nga mipadayag nga ang mga electric cooperatives, wala’y katungod nga angkonon ug solohon na lang ang prangkisa sa usa ka lungsod ug sa ilang service area.
Pinaagi sa Resolusyon No. 010-2024, pinetsahan niadtoing Oktubre 30, 2023, didto sa Delmont Hotel sa Pasay City, gipasupot sa mga mayor ang ilang kasibot nga ipalapad na ang prangkisa sa BLCI, aron mahilakip na ang mga kalungsuran.
Ang mga kalungsuran sa Bohol karon, kasamtangan nga gialagaran sa Bohol Electric Cooperative I ug 2 (BOHECO 1-2).
Ang BLCI kasamtangan nga maoy nagpakatap sa serbisyo sa suga nga dagitab sa Tagbilaran City subay sa ilang prangkisa nga una na nga nakuha, ug kini taman lamang sa Oktubre 2025.
Ang BLCI, nga nagbarug sa 70% sa bahinan sa Salcon Power, napalit na sa Prime Electric, ang inahan nga kompanya sa MORE Electric and Power Corporation (More Power).
Ang nahibilin nga 30% nga bahinan, iya pa gihapon sa Kapitolyo sa Bohol, kinsa kauban na sa More Power karon nga nagdumala sa serbisyo.
Niining bag-o pa lamang, nakit-an sa sa mga mayor ang dako nga bentaha sa matang sa serbisyo sa More Power segun sa mas maayong serbisyo ug mas barato nga balayranan didto sa Ilo-ilo City, ug kini usab ang gisaad nga dalhon nga matang sa serbisyo sa bag-ong kompanya, nganhi sa Tagbilaran City.
Tuod man, gikan sa tag P14 kapin ang bayronon sa matag kilowatt-hour, dinhi sa ilang unang mga buwan sa Tagbilaran, napaubos ka kini sa tag P9.00 kapin, samtang matud ni Roel Castro, presidente sa More Power, ila na usab ang gilihok ang pagpadangat sa mas maayong serbisyo segun sa ilang gitanyag sa Ilo-ilo City.
“We have demonstrated it here in Tagbilaran, matud ni Castro, ug wala usab sila makastorya sa Boheco 1 ug 2, apan matud niya, hangtud m-stable na ang Tagbilaran, mangita na usab ang More Power og pamaagi nga makatabang sa mga konsumidor, isip commitment,” dayag ni Castro.
Ug samtang gikaduso na nila ni Kongresista Edgar Chatto, Maria Vanessa Aumntado ug Kristine Alexie Tutor ang House Bill 10888 nga magtanyag og dugang 25 ka tuig nga prangkisa sa More Power alang sa Bohol Light sa Tagbilaran City, buot na sa mga mayor nga i-apil na sa ikahatag nga prangkisa sa Kongreso, ang BLCI o More Power aron makasulod na usab sa mga kalungsuran gawas sa Tagbilaran City.
“Amo nga gipagandaman ang pagsaka sa kaugmaran ug kalambuan sa among mga lungsod, kini manginahanglan sa mas kasaligan ug mas makaya nga presyo aron matubag usab nila ang nagsaka nga panginahanglan sa baratong koryente sa mga mamumuhunan nga musolod sa mga kalungsuran,” matud sa 28 ka mga mayor nga minglagda sa resolusyon.
Sa laing bahin si Gobernador Erico Aristotle Aumentado, mi-ingon nga ang desisyon sa mga mayor, i-agi pa sa Kongreso, manginahanglan sa taas pa nga panahon, samtang iyang girespeto ang desisyon sa mga mayor isip valido.
Matud niya, kasagaran sa mga LGUs apektado sa serbisyo sa BOHECO 1 ug 2, kay may mga suliran pa sa low voltage, nga makabalda sa industriya ug makaguba sa mga appliances sa mga tawo.
Hinuon, kon unsa ang sangputanan sa pagpagawas sa prangkisa, kon kini masabutan ug mas makaayo sa ekonomiya sa Bohol, mas maayo alang sa gobernador.
