Bohol Light nagpahibalo sa Bag-ong Panahon sa Customer-Centric Service
By Sheryl B. Paga
Ang Dakbayan sa Tagbilaran nahugyaw sa kahinam niadtong Lunes, Enero 27, 2025, sa dihang ang Bohol Light Company, Inc. nagpadayag sa brand identity ug pasalig ngadto sa mas hayag nga kaugmaon alang sa katawhang Bol-anon. Ang bag-o nga logo sa Bohol Light, usa ka buhi nga representasyon sa natad sa enerhiya.
Atol sa pakigpulong nga gihimo niadtong Enero 27, 2025, niingon ang Bohol Light President ug Chief Executive Officer (CEO) nga si Roel Castro nga ang pagpadayag sa bag-o nga logo nagpakita sa kinasingkasing nga tumong alang kahayag sa mga Bol-anon ilabi na sa pag-alagad sa syudad sa Tagbilaran uban sa walay paglubad nga dedikasyon sa milabay nga 25 ka tuig ug sa umaabot pang mga katuigan.
Ang kalihokan nga gitambongan nila ni Gobernador Erico Aristotle Aumentado, Mayor Jane Yap, ug mga lider sa komunidad dinhi sa Tagbilaran, nga nagpakita sa ilang representasyon ug suporta sa Bohol Light.
Gisulti ni Gobernador Aumentado nga ang rebranding nga gihimo sa Bohol Light giisip nga us aka “renewal of commitment” ngadto sa mga kustomer.
Ubos sa pagpangulo sa Primelectric Holdings, Inc., ang buhatan sa Bohol Light maningkamot nga makabaton ang mga konsumidor ug mas hayag nga paglaum. Gihimo ang modernisasyon sa mga pasilidad alang sa segurado nga pag-apod-apod sa kuryente dinhi sa syudad sa Tagbilaran.
Sukad niadtong bulan sa Enero, gisugdan ang 24/7 Helpline and Quick Response Team nga nagmonitor diha sa bag-o nga Control Center diin andam sa pagtubag sa mga pangutana gikan sa Bohol Light official messenger account ug mga tawag gikan sa mga hotline nga numero (038) 427-2372, 412-3503, 0922-307-2161, ug 09209602372.
Mga buhatan nga modawat sa bayad
sa BWUI bills gipahibalo
Sinulat ni Victor L. Tambis
Mga establisimyento nga modawat ug bayad sa bills sa Bohol Water
Sa tinguha nga mahatagan ug kasayon ang mga konsumidor sa Bohol Water, ang maong Kompanya nakig-alayon sa mga establisimyento nga mahimong modawat sa bayad sa BWUI bills nga mao ang mga mosunod: (1) First Consolidated Bank ug ang ilang FCBPay app; (2) Land Bank of the Philippines; (3) Bank of Commerce; (4) Security Bank; (5) M. Lhuiller ug ang ilang ML Wallet app; (6) Palawan Express/Pawnshop ug ang ilang Palawan Pay app.; (7) Bayad Center app. Pinaagi sa fasilidad sa Security Bank ug mahimong mobayad pinaagi sa G-Cash.
Subay niini, ang mga konsumidor sa Bohol Water gipahibalo nga sugod sa Marso 1, 2025, ang BLCI dili na modawat sa bayad sa BWUI bills. Sa susamang paagi, ang BWUI dili na usab modawat sa bayad gikan sa BLCI bill.
Kining maong kausaban nakab-ot aron paghatag sa mga konsumidor sa BLCI ug BWUI ug kahigayonan nga adto na kini mobayad sa mga payment partners diin kadaghanan niini modawat sa bayad sa tubig ug suga.
Sa tinguha nga madugangan ang karon nga mga payment partners, ang Bohol Water nagpadayon sa negosasyon sa ubang mga establisimyento nga mahimong payment partner niini.
Aron mahatagan ug dugang katin-awan, o pagtawag sa customer services sa Bohol Water pinaagi sa mga numero sa telepono: 412-3154 / 411-0210 ug sa cellphone no. 0917-720-8672 o mo log-in sa FB page: boholwaterutilitiesinc.
