May Pasko Bisan sa Problema Gikusokuso
Ni ELEAZAR TUTOR ACAMPADO
BULAHAN kita, Sano, kay bisan gikusokuso sa daghang problema ang atong kinabuhi, ania moginhawa pa.
Dako ang atong pagpasalamat sa gipakitang gugma sa mga mahal sa kinabuhi, mga igsoon, kaparyentehan ug kahigalaan nga miagakay aron padayong makalakang paingon sa dapit nga gustong padulngan. Ug labaw sa tanan, dako ang atong pagpasalamat sa Ginoo nga gidungog ang atong mga pag-ampo, magagmay man kini ug madagko.
Ning pagsaulog nato sa Pasko, maglipay gihapon ta bisan pa sa daghang mga problema. Bisan unsa pa nga trahedya ang miabot sa kinabuhi, positibo lang gihapon ta. Kay ang tanang kapit-os ug kasakitan may utlanan. Ang tanang pag-antos ug pagkugi may padulngan.
Ipakita gihapon ang pahiyom, di ikaulaw bisan gitabonan ang kandiis sa namiyahok nga aping. Ibuhagay ang katawa bisan pag mohungaw sa naghilang nga ngipon. Karon ang panahon nga magsadya. Kay sa paghinumdom nato sa pagkatawo sa atong Manunubos, atong masihag nga ang tanan may paglaom.
Bisan unsa pa kita ka makasasala, may luna kita sa gugma sa Diyos. Gihalad Niya ang kinabuhi sa bugtong Anak aron luwason kita sa atong mga kahuyangan. Busa way rason nganong di usab kita makapasaylo sa mga tawo nga nakasala nato o mangayog pasaylo ngadto sa mga tawo nga gibuhatan nato og sala.
Kini ang panahon nga magpahinumdom nato nga magpadayon pagsabwag sa espiritu sa gugma, pagtuo ug paglaom ngadto sa atong isigka tawo.
Kon duna may kitay nakabingkil nga tawo gumikan sa atong mga panahom, linya sa politika, negosyo o sa personal, lugwayan na nato ang pisi ug makig-uli nila sa maayong kabubut-on. Kini ang panahon nga dali ra natong mapahiluna ang pagsinabtanay sa tanan, labi na sa managtiayon, sa mga ginikanan ug anak, sa managsoon, sa managhigala ug sa mga membro sa komunidad.
Nganong ato kining palabyon? Mas maayong mosugat sa sunod tuig nga gaan ang paminaw, puno sa enerhiya ug way pisi nga naghigot sa liog.
Atong hinumdoman, nga ang tanang materyal nga butang mga dayan-dayan lang sa Pasko ug mahanaw, di sama sa gugma mahimong magmalungtaron sa tagsa-tagsa nato ka kasingkasing.
MALIPAYONG PASKO, SANO!
Bahin sa Tagsulat:
(Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)
KASIKAS SA BOHOL
