Ni ELEAZAR TUTOR ACAMPADO
Ang Alternatibong Paagi sa Pagkuha og Edukasyon sa Kolehiyo
GUSTO mo bang makahuman sa kolehiyo o mapalapad pa ang edukasyon nga nakuha pero wala kay panahon sa pagsulod sa eskuylahan? Ayaw og kaguol. May kahigayonan pa nga matuman ang imong mga pangandoy, pinaagi sa dili tradisyonal nga tipo sa pagkuha sa edukasyon – ang distansiyang edukasyon.
Unsa ba gayod kining distansiyang edukasyon? Ang distansiyang edukasyon ginatawag sa nagkadaiyang mga ngalan. Adunay correspondence study, home-study, open learning, off-campus programs, borderless education, online education ug uban pa. Ang nakalahi niini sa tradisyonal nga moda sa edukasyon mao ang wala pagkinahanglan sa estudyante nga mosulod sa eskuylahan ug moatubang sa magtutudlo hangtod nga matapos ang kurso. Ang estudyante makatuon sa ilang balay, sa trabahoan ug sa mga learning center. Ang mga instruksiyon ipaabot pinaagi sa mga giimprintang modyul, online/offline audio ug videos, radio ug telebisyon, elektronikong sulat ug uban pa.
Ang mga estudyante makakuha og hinabang sa mga wala niya hisabti sa iyang mga leksiyon pinaagi sa pagkonsulta sa mga magtatambag o sa mga magtutudlo sa mga learning center.
Ug karon nga misulbong ang paggamit sa online classes tungod sa nagkapaspas nga internet connection, dali na kaayo ang klase nga ipaagi sa Zoom, Google Meet ug uban pang video conferencing platforms.
Ang distansiyang edukasyon alang sa mga disbentaheng estudyante nga gustong makakuha og ikaduhang higayon nga makahuman sa ilang pagtuon sa kolehiyo; sa mga gustong mapalapad ang edukasyon nga nakuha; sa mga gustong mousbaw ang oportunidad sa pagpanarbaho; sa mga gustong makat-on sa mga bag-ong kalamboan sa ilang propesyon; sa mga dili makatuon sa eskuylahang pormal tungod sa giyera, diperensiya sa lawas, nabilanggo, halayo sa eskuylahan, wala nay panahon sa pagtuon tungod sa trabaho, problemang pinansiyal ug uban pa.
Ang mga estudyante niini nga sistema makadaginot sa balayronon sa eskuylahan. Dili na makagasto sa pamilete, sa balayronon sa sak-anan nga balay, uniporme, libro, ug uban pang galastohon nga dili kalikayan sa regular nga pag-eskuyla.
Kining sistema sa pagkuha og edukasyon dugay nang gisagop sa Uropa, Amihanang Amerika, ug Asya. Dinhi sa Pilipinas usa na kini ka dakong kabahin sa sistema sa edukasyon. Daghan na ang mga institusyon nga nagpaila sa konsepto sa pagtuon sa kinaugalingon.
Sa Metro Manila, anaa ang University of the Philippine Open University (UPOU) diin daghan nang mga Bol-anon ang migradwet usa na niini ang higaladagang nga si Manu Avenido nga mipaso niadtong Disyembre 7, 2024 ug nakadawat og With Highest Honors sa iyang pagkuha og Diploma in Language and Literacy Education; ang Polytechnic University of the Philippines – Open University (PUP-OU); CAP College Foundation Inc., diin usa kita ka gradwado niadtong Abril 2020; ang Asian Institute of Distance Education (AIDE); Pamantasan ng Lungsod ng Maynila – Open University (PLM-OU), Mapua University. Samtang dinhi sa Kabisay-an, anaa ang Visayas State University – Open University sa Baybay, Leyte; WVSU Open University sa Iloilo City ug Cebu Technological University sa Sugbo.
Sa mga eskuylahan nga ginganlan sa unahan, ang UPOU, PUP-OU, CAP College ug AIDE ang adunay mga estudyante sa nagkadaiyang mga probinsiya, siyudad, barangay, o hilit nga baryo sa Pilipinas.
Liboan na ka mga estudyante ang nagmapatuod nga ang distansiyang edukasyon o online education na karon, nagadala ug maayong mga oportunidad. Usa ka ilado sa tibuok kalibotan nga misagop ning sistema mao si Nelson Mandela, kanhi presidente sa South Africa. Si Mandela nga midaog og Nobel Peace Prize sa 1993, nagtuon sa abogasiya ug nakahuman sa kurso diha sa bilanggoan.
Ang mga malamposong gradwado sa distansiyang edukasyon nag-ensayo sa kakugi, pasensiya, pagka maduloton sa trabaho, disiplina sa kaugalingon sa pagtuon sa ilang mga leksiyon. Kon wala sila niini, ang distansiyang edukasyon usa ka programa dili haom nila.
Bisan pa sa mga kalamposan sa ubang mga estudyante, aduna gihapoy dakong babag sa pagdawat sa distansiyang edukasyon nga anaa sa panghunahuna sa kadaghanan. Diyotay lang ang nakaamgo sa kahinungdanon niining maong sistema.
Ang atong kultura ang usa sa mabasol. Gidala kini sa konsepto nga adunay sobra na sa edad sa paghuman sa pag-eskuyla. Ang mga edaran na biaybiayon tungod kay bisan og tiguls na nag-eskuyla pa gihapon.
And uban nag-ingon nga gumikan kini sa pagkakulang sa impormasyon sa alternatibong paagi sa edukasyon. Ug ang distansiyang edukasyon akridesado man kini o dili, wala isipa nga maayong pilion niadtong gustong mopadayon sa pag-eskuyla o mapalapad pa ang ilang edukasyon. Diyotay lang ang miawat ug miila niini tungod kay ang tradisyonal nga papel sa mga magtutudlo sayop nga nakit-an nga mahulipan na unya sa mga bag-ong teknolohiya.
Hinuon, bisan pa sa mga dili paborableng pagtuo, ang distansiyang edukasyon magpabilin sa gihapon nga karon, milapad na ngadto sa online education. Sa paglantaw sa masanag nga kaugmaon nga nagahulat sa unahan, aduna kiniy dakong papel niining ekonomiya nga gidomina sa kahibalo.
Niining panahon sa impormasyon, ang pagkuha sa maayong edukasyon wala na mahasento sa upat ka suok sa lawak-saringan. Pinaagi sa koneksiyon sa internet, makuha kini nga paspas bisan kanus-a, bisan asa basta gidawat ang mga paagi sa pagpresentar niini ug nga gisagop nga adunay dakong pag-angay.
Hinumdomi, Sano, nga ang pagkuha og edukasyon sa kolehiyo dili usa ka pribiliheyo. Usa kini ka katungod sa matag usa kanato.
(Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)