PAG-ULI SA BILL DEPOSITS. Usa sa mga maayong bansay sa BLCI /More power mao ang pag-uli sa bill deposit nga gibayad sa mga konsumidor niadtong nagpataud pa kini sa koryente kaniadto. Basta may unom ka buwan nga walay palta sa pagbayad sa saktong panahon, iuli na ang deposit. 330 ka mga konsumidor ug kapin sa milyon ang iuli sa BLCI More Power ngadto sa mga konsumidor isip pinaskohan, matud ni More Power President Roel Castro. (Hulagway gikan sa PIA-Bohol)
Al 101 alang sa Bohol PIO’s gipahigayon
Sinulat ni Elvira Bongosia
Sa paspas nga pag-uswag sa digital nga talan-awon karon, ang mga public information officers gisangkapan sa mahinungdanong kahibalo kalabot sa artificial intelligence (AI) atol sa ilang asembliya sa buwan sa Disyembre.
Ang Association of United Development Information Officer (AUDIO) sa Bohol nakigtambayayong sa PLDT ug SMART Communications Inc. alang sa pagpahigayon sa “Al 101 for Bohol Public Information Officers: Introducing Al tools to Enhance Public Communications” niadtong Disyembre 6, 2024 sa Bellevue Resort sa Panglao.
Matud pa sa Visayas Regional Head sa PLDT SMART Stakeholder Management Team nga si Marylou Gocotano, kining pakigtambayayong sa AUDIO-Bohol nagpasiugda sa pasalig sa kompanya nga kabag-ohan, digital inclusion, ug ang mahinungdanong paningkamot sa digitalization sa gobyerno.
Ang mga PIOs nakabaton og mas maayong pagsabot bahin sa Al gikan sa Cebu-based journalist, blogger ug web developer nga si Max Limpag.
Gidasig ni Limpag ang mga PIO sa pagsagop sa mga bag-ong teknolohiya sama sa Al.
Gitumbok niini nga ang mga PIO adunay mahinungdanon nga papel sa pagsiguro sa kaluwasan sa publiko ilabi na sa panahon sa krisis ug katalagman diin sila ang responsable sa pagdumala ug pagsabwag sa importanteng impormasyon ngadto sa publiko, media, ug uban pang mga stakeholders.
Matud pa ni Limpag nga pinaagi sa paghatag sa tukma sa panahon ug tukma nga mga update, ang mga PIO nagtabang sa mga tawo sa paghimo sa nahibal-an nga mga desisyon ug paghimo sa mga kinahanglan nga aksyon aron mapanalipdan ang ilang kaugalingon ug ang ilang mga komunidad.
Ang AI nagtumong sa mga sistema sa kompyuter nga makahimo sa mga buluhaton nga kasagarang nanginahanglan og paniktik sa tawo, sama sa pag-analisar sa datos, paghimog mga panagna, ug pagsabot sa natural nga pinulongan.
Si Limpag nagkanayon nga sa pagdumala sa emerhensya, ang AI mahimong magamit aron mapauswag ang mga kapabilidad sa mga PIO ug mapaayo ang ilang pagkaepektibo sa komunikasyon sa krisis.
Pinaagi sa paggamit sa mga teknolohiya sa AI, ang mga PIO makahimo sa pagkolekta ug pag-analisar sa impormasyon nga mas episyente, pag-automate sa mga proseso sa komunikasyon, pag-angkon og mas maayo nga kahibalo sa sitwasyon, ug paghimo og mga desisyon nga nahibal-an.
Gidugang ni Limpag nga ang teknolohiya sa Al nagtanyag og bililhong mga aplikasyon alang sa mga PIO ug usa niini nga mga aplikasyon mao ang real-time nga pagtigom ug pagtuki sa impormasyon.
Mahimong magamit sa mga PIO ang mga algorithm sa AI aron ma-monitor ang mga platform sa social media ug maghimo pag-analisar sa sentimento. Makapahimo kini kanila nga magpabiling updated sa mga diskusyon sa publiko, makaila sa mga mitumaw nga uso, ug makasukod sa sentimento sa publiko panahon sa mga krisis o kalamidad.
Dugang pa, ang Turno scribe.Al, cloud computing, machine learning, ug uban pa gituki usab nga makatabang sa mga PIO sa pagkolekta sa komprehensibo ug pinakabag-o nga impormasyon, nga magtugot sa mas tukma sa panahon nga pagsabwag sa importante nga mga update ngadto sa publiko.