Jambawan, nanguna sa halin sa Kadiwa sa Lila
Sinulat ni Rey Anthony Chiu
Labing dako ug halin ang delegasyon sa barangay Jambawan human sa walo ka adlaw nga Kadiwa Ng Pangulo nga gipahigayon gikan sa Enero 13-20, didto sa Lila.
Kinatibuk-an nga P29,523 ang halin sa barangay, ang labing daku sa 18 ka barangay sa lungsod nga mitumod sa ilang mga produkto sa nahimo na nga institusyon sa pamaligya sa mga lokal nga ani ug ginama nga produkto sa lungsod.
Wala usab magpa wani ang barangay barangay Calvario ug Calvario Farmers Association nga mihalin ug 27,865, samtang Ang Bonkokan Ilaya nakapamaligya ug 19,637.
Ang barangay Macalingan, nakapamaligya usab ug 16,362 samtang ang Lomanoy, mipamaligya ug 13,460.
Ang lima ka barangay nanguna sa halin sa mga lokal nga mitumod alang sa pamaligya nga nahimo na nga regular nga kalihukan, tungod sa usa ka ordinansa.
Sa mga dili taga lungsod, ang pundok sa Ubay buwak vendors ug Farmers Association, maoy top seller sa pagpamaligya sa 81,410 nga mga produkto.
Nagsunod na niining mga outsiders ang Bohol Dairy Cooperative nga nahalinan ug 6,595.
Ang Loay 4Ps associations nahalinan usab ug 3,090.
Sa kinatibuk-an, mikabat sa P236,648 ang halin nga nahipos sa 8 ka adlaw ngabpamaligya.
Ang Kadiwa sa Lila, agi ug pagsanong sa aghat sa Presidente nga himoon nga mas sayon sa katawhan ang pag-akses sa mas barato ug mas presko nga mga produkto gikan sa umahan ug sa mga gagmay nga mamumuhunan gikan sa lungsod.
Sa abag usab sa mga ahensya sa kagamhanan, nagtinabangay ang Department of Agriculture, Department of Trade and Industry, Bureau of Fisheries and Aquatic Resources ug Social welfare and development aron makapasulod sa uban pang suppliers sa Kadiwa.
PAGBUHI SA TABO? Sa pila n aka tuig nga wala na mauso ang tabo sa Lila, kini na tingali ang higayon nga mahibalik ang pormal nga pagtumod sa mga produkto ug ani gikan sa kabaranggayan. Kon mahitabo, kini mahimong ikab-it sa administrasyon nila ni Mayor Arturo Piollo ug Reina Salazar. (Hulagway gikan sa PIA-Bohol/MPIO)
DA7 nagpahigayon og cassava
techno demo sa lungsod sa Mabini
Sinulat ni Elvira Bongosia
Nikabat sa 46 ka mga mag-uuma gikan sa nagkalain-laing mga barangay sa lungsod sa Mabini ang nisalmot sa Farmer’s Field Day on Cassava Technology Demonstration niadtong Enero 23, 2025.
Ang hiniusa nga kalihokan tali sa Department of Agriculture-Central Visayas (DA7) ubos sa Corn/Cassava Program ug local nga kagamhanan sa lungsod sa Mabini pinaagi sa Municipal Agriculture Office (MAO) gitumong sa pagsangkap sa mga lokal nga mag-uuma sa gikinahanglan nga kahibalo ug kahanas sa pagpausbaw sa ilang produksyon sa balanghoy, pagpausbaw sa kita sa mga mag-uuma ug sa lokal nga ekonomiya.
Sa maong kalihokan, si Agricultural Program Coordinating Officer (APCO-Bohol) Roman Dabalos mipa-ambit sa kamahinungdanon sa pagpalapad sa pagpananom ug balanghoy.
Gipahayag ni Dabalos ang paglaum nga sa suporta gikan sa programa sa Cassava Program, ang mga mag-uuma mahimo’g mapalambo ang ilang mga abot pinaagi sa kakugi ug dedikasyon.
Iya usab gihisgutan ang mga proyekto nga ipatuman karong tuiga sa DA sa 2025 nga gigahing budget, partikular ang programa sa kahayupan.
