Pagpahimutang sa Resolusyon sa Bag-ong Tuig

Ni ELEAZAR TUTOR ACAMPADO

SA kataposang gabii sa 2024, seguradong daghan na ang nag-andam og mga resolusyon nga gustong kahatagan og katumanan sulod sa mosunod nga 365 ka adlaw. Apan ang estadistika nagpakita nga ang halos tanan nato dili makakab-ot sa tanang gustong kab-oton sa tuig 2025. Ang datos sa University of Scranton Journal of Clinical Psychology nagpakita nga 8 porsento ra ang nakakab-ot sa ilang New Year’s resolutions.

Ngano? Daghang mga hinungdan.

Usa na niini ang mga resolusyon nga wala silay kontrol. Sama sa “Mahigugma ko karong tuiga” o “Modaog ko sa Mega Lotto”. Apan dunay daghang estilo sa kinabuhi nga kahatagan og kausaban nga makapausbaw sa panglawas ug pagpakabuhi sa mosunod nga tuig.

Gusto man nimo nga mokita kag dako sa imong trabaho, makatigom og salapi o moundang na sa pagpanigarilyo o pag-shabu, ang paghimo og New Year’s resolution usa ka yanong pagpahimutang sa imong mga tumong sa tuig. Usa ka butang nga halos ang tanan nato nagbuhat niini matag adlaw sa trabaho o sa laing higayon sa kinabuhi. Ang uban niadtong mga kalamposan dagko samtang ang uban mga gagmayng kadaogan. Ug kon ato man kining naamgohan, ang halos tanan natong nakab-ot gikan sa gihimo nga mga plano.

Ang New Year’s resolution usa ka deklarasyon nga mousbaw ang kinabuhi ug panginabuhi sa mosunod nga tuig. Apan ang yanong pagsulti nga mokita og P100,000 matag buwan o moundang sa pagpanigarilyo dili mahitabo kon wala gihimong plano ug espesipikong mga tumong nga angayng buhaton.

Matod sa saykolohista nga si Lynn Bufka, mas daling makab-ot ang New Year’s resolution kon mag-ugba og gamay apan seguradong makab-ot nga mga tumong sulod sa tuig, imbes dako apan dili maahom. Kay niya pa, dili mas mahinungdanon ang langyab sa kausaban kondili ang akto sa pag-ila sa kausaban sa estilo sa kinabuhi, ang paglihok tumong niini, nga tagsa-tagsang atubangon.

Kon ang imong tumong makunhoran ang timbang, sutaon ang mga angayng buhaton aron kini makab-ot. Sama sa paggahin og panahon sa pag-adto sa gym o mangitag paagi nga makaehersisyo, maglakaw padu’ng man o pauli gikan sa trabaho. Kon tumong usab nga makatigom, mahimong magbawon inigsulod sa trabaho imbes nga moadto sa Jollibee o Mang Inasal inigtingpaniudto o meryenda. Ug kon gusto nga makaundang sa pagpanigarilyo, sutaon ang mga hinungdan nganong gustong moundang, mokonsulta sa doktor, sabton ang mga linugdangan ug mangayo og tabang.

Magpahimutang og mga batakan apan himoon kining reyalistiko. Dili pagdahom nga makakibrag 20 libras sa unang buwan, pananglitan. Mahimo nga ang resolusyon yano ra nga moubos ang timbang sa kataposan sa Enero kay sa timbang sa pagsugod sa tuig, ug kini mahimong iaplay usab sa Pebrero ug Marso hangtod nga makakat-on og ideya unsay reyalistiko. Unya magpahimutang na usab ug tumong base sa unsay nakat-onan.

Ayawg kulataha ang kaugalingon kon dili matarget ang tumong ug kon makabuhat og gamayng limbong. Ang pagpanigarilyo human sa makahapo nga trabaho wala magpasabot nga napakyas ka. Mao usab kon mokaon kag daghang ice cream o ubang dessert sa birthday sa imong kapamilya. Ipadayon lang ang pagsunod sa imong plano ug buluhaton ug mas hatagag gibug-aton ang malungtarong premyo.

Sa pagkatinuod, lisod ang pag-usab sa estilo sa kinabuhi tungod sa atong mga kinaiya. Ang mga maayo ug daotan naugmad ug nakaugat sulod sa hataas nga panahon. Kon nagbuhat kag resolusyon nga maghimo og kausaban sa 20225, dawata nga dili kini sayon. Apan imbes mosurender tungod sa mga negatibo, mas maayong mangisog sa paghimog positibong kausaban sa mosunod nga 365 ka adlaw. Ayaw pagduhaduha ni molingi sa imong likod. Ang unahan padayong naghulat sa imong kadaogan.

Malipayon ug Mahimsog nga Pagsugat sa Bag-ong Tuig sa Tanan!

Bahin sa Tagsulat:

(Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)