Apan sama sa ubang mga tools, gitataw ni Limpag nga ang AI usa lamang ka tools o himan ug dili kini makapuli sa pagtubo sa intelektwal busa kinahanglan nga gamiton sa maayo ug responsible nga paagi.
Ang PIA-Bohol kauban ang AUDIO-Bohol nakigtambayayong sa PLDT & Smart Communications ug sa Bellevue Resort aron masangkapan ang mga PIOs sa nasudnong gobyerno ug lokal nga gobyerno sa mahinungdanon nga kahibalo kalabot sa AI pinaagi sa pagpahigayon sa “Al 101 for Bohol Public Information Officers: Introducing Al tools to Enhance Public Communications” niadtong Disyembre 6, 2024 sa Bellevue Resort sa Panglao. (Hulagway gikan sa PIA7-Bohol)
Contractual, job-order nga mga trabahante
sa gobyerno makadawat og gratuity pay
Sinulat ni Elvira Bongosia
Giaprobahan ni Presidente Ferdinand R. Marcos Jr. ang umento sa gratuity pay alang sa mga trabahante nga Contract of Service (COS) ug Job Order (JO) sa gobyerno, nga gipasakaan ang kantidad ngadto sa P7,000.
Ang pag-usbaw mo-epekto dili sayo sa Disyembre 15.
Sa upat ka pahina nga Administrative Order 28 nga gilagdaan ni Executive Secretary Lucas P. Bersamin, si Presidente Marcos miingon nga ang mga JO ug mga empleyado sa COS nga nakahatag sa kinatibuk-an o aggregate nga labing menos upat ka buwan sa aktuwal nga performance sa serbisyo sukad Disyembre 15 adunay katungod sa gratuity pay gikan P5,000-P7,000.
Matud pa sa Presidente nga ang paghatag ug year-end gratuity pay sa mga trabahante nga COS ug JO usa ka angayan nga pag-ila sa ilang kahago ug bililhong partisipasyon sa pagpatuman sa nagkalain-laing program, activities ug projects (PAPs) sa gobyerno, ug ang ilang mahinungdanong papel sa paghatod sa mga serbisyo sa gobyerno taliwala sa kasamtangang katilingbanong mga hagit sa ekonomiya.
Ang mga trabahante kansang kontrata nagpabiling epektibo sa samang petsa angayan usab nga makadawat sa gratuity pay.
Ang kataposang pagsaka sa gratuity pay rate nahitabo niadtong 2021, sumala sa Department of Budget and Management (DBM).
Ang umento sa gratuity pay sa mga trabahanteng COS ug JO gikan sa P3,000 ngadto sa P5,000.
Ang mga empleyado nga nakahatag og ubos sa upat ka buwan nga serbisyo sukad sa Disyembre 15 mahimo gihapon nga makadawat sa FY 2024 Gratuity Pay sa pro-rate nga basehan.
Ang mga trabahante sa COS/JO nga adunay tulo ka buwan, apan wala pay upat ka buwan nga serbisyo mahimong makadawat ug gratuity pay nga dili molapas sa P6,000 samtang kadtong adunay duha ka buwan, apan ubos sa tulo ka buwan nga serbisyo mahimong makadawat og gratuity pay nga dili molapas sa P5,000.
Ang mga trabahante nga wala pay duha ka buwan mahimong makadawat og gratuity pay nga dili molapas sa P4,000.
Ang AO 28 mo-epekto dayon pagkahuman sa kompleto nga publikasyon niini sa Opisyal nga Gazette, o sa usa ka mantalaan nga adunay kinatibuk-ang sirkulasyon.
AUDIO-Bohol nagdala ug paglaum
sa mga PDL sa BDJ Female Dorm
Sinulat ni Elvira Bongosia
Aron mabati sa mga babayeng gihikawan sa kagawasan sa Bohol District Jail (BDJ) Female Dormitory ang kasadya sa Pasko bisan naa sulod sa prisohan, ang Association of United Development Information Officers (AUDIO)-Bohol nangapod-apod og Christmas bundle of joy niadtong Disyembre 17.