Si Edgar F. Piligrino, usa sa mga project cooperators, nagpahayag sa iyang pasalamat sa proyekto, nga nag-ila niini nga usa ka bililhon nga oportunidad diin makakuha ug mga panabut nga makapauswag sa ilang panginabuhi.
“Ang kahibalo nga among nakuha pinaagi sa Cassava Technology Demonstration dako kaayo ug tabang. Mapasalamaton kaayo kami niining higayona nga makakat-on, tungod kay dili lang kini makatabang sa pagtaas sa among ani, apan usab magpauswag sa among kinatibuk-ang produktibidad ug kalampusan,” matud pa ni Piligrino.
Ang tanom nga balanghoy makasugakod sa kainit sa huwaw nga mahimong i-proseso isip himsog nga snacks sama sa cassava cake, cassava chips ug fries. Kini usab nga tanum nag-unang sangkap sa mga feed sa kahayopan nga makahatag ug dugang nga kita sa mga mag-uuma. (Hulagway gikan PIA7-Bohol)
GSIS gipasayon ang kwentada sa
bayranan sa sakop nga nag loan
Sinulat ni Elvira Bongosia
Gipahigayon sa Government Service Insurance System (GSIS) ang bag-ong palisiya nga makapasayon sa pagkwenta sa hulogon sa mga naghuwam sa pundo niini ilabi, na kadtong nakapalta sa pagbayad sa ilang balayronon.
Kini aron mapagaan ang gipas-an nga balayronon sa mga membro nga nanghuwam sa GSIS samtang maga-aghat usab kanila pagbayad sa mas may tempo nga bayad aron mapapas na ang utang ug makapahibalik isip sakop nga may good standing.
Sa bag-ong polisiya, kadtong mag penalidad, pwede na nga kwentahon gamit ang yano nga interes base sa wala mabayri nga binuwang butangon.
Ang bag-ong polisiya magsakop sa kadtong may mga wala pa mabayri nga utang sa mga aktibo nga sakop o kadtong inactive na, gawas niadtong mga huwam nga na impas na.
Kasamtangan pang nagpanday ang GSIS sa sumbanan alang sa mas daghan pang mga posiliya nga ika-ayo sa mga sakop niini.
“Kini nga mga kaugmaran, kabahi sa nagpadayon nga mga saad sa GSIS nga iasdang ang financial inclusivity ug kasayon sa mga sakop, aron mapamatuod ang ‘Ginhawa for All’ nga maoy kasingkasing sa serbisyo sa GSIS,” matud ni GSIS President ug General Manager Wick Veloso.
Niini, nagtuo ang GSIS nga mas sayon masabtan sa sakop ang kwentada sa balayronon ug mga silot sa wala matunong sa tyempo nga bayad, ug mas mapasayon ra’ng madumala ang bayranan.
Buot lamang nato nga tabangan ang atong mga sakop nga dali rang mahibalik sa ilang pagka good members ilabi na sa ilang mga huwam niining panahon sa kalisud, dugang ni Veloso.
“Kining mas klaro nga pagkwenta, maghatahag sa mga sakop nga may nga wala mabayri na mga tulubagon nga mahawanan ang ilang panglantaw, dugang niya.
Sa mga sakop nga wala pa maka-impas sa ilang balayronon, matud sa GISIS may sistema sila nga modawat sa bayad niadtong may mga palta sunod sa unom ka buwan.
Niini, mahimong makatabang kini sa mga sakop nga may huwam nga ilang mapahiuli ang ilang credit standing ug maka-usab pa ug huwam ug sinati sa mga programa sa GSIS.
CSC mipasalig sa mga kawani sa gobyerno
ug suporta sa pagbuntog sa sakit nga kanser
Sinulat ni Elvira Bongosia
Ang Civil Service Commission (CSC) nagpahinumdom sa mga empleyado sa gobyerno nga adunay ‘support mechanism’ alang sa paglikay, pagpatambal ug recovery sa sakit nga kanser.
Sa usa ka pahayag, gipasalig ni CSC Chairperson Marilyn Yap sa mga trabahante sa sektor sa gobyerno nga nag-atubang sa makalilisang nga sakit ug ang epekto sa ilang mga trabaho ug pamilya nga dili kinahanglan nga mag-inusara sa pagbuntog sa kanser.
