Ang akong Pagtoo
Ni Ronie Oyao Orillosa
Nagtoo ako nga ang peace rally nga gihimo dili pa lang dugay didto sa dakbayan sa Manila inubanan sa mga kalihokan sa ubang bahin sa nasud, adunay political nga katuyoan (political agenda).
Alang kanako, politika ang usa sa mga hinungdan kung nganong gimugna kadtong maong peace rally nga gitambongan sa mabagang du-ot sa katawhan uban ang impluwensyal nga sekta sa Iglesia ni Cristo.
Apan wala usab nako isalikway ang katuyuan sa kalinaw nga maoy laing rason sa maong panagtigum didto sa Quirino grandstand.
Dako ang akong pagtoo nga ang pagsalmot sa mga sakop sa Iglesia ni Cristo mao ang pagsuporta sa posisyon ni Presidente Ferdinand “Bonbong” Marcos Jr. nga dili angay nga ipahamtang ang gitawag ug impeachment kang Bise Presidente Sara Duterte.
Ang peace rally nahitabo tungod kay nakita sa mga katawhan nga adunay pipila ka mga indibidwal ug grupo nga nag-file sa labing menos, tulo (3) ka mga reklamo sa impeachment sa atubangan sa House of Representatives batok sa Bise Presidente.
Ang tensyon tali sa Presidente ug sa Bise Presidente, wala gihapon magpakita nga ang Presidente naghimo ug lihok ug pamahayag nga mosuporta sa impeachment sa Bise Presidente, bisan pa kung nabuak na ang ilang mga relasyon.
Nagatoo usab ako nga ang tensyon tali ni Speaker Martin Romualdez ug Duterte nagpadayon tungod sa mga isyu nga adunay kalabutan sa imbestigasyon sa Kongreso kabahin sa mga aligasyon nga adunay sekreto nga pondo sa Opisina sa Bise Presidente lakip na ang pagputol sa budget alang sa maong buhatan.
Ang Iglesia ni Cristo nakakita tingali ug isyu nga political sa nasud, ug sa ilang pagkamatikod niini, nakahukom sila sa pagtapok sa ilang mga myembro aron ipatigbabaw ang suporta alang sa kalinaw.
Nagtoo ako nga ang mga tawo nga misuporta sa rally, gustong mahatagan ug solusyon ang isyu kabahin sa national political consensus samtang ang Kongreso nagpadayon sa proseso sa impeachment sa Bise Presidente.
Nangilabot na ang mga tawo pinaagi sa pagsalmot sa peace rally tungod kay nakita nila nga ang sitwasyon sa nasud dili na kaayo maayong tan-awon ilabi na kay ang panagbangi naglakip sa mga nag-una nga mga opisyal sa pangagamhanan sa Pilipinas.
Sama sa atong nahibaw-an, labing menos 131 ka mga kongresista ang gikinahanglan aron magboto alang sa pag-impeach sa Bise Presidente ug ipadala ang mga artikulo sa impeachment ngadto sa Senado.
Ang Senado molihok usab, isip mga maghuhukom sa korte sa impeachment ug sila ang maghahatag sa desisyon alang sa Bise Presidente kung siya angay ba nga tangtangon gikan sa katungdanan o dili.
Ako mihatag sa akong suporta sa mga tawo nga miadto sa peace rally kay ang ilang gihimo, susama ug kabahin man sa akong adbokasiya nga mao ang maayong pagdumala sa gobiyerno ug kahusay sa katawhan sa kalibutan.
Busa, akong gitawag ang tanang mga lider sa politika nga ihiklin ang ilang mga personal nga ambisyon ug ipatigbabaw pag-una ang kalinaw sa nasud.
Ang Iglesia ni Cristo nagsugyot nga ang personal nga interes sa mga politiko dili angay maghari sa Kongreso o sa ubang mga dapit sa gobyerno. Kinahanglan nga ilang paga-unahon mao ang interes sa katawhan.
Apan angay usab mahibaw-an sa akong mga kahigala-an nga samtang nagsuporta ako sa rally alang sa kalinaw, wala kini nagpasabot nga nagbarug ako sa mga lihok sa impeachment ni Duterte.
Nagpadayag ako sa akong suporta sa mga mi-apil sa rally tungod kay ako usa ka tigpasiugda sa kalinaw. Usa ako sa mga nagpahiluna sa akong kaugalingon sa daplin ug naghulat sa mga ebidensya kung angayan ba o dili nga i-impeach ang Bise President.
Subo nga palandongon nga ang panagbangi sa kadagko-an sa gobyerno, naka-apekto ug nakatuhop na sa mga ordinaryong Pilipino.
Ang panahon ug mga oportunidad sa gobyerno nausik tungod sa mga gihimo nga marathon committee hearings nga dili na makahatag ug kaayuhan sa katawhan.
Labaw sa tanan, nagtoo ako nga kadtong gustong motangtang sa Bise Presidente gikan sa katungdanan, kinahanglan nga magtan-aw sa mandato nga gihatag kaniya sa kapin sa 30 milyong mga botante niadtong piniliay sa 2022.
Nagtuo ako nga ang tingog sa katawhan dili angay nga pasagdan lang. Kinahanglan nga respetohan ang ilang katungod sa pagpili sa ilang mga lider niadtong maong piniliay
Nagtoo ako nga ang katawhan mao ang mohukom kung angay ba o dili nga magpabilin ang Bise Presidente sa iyang katungdanan.
Kay sumala pa sa sanglitanan “Ang maayong binuhatan, dili gyud magbunga ug dautan.”
(Bahin sa Magsusulat: Si Ronie Orillosa mao ang Co-Founder sa Youth Lead Philippines, Inc. diin siya aktibo nga sakop hangtud karong panahona. Director for Membership usab siya sa Rotary Club Downtown San Juan, Metro Manila. Napili siyang Barangay SK Kagawad kanhi sa Dao, Dakbayan sa Tagbilaran ug siya ang Presidente sa Pangagamhanan sa mga Tinun-an sa PMI Colleges, Bohol sa tuig 2012-2013. Presidente usab siya sa Bohol Alliance of Student Councils sa susamang tuig.)