Si AUDIO-Bohol President, Doris Isabel Racho, DM sa iyang mensahe miingon nga ang maong gift giving event dili lang alang sa panahon sa Pasko kon dili kabahin sa outreach activity sa asosasyon.
Samtang si Philippine Information Agency (PIA)-Bohol Information Center Manager, Rey Anthony Chiu mipaambit nga walay labing datu nga walay panginahanglan, ug wala usab labing pobre nga walay ikahatag diin mao kini ang nagdasig sa mga miyemro sa pagtampo sa mga kahinguhaan aron mahimong posible kining kalihokan.
Gitunol sa mga opisyal sa AUDIO-Bohol ngadto sa 24 ka mga babayeng PDLs ang mga Christmas bundle of joy nga may sulod nga mga hygiene kits ug mga pagkaon.
Pipila sa mga PDLs ang nahimong emosyonal ug wala kapugngi sa pagtulo sa ilang luha tungod kay matud pa nila, nahinumdoman pa diay sila ug naa pay nigahin og oras sa pagbisita ug paghatag kanila og pinaskohan.
Atol sa hamubo nga programa, ang mga PDL nipasundayag og mga awit ug sayaw isip pasalamat.
Ang Acting Jail Warden sa BDJFD nga si SJO2 Maria Jessa Joy Torreon mipadayag sa iyang pasalamat ngadto sa grupo sa pagdala og kalipay ug paglaum sa mga PDL.
“Your kindness and selflessness have not only provided essential support to our PDL but also uplifted their spirits during this Christmas season while they are far from their family (Ang inyong kaayo ug pagkadili hakog wala lamang naghatag og mahinungdanong suporta sa atong PDL kondili nakapabayaw usab sa ilang espiritu niining panahon sa Pasko samtang layo sila sa ilang pamilya,” matud pa ni Torreon.
Ikatulo na kini ka tuig nga outreach activity sa asosasyon diin niadtong 2022, nanghatag usab sila og mga candy packs ug schools supplies sa mga mga bata ug mga lumad nga nagpuyo sa Barangay Biabas, Guindulman ug sa niaging tuig sa Barangay Tuboran, Bien Unido.
Ang gift-giving event ning tuiga nahimong posible tungod sa pagtinabangay sa mga opisyal ug miyembro sa AUDIO-Bohol ug sa tabang usab nila Cong. Edgar Chatto, Cong. Maria Vanessa Aumentado, Cong. Alexie Tutor ug DPWH-2 District Engr. Fernando J. Talagsa.
Ang AUDIO-Bohol usa ka hugpong sa mga information officers sa mga lungsod ug syudad, ingon man mga ahensya sa nasudnong gobyerno, uban sa PIA, isip secretariat ug lead agency.
Ibabaw nga hulagway L-R) LGU-Tubigon Information Officer Engr. Rojer Lindo, Jail Officer Psyche Posadas, NIA-7 IO Zarline Sambas, LGU-Alicia IO Julius Golosino, BDJFD Acting Jail Warden SJO2 Maria Jessa Joy Torreon, AUDIO-Bohol President Doris Isabel Racho-DM, PIA-Bohol IDO Elvie Bongosia ug PIA-Bohol Manager Rey Anthony Chiu atol sa Christmas gift-giving sa AUDIO-Bohol sa mga babayeng PDL sa BDJFD niadtong Disyembre 17. (Hulagway gikan sa PIA-Bohol)
Pagsulod sa Grab sa Bohol makapauswag sa serbisyo
sa transportasyon, industriya sa turismo sa lalawigan
Sinulat ni Elvira Bongosia
Opisyal nga gilusad sa Grab Philippines ang ilang flagship on-demand nga mga serbisyong GrabCar ug GrabFood, sa lalawigan sa Bohol niadtong Lunes, Disyembre 16 sa isla sa Panglao.
Ang pagsulod sa Grab sa Bohol gipaabot nga makapauswag sa serbisyo sa transportasyon ug sa industriya sa turismo sa probinsiya.
Atol sa opisyal nga paglusad, gipasiugda ni Gob. Erico Aristotle Aumentado ang kamahinungdanon sa Grab alang sa mga turista ug lokal nga mga pasahero.