Ubos sa CSC Resolution No. 2400721 o ang Workplace Cancer Control Policy in the Public Sector, ug Republic Act No. 11215 (ang National Integrated Cancer Control Act), ang mga benepisyo ug suporta mahimo nang magamit.
Ang mga lakang sa pagpugong sa kanser naglakip sa libre nga pagsusi sa peligro sa kanser, pagpugong, sayo nga pag-ila, pagtambal, rehabilitasyon, ug pag-atiman sa makaayong pag-atiman sa mga trabahoan sa gobyerno.
Ang RA No. 11215 naghatag usab sa mga empleyado ug access sa barato ug dekalidad nga pagtambal sa kanser, uban ang dugang pinansyal nga tabang pinaagi sa PhilHealth.
Aron makapahimos sa tabang ug mga benepisyo, ang kawani sa gobyerno kinahanglan lang nga mosumite sa opisyal sa human resources (HR) ug balido nga medical certificate nga nagpamatuod sa diagnosis o risgo, iyang membership sa PhilHealth, ug medical records.
Ang programa naglakip usab sa partisipasyon sa empleyado sa gobyerno sa usa ka cancer control program nga gihatag sa amo nga ahensya.
Gitambagan ang mga empleyado sa pagkontak sa HR officer sa ilang ahensya alang sa giya sa pag-access sa mga programa sa trabahoan.
Sa mga kaso nga nanginahanglan ug espesyal nga pag-atiman, ang DOH o ang labing duol nga Philippine Cancer Center o rehiyonal nga sentro sa kanser mahimong maghatag ug serbisyo.
Ang tanang ahensya sa gobyerno gi-awhag sa pagpatuman sa mga polisiya sa pagkontrolar sa kanser sa trabahoan ug pagsiguro nga ang mga empleyado mapahibalo sa ilang mga programa.
BALAK
ANG NAGKAGIDLAY NGA PANGANDOY
Sinulat ni Engr. Rogelio Podelino
Paggawas nimo sa sabakan sa imong inahan
Mihilak ka pag-ayo wala masayod sa hinungdan
Timailhan ba sa nagkaguliyang nga kalibutan
Kalibutan nga puno sa mga suliran
Matag linalang may dalan nga iyang subayon
Gihatagan ka ug kagawasan sa imong buhaton
Apan ang tawo ulipon man sa kasaypanan
Nagkinahanglan ka ug lig-on nga gabayan
Nagtubo ka nga busog sa mga pagtulun-an
Gibansay ka sa maayong pamatasan
Gisilsil sa imong alimpatakan
Ang NAPULO KA SUGO maoy imong gabayan
Kay kabus man ang imong mga ginikanan
Matag adlaw nagbugwal sa umahan
Apan ang kawad-on dili babag sa pangandoy
Padayon sa pagtungha luyo sa mga kakapoy
Kay imong gipuy-an ana-a man sa kabukiran
Magbaklay kada adlaw padulong sa tulunghaan
Bisan kon ang balon kamoteng bagon
Hugot kanunay ang mga pangandoy ipadayon
Adunay higayon napupos ang imong paglaum
Ang balati-ang haguka nawad-an sa gahum
Apan gi-agakay ka dayon sa imong gabay
Gidaseg ka sa imong anghel nga magbalantay
Ang nag-omido nga paglaum sa daklit misilaob
Ang pagsagubang sa mga kalisdanan mikayab
Bisan kon nagka putol putol ang pagtungha
Basta ang pangandoy buhi sa hunahuna
Trabaho sa adlaw ug tungha sa gabii
Kini ang bugtong paagi
Aron pagsungkit sa kinaadman dili mapakgang
Luyo sa malisud nga kahimtang
Ang bunga sa mga sakripisyo wala damha
Mi-abot ang bulawanong higayon mapu-po na
Luha sa kalipay sa mga mata midagayday
ANG NAGKAGIDLAY NGA PANGANDOY inanay
nga natagik sa mga pag-antos aron kalampusan
dili mapusgay