“Sa atong byahe ngadto sa pag-abante isip usa sa mga inila nga destinasyon sa atong mga turista, ang Grab Philippines ang kasamtangan nga tubag sa atong panginahanglan,” matud pa ni Aumentado.
Gidugang niini nga importante nga kita adunay access sa teknolohiya nga nagtugot sa bisan kinsa – ilabi na sa mga turista ug commuters – sa pag-access sa labing maayo nga mga kapilian sa diha nga kini moabut ngadto sa luwas ug barato nga transportasyon, pagkaon ug package delivery, ug bisan sa pinansyal nga mga serbisyo.
Gitumbok usab niini nga samtang nagpadayon sila sa ilang mga paningkamot aron mahimo ang Bohol nga usa ka nag-una nga destinasyon alang sa mga turista ug usa ka nag-unang hub sa negosyo alang sa mga tigpamuhonan, mahinungdanon nga sila makigtambayayong sa Grab sa paghatag og world-class nga serbisyo sa tanan.
Ang paglusad sa GrabCar sa Bohol gipalig-on sa kapin sa 100 ka mga slots nga giaprobahan sa Land Transportation Franchising and Regulatory Board (LTFRB), nga nakapahimo sa Grab nga makasakay ug makahatag og gahom sa mga lokal nga drayber.
Gawas sa Grab Car, ang food and parcel delivery services magamit na usab pinaagi sa online platform.
Pinaagi sa GrabFood, ang mga Boholano nga micro, small and medium enterprises (MSMEs) ug mga tag-iyahan og restaurants konektado na sa digital ecosystem nga nagpalapad sa ilang abot ug nagpalambo sa operational efficiency sa food delivery.
Samtang ang on-demand nga serbisyo sa pagpadala sa parcel sa super app, maghatag sa mga lokal ug negosyo og paspas ug kasaligang paagi sa pagpadala og mga pakete.
Anaa na karon ang Grab sa syudad sa Tagbilaran, lungsod sa Dauis, ug Panglao nga mga dapit, uban ang GrabTrike sa dili madugay ilusad.
Ang opisyal nga paglusad sa Grab Philippines sa Bohol niadtong Lunes, Disyembre 16 sa isla sa Panglao nga gitambongan nila: (L-R) Malou Inocanda-Tabor, Public Affairs Manager; Booey Bonifacio, VP for Public Affairs; Ronald Roda, Grab Philippines Country Head; Bohol Gob. Aris Aumentado; CJ Lacsican, VP for Cities and Business Operations; Jay Lim, Head of Grab Central Visayas; Dominic Butalid, Bohol Chamber of Commerce. (Hulagway gikan sa PIA7-Bohol)
BALAK
KAHIBULONGAN
Sinulat ni Engr. Rogelio Podelino
Ang kinabuhi sa tawo napuno sa mga tanghaga
Dili matugkad ni kinsa’ng mortal nga bathala
Ngano nga ang tawo bati-on ug gugma
Bisan kon wala siya sugo-a
Ang gugma dili nimo masabtan
Motungha ni bisan kinsa’ng may balati-an
Wala’y pagtan-aw sa tawo’ng higugma-on
Kay iya mang kaugalingon’g kabubut-on
Harangan man ug mga bangkaw ang dalan
Mangita ug paagi nga iya’ng kalutsan
Dili balehon ang mga kalisdanan
Basta ang kagustuhan matuman
Daghan’g ginghari-an ang gibiya-an
Kay supak sa ilang tradisyon’g naandan
Nga mahigugma sa dili nila kahan-ay
Wala baleha bisan siya isalikway
Mga tanghaga sa kinabuhi dili maapas
Bisan unsa kalantip sa salabutan’g mangagpas
Kon gugma na ang magsugo
Wala’y bisan kinsa’ng Herodes makasumpo
Kon ang tawo bati-on na ug paghigugma
Sangko sa langit ang kalipay makita lang siya
Dili gusto nga mahibulag sa iyaha
Sa tanan’g takna gusto makita niya
Kining tanan pagbuot sa KAHITAS-AN
Aron magsinabtanay ang mga katawhan
Samtang buhi pa ang tawo
Ang gugma sa tawo KAHIBULONGAN pag-ayo